கர்நாடகா: கார் மீது சரக்கு வாகனம் மோதிய விபத்து – கோயிலுக்குச் சென்ற 4 பேர் உயிரிழந்த சோகம்

செய்தியாளர்: ம.ஜெகன்நாத்

கர்நாடக மாநிலம் கலபுர்கி மாவட்டத்தில் கார் மீது சரக்கு வாகனம் மோதிய விபத்தில், காரில் பயணம் செய்த 4 பேர் சம்பவ இடத்திலேயே பரிதாபமாக உயிரிழந்தனர். தகவல் அறிந்து சம்பவ இடத்திற்கு வந்து கமலாப்பூர் போலீசார், இறந்தவர்களின் சடலங்களை மீட்டு பிரேத பரிசோதனைக்காக அரசு மருத்துவமனைக்கு அனுப்பி வைத்தனர். மேலும் படுகாயமடைந்த சரக்கு வாகன ஓட்டுனரை மீட்டு சிகிச்சைகாக மருத்துவமனையில் சேர்த்துள்ளனர்.

இதைத் தொடர்ந்து போலீசார் நடத்திய விசாரணையில், ஹைதராபாத்தைச் சேர்ந்த பார்கவ கிருஷ்ணா (55), சங்கீதா (45), உத்தம் ராகவன் (28) மற்றும் கார் ஓட்டுநர் ஆகிய நால்வரும் உயிரிழந்தது தெரியவந்துள்ளது.

இவர்கள் கானகாபுரில் உள்ள ஸ்ரீ தத்தாத்ரேயா கோயிலுக்குச் சென்று கொண்டிருந்த போது இந்த விபத்து ஏற்பட்டதும் தெரிய வந்துள்ளது. இந்த சம்பவம் அப்பகுதியில் பரபரப்பை ஏற்படுத்தியுள்ளது.