அதிமுகவில் இருந்து நீக்கப்பட்ட முன்னாள் அமைச்சர் செங்கோட்டையன், தவெகவில் இணைந்தது அரசியல் வட்டாரத்தில் பரபரப்பை ஏற்படுத்தியுள்ளது. விசிக தலைவர் திருமாவளவன், இது பாஜகவின் சித்து விளையாட்டுகளில் ஒன்றா என்ற கேள்வி எழுப்பி, அதிமுக-பாஜக உறவுகள் மற்றும் எடப்பாடி-செங்கோட்டையன் இடையிலான பிரச்சனைகள் குறித்து சந்தேகம் தெரிவித்தார்.
அதிமுகவில் இருந்து நீக்கப்பட்ட முன்னாள் அமைச்சர் செங்கோட்டையன், தனது சட்டமன்ற உறுப்பினர் பதவியை ராஜினாமா செய்து விட்டு கடந்த நவம்பர் 27ஆம் தேதி தவெக தலைவர் விஜய் முன்னிலையில், தவெகவில் இணைந்தார். தொடர்ந்து அவருக்கு, தவெக நிர்வாகக் குழு தலைமை ஒருங்கிணைப்பாளர் பதவி கொடுக்கப்பட்டது. இதையடுத்து செங்கோட்டையன், நேற்று அவரது சொந்த மாவட்டமான ஈரோடுக்கு திரும்பினார். அப்போது, அவருக்கு தவெக தொண்டர்களால் உற்சாக வரவேற்பு அளிக்கப்பட்டது.
இந்நிலையில், இன்று செய்தியாளர்களை சந்தித்த விசிக தலைவர் திருமாவளவன் செங்கோட்டையன் தவெகவில் இணைந்தது குறித்துக் கருத்து தெரிவித்துள்ளார். இது குறித்து அவர் பேசுகையில், ”செங்கோட்டையன் அதிமுகவில் மூத்த தலைவர். அவர், அதிமுகவில் இருந்து பிரிந்தது அந்தக் கட்சிக்கு சாதகமானதல்ல. தவெக-வில் செங்கோட்டையன் இணைந்தது அவரது சொந்த விருப்பம். அதில், நான் கருத்து தெரிவிக்க விரும்பவில்லை.
ஆனால், எல்லா பிரச்சனைகளிலும் தலையிடும் பாஜக; இந்த விஷயத்தில் ஏன் தலையிடவில்லை. அதிமுகவை கட்டுக்கோப்பாக வைத்துக் கொள்ள பாஜக ஏன் முயச்சிக்கவில்லை? என பல கேள்விகள் எழுகின்றன. மேலும், செங்கோட்டையன் தவெகவுக்கு சென்றதற்கு காரணம் எடப்பாடி பழனிசாமிக்கும் அவருக்கும் நடந்த பிரச்சனை தான் காரணமா அல்லது பாஜக நடத்திய “சித்து விளையாட்டுகளில் ஒன்றா” என்ற கேள்வி எழுகிறது” எனத் தெரிவித்தார்.
தொடர்ந்து பேசிய அவர், குளிர்காலக் கூட்டத் தொடர் விரைவில் துவங்க உள்ளது. இந்நிலையில், வாக்காளர் பட்டியல் சிறப்புத் திருத்தம் (SIR) குறித்து எதிர்க்கட்சிகள் கேள்வி எழுப்பி, அவை நடவடிக்கைகளை ஒத்திவைக்க வாய்ப்பு உள்ளதாக தெரிவித்தார். தொடர்ந்து, 12 மாநிலங்களில் மேற்கொள்ளப்பட்டுள்ள SIR நடவடிக்கைகள் மீதான சந்தேகங்களை முன்னிட்டு பாராளுமன்றத்தில் விவாதம் தீவிரமாகும் எனவும் அவர் பேசினார்.