சென்னை மாநகராட்சி தூய்மைப் பணிகளை தனியாரிடம் ஒப்படைப்பதை எதிர்த்து, ரிப்பன் மாளிகையின் முன்பு கடந்த ஆகஸ்ட் மாதம்-1 ஆம் தேதி முதல் ”தங்களின் பணிகளை தனியாரிடம் ஒப்படைக்கக் கூடாது; திமுக அளித்த தேர்தல் வாக்குறுதியின் பணி நிரந்தரம் செய்ய வேண்டும்” உள்ளிட்ட கோரிக்கைகளை வலியுறுத்தி தூய்மைப் பணியாளர்கள் இரவு பகலாக போராட்டம் நடத்தினர். தொடர்ச்சியான 13-வது போராட்ட நாளன்று தமிழக காவல்துறையினர் தூய்மைப் பணியாளர்களை வலுக்கட்டாயமாக கைது செய்தனர். ஆனாலும், தூய்மைப் பணியாளர்களின் கோரிக்கைகளை தமிழக அரசு இன்னும் நிறைவேற்றவில்லை.
இதனையடுத்து, சென்னை மாநகராட்சியின் 5 மற்றும் 6 ஆவது மண்டல தூய்மை பணியாளர்களுக்கு மீண்டும் 31.7.2025 தேதியில் வழங்கப்பட்ட ஊதிய பணி நிலைமையிலேயே மீண்டும் பணி வழங்க வேண்டுமெனவும், தமிழக முதலமைச்சர் தலையிட்டு பிரச்சனைக்கு தீர்வு காண வலியுறுத்தியும் தூய்மைப் பணியாளர்கள் உண்ணாவிரத போராட்டத்தில் ஈடுபட்டனர். நீதிமன்றத்தில் உத்தரவு பெற்று அம்பத்தூரில் உள்ள உழைப்போர் உரிமை இயக்க தலைமை அலுவலகத்தில் கடந்த 17-ஆம் தேதி முதல் தொடங்கிய இந்த கால வரையற்ற உண்ணாவிரத போராட்டத்தில் ஜெனோவா, பாரதி, கீதா, வசந்தி நான்கு பெண் தூய்மை பணியாளர்கள் ஈடுபட்டனர்.
நேற்று, 13ஆவது நாளில் உண்ணாவிரத போராட்டத்தில் இருந்த நான்கு பேரில் ஜெனோவாவிற்கு உடல்நிலை மோசமடைந்தது. அவர் 108 ஆம்புலன்ஸ் உதவி மூலம் கீழ்பாக்கம் அரசு மருத்துவமனைக்கு சிகிச்சைக்காக அனுப்பி வைக்கப்பட்டார். இதனையடுத்து 3 பெண் தூய்மைப் பணியாளர்கள் உண்ணாவிரத போராட்டத்தை தொடர்ந்தனர்.
இந்நிலையில், 14 ஆவது நாளான இன்று உண்ணாவிரதப் போராட்டத்தில் இருந்த மூன்று தூய்மை பணியாளர்களில் பாரதி-க்கு உடல்நிலை பாதிப்படைந்தது. இதில் பாரதி மயங்கிய நிலையில் அவரையும் 108 ஆம்புலன்ஸ் உதவியுடன் சிகிச்சைக்காக மருத்துவமனைக்கு அனுப்பி வைத்தனர். இத்தகைய சூழலில், மீதமுள்ள இரண்டு பெண் தூய்மை பணியாளர்கள் மட்டுமே தங்களது உண்ணாவிரத போராட்டத்தை தற்போது தொடர்ந்து வருகின்றனர்.