நாளை தொடங்கும் நாடாளுமன்றக் கூட்டத்தொடர்.. 10 மசோதாக்கள் தாக்கல்..

நாடாளுமன்ற குளிா்காலக் கூட்டத்தொடர் நாளை (டிசம்பா் 1) தொடங்கவுள்ளது. டிசம்பர் 19-ஆம் தேதிவரை நடைபெற இருக்கும் இக்கூட்டத் தொடரில் விடுமுறை நாட்கள் நீங்கலாக 15 அமர்வுகள் நடைபெற இருக்கின்றன. இந்த நிலையில், இக்கூட்டத்தொடரில் 8 முக்கிய மசோதாக்களை நாடாளுமன்றத்தில் அறிமுகப்படுத்த மத்திய அரசு திட்டமிட்டுள்ளது. மேலும் இரண்டு மசோதாக்கள் நாடாளுமன்றத்தின் பரிசீலனை மற்றும் நிறைவேற்றத்துக்கு தயாா்நிலையில் உள்ளன. அந்த வகையில் சண்டிகா் தொடா்புடைய அரசமைப்புத் திருத்த மசோதா, அணுசக்தி மசோதா, உயா்கல்வி ஆணைய மசோதா உள்ளிட்ட 8 மசோதாக்களுடன் தேசிய நெடுஞ்சாலைகள் (திருத்த) மசோதா மற்றும் காப்பீடு சட்டங்கள் (திருத்தம்) மசோதாவும் அறிமுகப்படுத்தப்பட இருக்கின்றன.

அதேபோல், 2025ஆம் ஆண்டுக்கான பத்திரச் சந்தைக் குறியீடு மசோதா (SMC)பட்டியலில் உள்ளது. மேலும், நடுவர் மன்றம் மற்றும் சமரசச் சட்டத்திலும் மாற்றங்களைக் கொண்டுவரத் திட்டமிட்டுள்ளது. இவைகளுக்கு மத்தியில் தேசிய தலைநகரான டெல்லியில் காற்று மாசுபாடு குறித்தும் சிறப்பு தீவிர வாக்காளர் பட்டியல் திருத்தம் (SIR)குறித்தும் எதிர்க்கட்சியினர் கேள்வி எழுப்பத் திட்டமிட்டுள்ளன. டெல்லி கார் வெடிப்பு சம்பவம் மற்றும் வெளியுறவுக்கொள்கைகள், பீகார் மாநிலத் தேர்தல் முடிவுகள் தொடர்பாகவும் கேள்வி எழுப்ப எதிர்க்கட்சிகள் திட்டமிட்டுள்ளன. வர்த்தக ஒப்பந்தங்கள் மற்றும் சீனாவுடனான தீர்க்கப்படாத எல்லைப் பேச்சுவார்த்தைகள், அமெரிக்க அதிபர் டொனால்டு ட்ரம்பின் அறிக்கைகள் தொடர்பாகவும் காங்கிரஸ் கேள்வி எழுப்பத் திட்டமிட்டுள்ளது.