செய்தியாளர்: செ.சுபாஷ்
மதுரை விமான நிலையம், கடந்த அக்டோபர் 1 ஆம் தேதி 24 மணி நேரமும் செயல்படும் என மத்திய அரசு அறிவித்திருந்தது. இந்நிலையில், அதன் முதல் கட்டமாக வருகிற டிசம்பர் 20ஆம் தேதி முதல் இரவு 10:45 மணிக்கு, மதுரையில் இருந்து சென்னை இண்டிகோ விமானம் புறப்படும் என்ற அறிவிப்பு வந்துள்ளது.
ஏற்கெனவே சென்னையில் இருந்து 8:45 மணிக்கு மதுரைக்கு வந்த விமானம், மீண்டும் மதுரையிலிருந்து 9 மணிக்கு கடைசி விமானமாக சென்றது. தற்போது சென்னையிலிருந்து 9:25 மணிக்கு புறப்பட்ட விமானம், இரவு 10:20 மணிக்கு மதுரை விமான நிலையம் வந்தடைந்தது. பின்னர் மீண்டும் பயணிகளுடன் 10:45க்கு மதுரை விமான நிலையத்திலிருந்து புறப்பட்டு 12:05 மணிக்கு சென்னைக்கு சென்றடையும் என தெரிவிக்கப்பட்டுள்ளது.
இதன் மூலம் மதுரை மக்கள் இரவு நேரத்திலும் சென்னைக்கு விமானத்தில் பயணிக்க வாய்ப்பு ஏற்பட்டுள்ளது. இதனால் தென் தமிழக மக்கள் பெரிதும் மகிழ்ச்சியடைந்துள்ளனர்.