டிட்வா புயலால் இலங்கையில் நிலச்சரிவு, வெள்ளம் போன்ற பேரழிவுகள் ஏற்பட்டு 123 பேர் உயிரிழந்துள்ளனர். 25 மாவட்டங்கள் பாதிப்புக்குள்ளாகி, ஆயிரக்கணக்கானோர் தற்காலிக முகாம்களில் தங்கவைக்கப்பட்டுள்ளனர். விமான சேவைகள் நிறுத்தப்பட்டதால், கொழும்பு விமான நிலையத்தில் 150 தமிழர்கள் உட்பட நூற்றுக்கணக்கானோர் அடிப்படை வசதிகள் இன்றி சிக்கித் தவிக்கின்றனர்.
தென்மேற்கு வங்கக்கடலில் உருவாகி இருக்கும் டிட்வா புயலானது இலங்கையில் ஒரு பேரழிவின் பாதையை ஏற்படுத்தியுள்ளது.. கடந்த சில நாட்களாக டிட்வா புயலின் தாக்கத்தால் மிகப்பெரிய மழைபொழிவை சந்தித்த அண்டை நாடான இலங்கையில், நிலச்சரிவு, வெள்ளப்பெருக்கு போன்றவற்றால் 123 பேர் இதுவரை உயிரிழந்திருப்பதாகவும், 130 பேர் காணாமல் போயிருப்பதாகவும் தகவல்கள் தெரிவிக்கின்றன..
இந்தியா ’ஆபரேஷன் சாகர் பந்து’வின் கீழ், கப்பலில் இலங்கைக்கு நிவாரணப் பொருட்களை வழங்கிவரும் நிலையில், தற்போதைய பாதிப்பு நிலைவரங்களின் படி, நாட்டின் 25 மாவட்டங்களும் பாதிப்புக்குள்ளாகியுள்ளதுடன் 102,877 குடும்பங்களைச் சேர்ந்த 373,428 பேர் பாதிக்கப்பட்டுள்ளனர். மேலும் பாதிக்கப்பட்டவர்கள் தற்போது 488 தற்காலிக முகாம்களில் தங்கவைக்கப்பட்டுள்ளனர்.
இலங்கையில் நிலவிவரும் மோசமான வானிலை காரணமாக கடந்த சில தினங்களாக விமானசேவைகள் நிறுத்திவைக்கப்பட்டுள்ளன..
இந்தசூழலில் துபாயில் இருந்து இலங்கை வழியாக இந்தியா வரவிருந்த 150 தமிழர்கள் உட்பட 300 பேர் இலங்கையின் கொழும்பு விமான நிலையத்தில் சிக்கித்தவித்து வருகின்றனர்.. டிட்வா புயல் காரணமாக சென்னைக்கு விமானங்கள் இயக்கப்படாததால் 3 நாட்களாக உணவு உள்ளிட்ட அடிப்படை வசதிகள் கூட இல்லாமல் பயணிகள் தவித்து வருகின்றனர்.
இந்நிலையில் இலங்கையில் சிக்கியுள்ள தமிழர்களை பாதுகாப்பாக அழைத்துவர நடவடிக்கை எடுக்கப்படும் எனவும், இலங்கையில் மின்சாரம் துண்டிக்கப்பட்டுள்ளதால் பலரை தொடர்பு கொள்ள முடியவில்லை எனவும் அமைச்சர் நாசர் தெரிவித்துள்ளார்..