பிரிட்டனின் மூன்று அணு ஆயுத நீர்மூழ்கிக் கப்பல்கள் ஒரே நேரத்தில் கடலில் இருப்பது சர்வதேச கவனத்தை ஈர்த்துள்ளது. இது எதிரிகளுக்கு எச்சரிக்கையாக இருக்கலாம் என நிபுணர்கள் கருதுகின்றனர். இந்த நடவடிக்கை வழக்கத்திற்கு மாறானது என்றும் தகவல்கள் தெரிவிக்கின்றன.
செய்தியாளர் - M.மீரா
பிரிட்டனின் அணு ஆயுதங்களை ஏந்திச் செல்லும் 4 நீர்மூழ்கிக் கப்பல்களில் 3 கப்பல்கள் ஒரே நேரத்தில் கடலில் இருப்பதாகப் பல்வேறு ஊடகங்கள் செய்தி வெளியிட்டுள்ளன. கடந்த 7 ஆண்டுகளில் இதுபோன்ற நடவடிக்கை முதல்முறையாக நடந்துள்ளதாகக் கூறப்படுவதால், சர்வதேச அளவில் கவனம் பெற்றுள்ளது.
இந்த 3 நீர்மூழ்கிக் கப்பல்களும் கடலுக்குச் சென்றதற்கான காரணம் இன்னும் அதிகாரப்பூர்வமாக அறிவிக்கப்படவில்லை. பிரிட்டனின் தி டைம்ஸ் நாளிதழ் முதலில் இந்தத் தகவலை வெளியிட்டது. இந்த நடவடிக்கை வழக்கத்திற்கு மாறானது என்று பெயர் குறிப்பிடாத ஒரு வட்டாரம் தெரிவித்துள்ளது. வான்கார்டு (Vanguard) வகையைச் சேர்ந்த ஒரு நீர்மூழ்கிக் கப்பல், அடுத்த ரோந்துப் பணியை ஏற்கத் தயாராகி வரக்கூடும் என்று பாதுகாப்புத் துறை நிபுணர் ஒருவர் தெரிவித்துள்ளார். மூன்றாவது கப்பல் கடல் சோதனைகளில் ஈடுபட்டிருக்கலாம் என்றும் அவர் கூறியுள்ளார்.
பிரிட்டனின் அணு ஆயுதத் தடுப்பு நடவடிக்கையில் டிரைடென்ட் (Trident) நீர்மூழ்கிக் கப்பல்கள் முக்கியப் பங்கு வகிக்கின்றன. நாட்டின் பாதுகாப்பை உறுதி செய்வதற்காக, குறைந்தபட்சம் ஒரு அணு ஆயுத நீர்மூழ்கிக் கப்பல் எப்போதும் கடலில் ரோந்துப் பணியில் இருப்பது வழக்கம். இதன் மூலம் எதிரிகள் அணு ஆயுதத் தாக்குதல் நடத்தினாலும், பிரிட்டன் பதிலடி கொடுக்கும் திறனைத் தக்கவைத்துக் கொள்கிறது.
ஆனால், ஒரே நேரத்தில் மூன்று நீர்மூழ்கிக் கப்பல்கள் கடலில் இருப்பது வழக்கமான நடைமுறை அல்ல. இந்த நடவடிக்கை பிரிட்டனின் எதிரிகளையும் நேட்டோ (NATO) கூட்டணி நாடுகளையும் கவனிக்க வைக்கும் என்று செய்திகள் தெரிவிக்கின்றன.
இதற்கிடையில், நான்காவது நீர்மூழ்கிக் கப்பலான எச்எம்எஸ் விக்டோரியஸ் (HMS Victorious), டெவன்போர்ட் கடற்படைத் தளத்தில் பராமரிப்புப் பணிகளில் ஈடுபட்டுள்ளது என்று கூறப்படுகிறது.
இந்த விவகாரம் குறித்து பிரிட்டன் பாதுகாப்புத் துறை செய்தித் தொடர்பாளர் கூறுகையில், நாட்டின் அணு ஆயுதத் தடுப்பு அமைப்பு தேசியப் பாதுகாப்பின் அடித்தளம் என்றும், பிரிட்டன் மற்றும் நேட்டோ கூட்டணி நாடுகளின் பாதுகாப்பை உறுதி செய்வதில் அது முக்கியப் பங்கு வகிப்பதாகவும் தெரிவித்துள்ளார்.
மேலும், ஐரோப்பாவில் தனது அணு ஆயுதத் தடுப்பு அமைப்பை நேட்டோவின் பாதுகாப்புக்காக அர்ப்பணித்துள்ளதாக உறுதியளித்துள்ள ஒரே கூட்டணி நாடு பிரிட்டன் என்றும் அவர் குறிப்பிட்டுள்ளார்.