புதுச்சேரி | தலையில் நெல் மூட்டையுடன் காங்கிரஸ் முன்னாள் அமைச்சர் கமலக்கண்ணன்! #ViralVideo

செய்தியாளர் - அப்துல் அலீம்

புதுச்சேரியில் காங்கிரஸ் முன்னாள் வேளாண் மற்றும் பள்ளிக்கல்வித் துறை அமைச்சர் கமலக்கண்ணன், தற்போது நெல் மூட்டை தூக்கும் வீடியோவொன்று சமூக வலைதளங்களில் வைரல் ஆகி வருகிறது. அவரேவும் தன் முகநூல் பக்கத்தில் அதை பகிர்ந்திருப்பதாக தெரிகிறது.

இவர் ஏற்கெனவே புதுச்சேரி மாநிலம் காரைக்கால் அடுத்த அம்பகரத்தூர் பகுதியில் சொந்தமாக விளை நிலங்கள் வைத்துள்ளார். அங்கு தீவிரமாக விவசாயமும் செய்து வருகிறார்.

இந்த நிலையில் தனது வயலில் அறுவடை செய்யப்பட்ட நெல்களை அம்பகரத்தூர் பகுதியில் உள்ள தனியார் நெல் கொள்முதல் நிலையத்தில் விற்பனை செய்வதற்காக இவர் சமீபத்தில் கொண்டு சென்றுள்ளார்

அப்பொழுது நெல் மூட்டை இறக்குவதற்கு பணியாளர்கள் குறைவாக இருந்ததால் கொண்டு வந்திருந்த நெல் மூட்டைகளை தானே முன்வந்து டிராக்டரில் இருந்து இறக்கி நெல் கொள்முதல் நிலையத்தில் இறக்கியுள்ளார். இதை அங்கிருந்த சிலர் வீடியோ எடுகக்வே, அதை தன் முகநூல் பக்கத்தில் பகிர்ந்துள்ளார். இதையடுத்து அந்த வீடியோ சமூக வலைதளங்களில் வைரலாகி வருகிறது.