கர்நாடகா| முடிந்த இரண்டரை ஆண்டு.. மீண்டும் முதல்வர் யுத்தம்? வெடிக்கும் மியூசிகல் ’நாற்காலி’ போட்டி!

2023ஆம் ஆண்டு தேர்தலில் கர்நாடகாவில் காங்கிரஸ் ஆட்சியைப் பிடித்த நிலையில், முதல்வர் பதவிக்காக சித்தராமையா மற்றும் டி.கே.சிவகுமார் இடையே போட்டி ஏற்பட்டது. பின்னர், இருவருக்கும் தலா இரண்டரை ஆண்டுகள் முதல்வர் பதவி வழங்குவதாக கூறி, காங்கிரஸ் மேலிடம் அவர்களை சமாதானம் செய்ததாகக் கூறப்பட்டது. இதையடுத்து, முதல்வராக சித்தராமையா பதவியேற்றார். துணை முதல்வராக டி.கே.சிவகுமார் இருந்து வருகிறார். என்றாலும், கர்நாடகாவில் முதல்வர் மாற்றம் குறித்து பேச்சுகள் அவ்வபோது எழுந்து வருகின்றன. நவம்பர் மாதத்தில் காங்கிரஸ் அரசாங்கம் தனது ஐந்தாண்டு பதவிக்காலத்தின் பாதியை எட்டியுள்ளது, ​​இதனால், மாநிலத்தில் ஆட்சி மாற்றம் பற்றிய பேச்சுகள் மீண்டும் எழுந்துள்ளன. இது சிலரால் ’நவம்பர் புரட்சி’என்று குறிப்பிடப்படுகிறது.

இந்த நிலையில், துணை முதல்வர் டி.கே.சிவகுமாரின் விசுவாசமான எம்.எல்.ஏக்கள் சிலர், டெல்லிக்குப் படையெடுத்து, தலைமையிடம் வலியுறுத்தியதாகத் தெரிகிறது. டெல்லிக்கு சென்றவர்களில் அமைச்சர் என். சாலுவராயசாமி, எம்.எல்.ஏ.க்கள் இக்பால் உசேன், எச்.சி. பாலகிருஷ்ணா, எஸ்.ஆர். ஸ்ரீனிவாஸ், ரவி கனிகா, குப்பி வாசு, தினேஷ் கூலிகவுடா ஆகியோர் அடங்குவர். ஆனால், தற்போதைக்கு இதில் எந்த விவாதமும் செய்யப்படாது என டெல்லி தலைமை பதிலளித்ததாகக் கூறப்படுகிறது.

இதுகுறித்து கருத்து தெரிவித்த முதல்வர் சித்தராமையா, “இரண்டரை ஆண்டுகளுக்குப் பிறகு அமைச்சரவையை மாற்றியமைக்க முடியும் என்று கூறப்பட்ட பிறகுதான், முதலமைச்சரை மாற்றுவது குறித்த பிரச்னை முன்னுக்கு வந்துள்ளது. அமைச்சரவை மாற்றம் குறித்து கட்சித் தலைவர்கள் முடிவெடுக்க வேண்டும். மொத்தம் 34 அமைச்சர் பதவிகள் உள்ளன, அவற்றில் இரண்டு பதவிகள் காலியாக உள்ளன. அமைச்சரவை மறுசீரமைப்பின்போது இந்த காலியாக உள்ள அமைச்சர் பதவிகள் நிரப்பப்படும். நானே, முதலமைச்சராகத் தொடர்வேன்.

நானே பட்ஜெட்டைத் தாக்கல் செய்வேன். ஆரம்பத்தில் இருந்தே இந்த பிரச்னை வலுவாக உள்ளது, தொடர்ந்து அப்படியே இருக்கும். தலைமை மாற்றம் குறித்து ஊடகங்கள் ஏன் மீண்டும் மீண்டும் சந்தேகங்களை எழுப்புகின்றன. காங்கிரஸ் உயர்மட்டக் குழு தன்னை மாற்றுவது குறித்து எதுவும் கூறவில்லை. தலைமை அல்லது அமைச்சரவை மறுசீரமைப்பு குறித்த எந்தவொரு முடிவும் உயர்மட்டக் குழுவால் மட்டுமே எடுக்கப்படும்” எனத் தெரிவித்தார்.

அதேநேரத்தில் இவ்விவகாரம் பதிலளித்த துணை முதல்வர் டி.கே.சிவகுமார், “அதுபற்றி தமக்கு தெரியாது. எனக்கு உடல்நிலை சரியில்லை. எங்கள் கட்சி அவருக்கு (சித்தராமையா) முதலமைச்சராகப் பணியாற்றும் பொறுப்பை வழங்கியதில் நான் மிகவும் மகிழ்ச்சியடைகிறேன். நாங்கள் அனைவரும் ஒன்றாக இணைந்து செயல்படுகிறோம்” எனத் தெரிவித்துள்ளார்.

இதற்கிடையே காங்கிரஸ் தலைவர் மல்லிகார்ஜுனா கார்கே இன்று பெங்களூரு வரவுள்ளார். இதையடுத்து, முதல்வர் சித்தராமையா மைசூரு மற்றும் சாமராஜ்நகருக்கான இரண்டு நாள் சுற்றுப்பயணத்தை திடீரென ரத்து செய்துவிட்டு அவரும் பெங்களூரு திரும்புகிறார். இதனால், முதல்வர் மாற்றம் குறித்து இன்று ஆலோசிக்கப்படும் என தகவல்கள் தெரிவிக்கின்றன.