”பிற மத வீட்டுக்குச் செல்லும் மகள்களின் கால்களை உடைக்க வேண்டும்” - Ex BJP MP சர்ச்சைப் பேச்சு!

சர்ச்சைக்குரிய கருத்து தெரிவிப்பதில் பாஜக முன்னாள் எம்பி பிரக்யா சிங் தாக்கூரும் ஒருவர். இந்த நிலையில், போபாலில் நடைபெற்ற ஒரு மத நிகழ்வில் மீண்டும் சர்ச்சைக்குரிய கருத்தை அவர் தெரிவித்துள்ளார். இதுகுறித்து அவர், “உங்கள் குழந்தையின் நன்மைக்காக, நீங்கள் அவர்களை அடிக்க வேண்டியிருந்தால், தயங்காதீர்கள். பெற்றோர்கள் குழந்தைகளைத் தண்டிக்கும்போது, ​​அவர்கள் சிறந்த எதிர்காலத்திற்காக அவ்வாறு செய்கிறார்கள். ஒரு மகள் பிறந்தவுடன், தாய்மார்கள் மகிழ்ச்சியடைந்து லட்சுமி வீட்டிற்குள் வந்திருப்பதாகச் சொல்கிறார்கள்; அதனால், எல்லோரும் அவர்களை வாழ்த்துகிறார்கள். ஆனால் அவள் வளர்ந்ததும், அவள் வேறொருவரின் மனைவியாக (வேறொரு மதத்தைச் சேர்ந்த) செல்கிறாள்.

அவள் இந்து அல்லாத ஒருவரின் வீட்டிற்குச் சென்றால், அவளுடைய கால்களை உடைப்பதைப் பற்றி சிந்திக்க எந்த முயற்சியும் எடுக்க வேண்டாம். மதிப்புகளுக்குக் கீழ்ப்படியாதவர்கள் மற்றும் பெற்றோரின் பேச்சைக் கேட்காதவர்கள் தண்டிக்கப்பட வேண்டும். உங்கள் குழந்தைகளின் நல்வாழ்வுக்காக நீங்கள் அடிக்க வேண்டியிருந்தால், பின்வாங்க வேண்டாம்” எனத் தெரிவித்துள்ளார்.

மேலும் அவர், “ஒழுங்கைப் பின்பற்றாத, பெற்றோரின் பேச்சைக் கேட்காத, பெரியவர்களை மதிக்காத, வீட்டைவிட்டு ஓடிப்போகத் தயாராக இருக்கும் பெண்கள் மீது பெற்றோர்கள் இன்னும் விழிப்புடன் இருக்க வேண்டும். அவர்களை, உங்கள் வீடுகளைவிட்டு வெளியேற விடாதீர்கள். அடிப்பதன் மூலமோ, அவர்களுக்கு விளக்குவதன் மூலமோ, அவர்களை அமைதிப்படுத்துவதன் மூலமோ, நேசிப்பதன் மூலமோ அல்லது திட்டுவதன் மூலமோ அவர்களைத் தடுக்கவும்” எனத் தெரிவித்துள்ளார்.

சமூக ஊடகங்களில் வைரலாகும் இந்த வீடியோவால் அவர் எதிர்க்கட்சியினரின் விமர்சனத்தையும் சந்தித்துள்ளார். தாக்கூர் வன்முறையைத் தூண்டுவதாகவும் வெறுப்பைப் பரப்புவதாகவும் அவர்கள் குற்றம்சாட்டியுள்ளனர். அவரது கருத்துகளுக்கு பதிலளித்த காங்கிரஸ் செய்தித் தொடர்பாளர் பூபேந்திர குப்தா, "மத்தியப் பிரதேசத்தில் ஏழு வழக்குகளில் மட்டுமே (மத மாற்றம் செய்யப்பட்டதாகக் கூறப்படும்) தண்டனை வழங்கப்பட்டிருக்கும்போது, ​​இவ்வளவு சத்தமும் வெறுப்பும் ஏன் பரப்பப்படுகிறது? இதுபோன்ற சொல்லாட்சிக்கான தேவை என்ன?” என்று அவர் கேள்வி எழுப்பியுள்ளார்.