பண்பாடும் ஆன்மிகமும் சங்கமிக்கும் நவராத்திரி.. கொலுவின் சுவாரசிய பின்னணி!!

ஒன்பது இரவுகள்... அம்பிகையின் அருள் வழிபாடு... தலைமுறை தலைமுறையாகத் தொடரும் பொம்மைகளின் அணிவகுப்பு. நவராத்திரி திருவிழா என்பது வெறும் வழிபாட்டுடன் நின்றுவிடாமல், தமிழ்நாட்டின் தனித்துவமான பண்பாட்டு அடையாளமாகவும் விளங்குகிறது. மகிஷாசுரன் என்ற அரக்கனை அன்னை துர்கை ஒன்பது இரவுகள் போரிட்டு, பத்தாவது நாளில் வதம் செய்து தர்மத்தை நிலைநாட்டிய புராண நிகழ்வே, தீமையை நன்மை வென்ற நவராத்திரி விழாவாகக் கொண்டாடப்படுகிறது. இதன் சிறப்பம்சமான கொலு அமைப்பில், ஒற்றைப்படை எண்ணிக்கையிலான மரப்படிகளில் மேல்படிகளில் தெய்வ உருவங்களும், கீழ்ப்படிகளில் முனிவர்கள், மனிதர்கள், வணிகர்கள், விவசாயிகள் மற்றும் விலங்குகளின் பொம்மைகளும் வைக்கப்படுகின்றன.

இது ஆன்மிகத்தின் உயர்வையும், மனித வாழ்க்கையின் பன்முகத்தன்மையையும் உலகிற்கு உணர்த்துகிறது. நவராத்திரியின் முதல் 3 நாட்கள் வீரத்தின் அடையாளமான துர்கைக்கும், அடுத்த 3 நாட்கள் செல்வத்தின் அடையாளமான லட்சுமிக்கும், இறுதி 3 நாட்கள் கலை மற்றும் ஞானத்தின் அடையாளமான சரஸ்வதிக்கும் அர்ப்பணிக்கப்படுகின்றன. 9ஆம் நாளில் சரஸ்வதி பூஜையும், 10ஆம் நாளில் விஜயதசமி வழியே குழந்தைகள் கல்வி தொடங்கும் வித்யாரம்பமும் சிறப்பாகக் கொண்டாடப்படுகின்றன.

குடும்ப உறுப்பினர்களை ஒன்றிணைத்து பொம்மைகளை அடுக்குவது, உறவினர்களுக்கும் அண்டை வீட்டாருக்கும் தாம்பூலம் மற்றும் சுண்டல் வழங்கி அன்பைப் பகிர்வது என சமூக ஒற்றுமையை வலுப்படுத்தும் உன்னத விழாவாக நவராத்திரி கொலு திகழ்கிறது. காலம் மாறினாலும், ஆன்மிகம், கலை மற்றும் குடும்ப உறவுகளை அடுத்த தலைமுறைக்குக் கொண்டுசெல்லும் இந்தப் பாரம்பரியம் என்றும் மாறாமல் தொடர்கிறது.