19 வயதில் ரோகித் படைத்த வரலாற்று சாதனை.. 18 வயதில் முறியடித்த CSK சிறுவன்!
சையத் முஷ்டாக் அலி டிராபியில் மும்பை அணிக்காக விளையாடிய 18 வயது ஆயுஷ் மாத்ரே, 49 பந்தில் சதமடித்து ரோகித் சர்மாவின் 19 வயது சாதனையை முறியடித்துள்ளார். IPL-ல் பிரபலமான இவர், இந்திய யு19 கேப்டனாகவும் விளங்குகிறார். 8 பவுண்டரிகள், 8 சிக்சர்களுடன் 110 ரன்கள் அடித்து மும்பை அணிக்கு வெற்றியைத் தந்தார்.
சென்னை சூப்பர் கிங்ஸ் அணிக்காக 2025ஆம் ஆண்டு ஐபிஎல்லில் அறிமுகமான 17 வயது வீரரான ஆயுஷ் மாத்ரே, 7 போட்டிகளில் 190 ஸ்டிரைக் ரேட்டுடன் 31 பவுண்டரிகள் 11 சிக்சர்களை பறக்கவிட்டு எல்லோருடைய கவனத்தையும் பெற்றார்..
ஐபிஎல் மூலம் மிகப்பெரிய கவனத்தைப்பெற்ற ஆயுஷ் மாத்ரே, இந்திய யு19 அணியின் கேப்டனாகவும் சிறப்பாக செயல்பட்டுவருகிறார்..
இந்நிலையில் சையத் முஷ்டாக் அலி டிராபியில் மும்பை அணிக்காக விளையாடிவரும் ஆயுஷ் மாத்ரே 49 பந்தில் டி20 சதமடித்து இளம்வயதில் பிரமாண்ட சாதனையை படைத்துள்ளார்..
இளம் வயதில் பிரமாண்ட சாதனை!
இந்தியாவின் முதன்மை உள்நாட்டு டி20 தொடரான சையத் முஷ்டாக் அலி டிராபியின் 18வது சீசன் தொடங்கி நடைபெற்றுவருகிறது.. நேற்று நடைபெற்ற போட்டியில் மும்பை மற்றும் விதர்பா அணிகள் மோதின.. இதில் முதலில் விளையாடிய விதர்பா அணி 20 ஒவர்கள் முடிவில் 192 ரன்கள் குவித்தது..
அதனைத்தொடர்ந்து விளையாடிய மும்பை அணியில் தொடக்க வீரராக களமிறங்கிய 18 வயது வீரரான ஆயுஷ் மாத்ரே 8 பவுண்டரிகள் 8 சிக்சர்கள் என நாலாபுறமும் சிதறடித்து 49 பந்தில் சதமடித்து அசத்தினார்.. இறுதிவரை ஆட்டமிழக்காமல் ஆயுஷ் மாத்ரே 53 பந்துகளில் 110 ரன்கள் அடிக்க, 17.5 ஓவரில் இலக்கை எட்டிய மும்பை அணி அசத்தலான வெற்றியை பதிவுசெய்தது..
18 வயதில் சதமடித்த ஆயுஷ் மாத்ரே இந்திய கிரிக்கெட் வரலாற்றில் இளம் வயதில் (18 வருடம் 135 நாட்கள்) முதல்தர கிரிக்கெட், லிஸ்ட் ஏ கிரிக்கெட் மற்றும் டி20 கிரிக்கெட் மூன்றிலும் சதமடித்த வீரராக சாதனை படைத்துள்ளார்..
இதற்கு முன் இந்த சாதனையை இந்தியாவின் நட்சத்திர வீரர் ரோகித் சர்மா 19 வயதில் (19 வருடம் 339 நாட்கள்) படைத்திருந்தார்.. அவருடைய சாதனையை முறியடித்து வரலாற்றில் தடம்பதித்துள்ளார் ஆயுஷ் மாத்ரே..
