மத்திய பட்ஜெட் 2026 | 7 அதிவேக ரயில் வழித்தடங்கள் அறிவிப்பு.. எங்கெங்கு தெரியுமா?
மத்திய நிதியமைச்சர் நிர்மலா சீதாராமன், இன்று 9ஆவது முறையாக பட்ஜெட்டைத் தாக்கல் செய்தார். அப்போது நாட்டின் முக்கிய நகரங்களுக்கு இடையே ஏழு அதிவேக ரயில் வழித்தடங்களை இந்தியா உருவாக்கும் என தெரிவித்தார். அவை எங்கெங்கு என பார்க்கலாம்.
மத்திய நிதியமைச்சர் நிர்மலா சீதாராமன், இன்று 9ஆவது முறையாக பட்ஜெட்டைத் தாக்கல் செய்தார். அப்போது, நாட்டின் முக்கிய நகரங்களுக்கு இடையே ஏழு அதிவேக ரயில் வழித்தடங்களை இந்தியா உருவாக்கும் என தெரிவித்தார். அதன்படி, இந்த அதிவேக வழித்தடங்கள் மும்பை - புனே, ஹைதராபாத் - புனே, ஹைதராபாத் - பெங்களூரு, ஹைதராபாத் - சென்னை, சென்னை - பெங்களூரு, டெல்லி - வாரணாசி, வாரணாசி - சிலிகுரி ஆகிய நகரங்களை இணைக்கும் என அவர் தெரிவித்தார். மேலும், தனது பட்ஜெட் உரையின்போது, சீதாராமன் கிழக்கில் உள்ள டான்குனியை மேற்கில் உள்ள சூரத்துடன் இணைக்கும் ஒரு புதிய பிரத்யேக கிழக்கு-மேற்கு சரக்கு வழித்தடத்தையும் அறிவித்தார்.
இந்த வழித்தடங்கள் சுற்றுச்சூழலுக்கு உகந்த பயணிகள் அமைப்புகளை மேம்படுத்துவதற்கான 'வளர்ச்சி இணைப்பாளர்களாக' செயல்படும் என்றும் இந்த முயற்சிகள் சரக்கு போக்குவரத்தை வலுப்படுத்தும் மற்றும் நிலையான சரக்கு போக்குவரத்திற்கு ஆதரவளிக்கும் என்றும் சீதாராமன் தெரிவித்தார். தற்போது, அகமதாபாத் மற்றும் மும்பைக்கு இடையேயான ஓர் அதிவேக வழித்தடத்தின் பணிகள் நடைபெற்று வருகின்றன. மணிக்கு 320 கி.மீ வேகத்தில் புல்லட் ரயில்களை இயக்குவதற்காக வடிவமைக்கப்பட்ட இந்தியாவின் ஒரே அதிவேக ரயில் திட்டமான 508 கி.மீ நீளமுள்ள மும்பை-அகமதாபாத் திட்டம், குஜராத், மகாராஷ்டிரா மற்றும் தாத்ரா மற்றும் நகர் ஹவேலி வழியாகச் செல்லும். இது முழு தூரத்தையும் 2 மணி நேரம் 17 நிமிடங்களில் கடக்கும்.
