`விக்ஸை தான் சுத்தி சுத்தி எழுதி...' பரபரப்பு ஓகே, ஆனால் கதை? | The Family Man 3 Review | Raj & DK

ஸ்ரீகாந்த் திவாரியின் மீது தேச துரோகி பழி விழ, அதன் பின் என்ன ஆகிறது என்பதே `Family Man Season 3'

நாகலாந்தில் உள்ள கிளர்ச்சி குழுக்களுடன் அமைதி பேச்சு வார்த்தை நடத்தி, அவர்களின் வாழ்வை மேம்படுத்துவதாக உறுதி கொடுக்கிறார் பிரதமர் பாசு (சீமா பிஸ்வாஸ்). தன் மக்களின் முன்னேற்றத்தை விரும்பும் டேவிட் குஸோ (சுனில் தபா) அதற்கு சம்மதிக்கிறார். இந்த சூழலில் நாகாலாந்தின் பல பகுதிகளில் குண்டு வெடிப்பு நிகழ்கிறது. இதற்கு காரணம் சீனா தான் என அவர்களுக்கு எதிர்ப்பை பதிவு செய்யும் விதமாக, அவர்களது செயலிகளை இந்தியாவில் தடை செய்கிறார் பிரதமர். அதே நேரம் நாகாலாந்துடன் செய்துள்ள அமைதி ஒப்பந்தம் குலையாமல் இருக்க, டேவிடை சந்திக்க செல்கிறார்கள் கௌதம் குல்கர்னி (தலித் தஹில்) மற்றும் ஸ்ரீகாந்த் திவாரி (மனோஜ் பாஜ்பாய்).

டேவிட் அரசாங்கத்தை நம்பினாலும், அவரது பேரன் ஸ்டீபனுக்கு (பாலின் கபாக்) அதில் உடன்பாடில்லை. எனவே அவர் தனது MCA-S குழுவுடன் போராட்டத்துக்கு தயாராகிறார். இந்த சூழலில் டேவிட், குல்கர்னி சந்திப்பின் போது MCA-S போராளிகளின் உடையணிந்து வந்த சிலர் துப்பாக்கி சூட்டை நிகழ்த்த அதில் டேவிட் மற்றும் குல்கர்னி இறந்து போகிறார்கள். ஸ்ரீகாந்த் திவாரி குண்டடிபட்டு மருத்துவமனையில் சேர்க்கப்படுகிறார். ஒரு பக்கம் இந்தக் கொலைப்பழி MCA-S தலைவர் ஸ்டீபன் மீது விழ, இன்னொரு பக்கம் அரசாங்கம் ஸ்ரீகாந்த் திவாரி மீதும் சந்தேகப்பார்வையை வீசுகிறது.

உண்மையில் நடந்தது என்ன? யார் இந்த தாக்குதலுக்கு காரணம் என்பதை எல்லாம் சொல்வதே Family Man சீசன் 3.

வழக்கம் போல இந்த முறையும் விறுவிறுப்பான தொடர் ஒன்றை கொடுத்திருக்கிறது ராஜ் & டிகே கூட்டணி. ஒவ்வொரு எப்பிசோடும் எங்கும் தொய்வில்லாமல் பரபரப்பாகவே நகர்கிறது.

மனோஜ் பாஜ்பாய் வழக்கம் போல, உர் என மூஞ்சியை வைத்துக் கொள்வதை இதிலும் தொடர்கிறார். ஆங்காங்கே எமோஷனல் காட்சிகளில், அடுத்து என்ன செய்வது என தெரியாமல் குழம்பும் காட்சிகளில் சிறப்பான நடிப்பை கொடுக்கிறார். ஜேகே தாப்டே பாத்திரத்தில் ஷரீப் ஹாஸ்மி தான் இந்த சீஸனின் ரிலாக்ஸ் மோடுக்கு உதவுகிறார். அவரின் குட்டி குட்டி கலாட்டாக்கள் ரசிக்க வைக்கிறது. மற்ற படி இந்த முறை ப்ரியாமணி, ஸ்ரேயா தன்வந்திரி, சீமா பிஸ்வாஸ், குல் பனங், ஆதித்யா என ஒவ்வொரு பாத்திரங்களும் மிக சீரியஸாகவே வந்து போகிறார்கள்.

ரசிக்க வைத்த விஷயங்கள் என்றால், ஒரு வழியாக ஸ்ரீகாந்த் - சுசித்ரா விவாகரத்து செய்ய போவதை தங்கள் குடும்பத்திடம் தெரிவித்துவிட்டார்கள். இனியும் இதைவைத்து இழுத்தடிக்க மாட்டார்கள் என்பது ஒரு ஆறுதல். அடுத்தது உண்மையிலேயே ஓரளவு சுவாரஸ்யமாக இருந்தது, வில்லனாக வரும் ஜெய்தீப் அல்வத் மற்றும் ஒரு சிறுவனுக்கு இடையேயான உறவை வைத்து வரும் காட்சிகள் கலங்க வைப்பதாக இருந்தது.

மற்றபடி இந்த சீசன் முழுக்கவே ஒரு ஃபில்லர் போல தான் இருந்தது. இந்த சீசனில் நடந்தது என்ன என்றால் எதுவுமே இல்லை. கதை ஆரம்பித்த போது என்ன நிலையில் ஸ்ரீகாந்த் இருந்தாரோ முடியும் போதும் கிட்டத்தட்ட அப்படியே தான் இருக்கிறார். மேலும் சீரிஸ் முழுக்க அவர் செய்தது அவர் கண்டுபிடித்தது, அவரது புத்திசாலித்தனம் என்று ஒரு விஷயம் கூட இல்லை என்பது பெரிய ஏமாற்றம். எளிதில் யூகிக்க முடிகிற வில்லன்கள், சுலபமாக கண்டுபிடிக்க முடிகிற திருப்பங்கள் என பார்வையாளரை ஆர்வமாக்கும் எந்த விஷயமும் நிகழவில்லை. மேலும் இதில் வரக்கூடிய துப்பாக்கி சூடுகள், கார் சேஸ்களையும், சண்டைகளையும் கழித்துவிட்டால் இரண்டே எபிசோடில் மொத்த கதையும் முடிந்திருக்கும். `விக்ஸை தான் சுத்தி சுத்தி எழுதியிருக்கேன்' என்பது மாதிரி, தேவையே இல்லாமல் 7 எப்பிசோடுகளும் 50+ நிமிடங்கள் ஓடுகிறது. இந்த தொடரின் மிகப்பெரிய மைனஸ், அஸ்சுவாரஸ்யமான கதையை நீட்டி நீட்டி சொன்னதுதான்.

இந்தக் கதைக்குள் ஸ்ரீகாந்த் மகளை சமூக வலைதளத்தில் கிண்டல் செய்வது, மகனை பள்ளியில் கிண்டல் செய்வது, வில்லன் ஜெய்தீப் - நிம்ரத் இடையேயான உரையாடல்கள் என மைய கதைக்கு சம்பந்தமே இல்லாமல் பல விஷயங்கள் வருகின்றன. அவற்றை அப்படியே தூக்கி எறிந்திருக்கலாம். இதுமட்டுமா சம்மந்தமே இல்லாமல் இரண்டு நடிகர்களின் கேமியோ வேறு. இத்தனை இருந்தும் சீரிஸ் சிறப்பான ஒன்றாக மாறவில்லை என்பதுதான் சோகம். இந்த சீசனின் முதல் எபிசோடில் இருந்த அளவுக்கான கதை, அடுத்த எந்த எபிஸோடிலும் இல்லை. ஏனோ தானோவென செல்கிறது திரைக்கதை.

சீரியலில் `கட் பண்ணிட்டு தொடரும்னு போட்டுட்டான்' என்பது போல, இந்தக் கதையையும் பாதியில் நிறுத்தி முடித்திருக்கிறார்கள். Family Manன் முதல் இரண்டு சீசன்களும், எடுத்த மிஷனின் முடிவு வரை செல்வது ஒரு நிறைவை கொடுத்தன. ஆனால் அது இல்லை என்பது இந்த மூன்றாவது சீஸனின் பெரிய குறை. அடுத்த சீசனிலாவது இந்தக் குறைகளை சரி செய்வார்களா என பொறுத்திருந்து பார்ப்போம். இப்போதைக்கு இந்த சீசனை பற்றி சொல்ல வேண்டும் என்றால், மிக மிக சுமாரான ஒரு சீசன்.