வங்கக்கடலில் உருவான டிட்வா புயல், 7 கி.மீ வேகத்தில் நகர்ந்துவந்த நிலையில், தற்போது மணிக்கு 5 கி.மீ வேகத்தில் நகர்கிறது.
தென்மேற்கு வங்கக்கடலில் உருவான டிட்வா புயலானது, தற்போது சென்னையில் இருந்து 170 கி.மீ தொலைவில் மையம் கொண்டுள்ளது. இந்த புயல் இன்று மாலைக்குள், தமிழ்நாடு-புதுச்சேரி கடற்கரையில் இருந்து தென்மேற்கு வங்கக் கடலில் குறைந்தது 30 கி.மீ தூரத்திற்குள் மையம் கொண்டிருக்கும் என வானிலை ஆய்வு மையம் தகவல் தெரிவித்து உள்ளது. அதேநேரத்தில், 7 கி.மீ வேகத்தில் நகர்ந்துவந்த இப்புயல், தற்போது மணிக்கு 5 கி.மீ வேகத்தில் நகர்கிறது. இதனால், தற்போதைக்கு தமிழ்நாட்டு நிலப்பகுதிக்குள் டிட்வா புயல் நுழைய வாய்ப்பில்லை என வானிலை ஆய்வு மையம் கணித்துள்ள நிலையில், தமிழ்நாட்டு கடற்கரையில் இருந்து 25 முதல் 50 கி.மீ தூரத்தில் கடலுக்குள்ளேயே தொடர்ந்து பயணிக்கிறது.
இருப்பினும் புயல் கரைக்கு வராவிட்டாலும் தமிழகத்தில் மழைக்கு வாய்ப்பிருப்பதாகத் தெரிவிக்கப்பட்டுள்ளது. இப்புயல், இந்திய கடற்கரையை நெருங்கி வருவதால், தமிழ்நாடு, ஆந்திரா மற்றும் புதுச்சேரியின் சில பகுதிகளில் ஏற்கெனவே கனமழை பெய்து வருகிறது. முன்னதாக இப்புயல் காரணமாக திருவள்ளூர், ராணிப்பேட்டை மாவட்டங்களுக்கு இன்று ரெட் அலர்ட் விடுக்கப்பட்டுள்ளது. அதேபோல காஞ்சிபுரம், வேலூர், திருப்பத்தூர், தருமபுரி, கிருஷ்ணகிரி உள்பட 9 மாவட்டங்களுக்கு ஆரஞ்சு அலர்ட் விடுக்கப்பட்டுள்ளது. புயல் காரணமாக தமிழகத்தில் கடலூர், ராமேஸ்வரம், வேதாரண்டயம், நாகை, மாமல்லபுரம் உள்ளிட்ட கடற்பகுதிகளில் கடல் சீற்றம் அதிகமாகி உள்ளது. சென்னையிலும் மெரினா, எண்ணூர், காசிமேடு போன்ற கடற்கரைகளிலும் கடல் சீற்றம் அதிகமாக காணப்படுகிறது. இதன் காரணமாக கடலோரப் பகுதிகளுக்கு மக்கள் செல்ல வேண்டாம் என அறிவுறுத்தப்பட்டுள்ளது.