’குரு வழியில் சிஷ்யன்..’ 12 பந்தில் அரைசதம்.. 32 பந்தில் சதம்! 148 ரன்கள் குவித்த அபிஷேக் சர்மா!

இந்தியாவின் முதன்மை உள்நாட்டு டி20 தொடரான சையத் முஷ்டாக் அலி டிராபியின் 18வது சீசன் தொடங்கி நடைபெற்றுவருகிறது.. அந்த வகையில், இன்று நடைபெற்றுவரும் பஞ்சாப் மற்றும் பெங்கால் அணிகளுக்கு இடையேயான போட்டியில் பஞ்சாப் கேப்டன் அபிஷேக் சர்மா 52 பந்தில் 148 ரன்கள் அடித்து மிரட்டினார்..

முதலில் விளையாடிய பஞ்சாப் அணியில் தொடக்க வீரராக களமிறங்கிய அபிஷேக் சர்மா, தொடக்கத்திலிருந்தே அதிரடியான பேட்டிங்கை வெளிப்படுத்தி ரன்வேட்டை நடத்தினார். முதல் 12 பந்தில் 5 சிக்சர்கள் 5 பவுண்டரிகள் என துவம்சம் செய்த அபிஷேக் சர்மா அரைசதமடித்து அசத்தினார்..

தொடர்ந்து வேகத்தை குறைக்காத அவர் 32 பந்தில் சதமடித்ததுடன் 16 சிக்சர்களை நாலாபுறமும் சிதறடித்து 148 ரன்களை குவித்தார்.. அவருடைய அதிரடியான ஆட்டத்தால் 20 ஓவரில் 5 விக்கெட்டுகளை இழந்த பஞ்சாப் அணி 310 ரன்கள் குவித்து அசத்தியது..

311 ரன்கள் என்ற மிகப்பெரிய இலக்குடன் விளையாடிவரும் பெங்கால் அணி முதலிரண்டு ஒவரிலேயே 8 ரன்னுக்கு 3 விக்கெட்டுகளை இழந்து விளையாடிவருகிறது.. 148 ரன்கள் குவித்தது மட்டுமில்லாமல் பந்துவீசிய அபிஷேக் சர்மா ஒரு விக்கெட்டையும் தட்டிச்சென்றார்..

டி20 கிரிக்கெட்டில் 12 பந்தில் அரைசதமடித்த அபிஷேக் சர்மா, அதிவேகமாக டி20 அரைசதமடித்த 3வது உலக வீரராக மாறினார்.. 2007-ல் 12 பந்தில் அரைசதமடித்த தன்னுடைய குருவான யுவராஜ் சிங் சாதனையை சமன்படுத்திய அபிஷேக், நேபாள் அணியின் திபேந்திரா மற்றும் இந்தியாவின் அஷுதோஷ் சர்மாவிற்கு பிறகு 3வது அதிவேக வீரராக நீடிக்கிறார்..

டி20 கிரிக்கெட்டில் அதிவேக அரைசதம்:

1. திபேந்திரா சிங் - நேபாள் - 9 பந்துகள் - 2023

2. அஷுதோஷ் சர்மா - ரெயில்வே அணி - 11 பந்துகள் - 2023

3. அபிஷேக் சர்மா - பஞ்சாப் - 12 பந்துகள் - 2025

4. யுவராஜ் சிங் - இந்தியா - 12 பந்துகள் - 2007

5. கிறிஸ் கெய்ல் - மெல்போர்ன் ரெனிகேட்ஸ் - 12 பந்துகள் - 2016

அதேபோல டி20 கிரிக்கெட்டில் அதிகபட்ச டி20 தனிநபர் ஸ்கோர் அடித்த இந்திய வீரர்கள் பட்டியலில் ஸ்ரேயாஸ் ஐயரை பின்னுக்கு தள்ளி 2வது இடத்திற்கு முன்னேறியுள்ளார் அபிஷேக் சர்மா..

டி20 கிரிக்கெட்டில் இந்தியாவின் அதிகபட்ச தனிநபர் ஸ்கோர்:

1. திலக் வர்மா - 151 (67) - 2024

2. அபிஷேக் சர்மா - 148 (52) - 2025

3. ஸ்ரேயாஷ் ஐயர் - 147 (55) - 2019