8.5 ஓவரில் 104 ரன்கள் சேஸ்.. ஜிம்பாப்வேவுக்கு மரண அடி கொடுத்த இந்தியா!
ஜிம்பாப்வே மகளிர் அணியுடன் நடந்த 2வது டி20 போட்டியில் இந்தியா 8.5 ஓவரில் இலக்கை எட்டியது. ஷபாலி வெர்மா 55 ரன்களும், ஸ்மிருதி மந்தனா 47 ரன்களும் அடித்து அசத்தினர். தொடரை 2-0 என வென்ற இந்தியா, 3வது போட்டியில் வெற்றியை உறுதிசெய்ய முயற்சிக்கிறது.
இந்தியாவிற்கு சுற்றுப்பயணம் செய்திருக்கும் ஜிம்பாப்வே மகளிர் அணி 3 டி20 போட்டிகள் மற்றும் 3 ஒருநாள் போட்டிகளில் விளையாடுகிறது. இந்த தொடரிலிருந்து இந்திய கிரிக்கெட் மகளிர் அணியின் முழுநேர கேப்டனாக ஸ்மிருதி மந்தனா அறிவிக்கப்பட்டார். ஆனால் கேப்டனாக விளையாடிய முதல் போட்டியையே மறக்கமுடியாத போட்டியாக மாற்றியது ஜிம்பாப்வே மகளிர் அணி. 19 ரன்னுக்கு 4 விக்கெட்டுகளை இழந்தபிறகு போராடி வென்றது இந்தியா.
இந்தசூழலில் இரண்டு அணிகளுக்கும் இடையேயான 2வது டி20 போட்டி நேற்று நடைபெற்றது. பரபரப்பாக நடைபெற்ற போட்டியில் முதலில் பேட்டிங் செய்த ஜிம்பாப்வே அணி 20 ஓவரில் 8 விக்கெட் இழப்புக்கு 102 ரன்கள் மட்டுமே அடித்தது.
தொடர்ந்து விளையாடிய இந்திய அணி 8.5 ஓவரிலேயே இலக்கை எட்டி 9 விக்கெட்டுகள் வித்தியாசத்தில் மிகப்பெரிய வெற்றியை பதிவுசெய்தது. தொடக்க வீரர்களாக விளையாடிய ஷபாலி வெர்மா 55 ரன்களும், கேப்டன் ஸ்மிருதி மந்தனா 47 ரன்களும் அடித்து அசத்தினர்.
3 போட்டிகள் கொண்ட தொடரை 2-0 என வென்றுள்ள இந்திய அணி, 3வது டி20 போட்டியில் நாளை விளையாடுகிறது.
