டிட்வா புயல்| சென்னை, மதுரையில் மொத்தம் 66 விமானங்கள் இன்று ரத்து!
தென்மேற்கு வங்கக்கடலில் உருவான டிட்வா புயல் சென்னைக்கு தெற்கே 400 கி.மீ தொலைவில் நகர்ந்து, தமிழகத்தில் பல மாவட்டங்களுக்கு ரெட் மற்றும் ஆரஞ்சு எச்சரிக்கை விடுக்கப்பட்டுள்ளது. மோசமான வானிலை காரணமாக சென்னை, மதுரை விமான நிலையங்களில் மொத்தம் 66 விமான சேவைகள் இன்று ரத்து செய்யப்பட்டுள்ளன.
தென்மேற்கு வங்கக்கடலில் உருவாகி இருக்கும் டிட்வா புயலானது, தற்போது சென்னைக்கு தெற்கே 400 கிலோ மீட்டர் தொலைவில் நிலை கொண்டுள்ளதாகவும், புயல் தற்போது 7 கி.மீ. வேகத்தில் நகர்ந்துவருவதாகவும் வானிலை ஆய்வு மையம் தெரிவித்துள்ளது.
இந்தசூழலில் டிட்வா புயல் எச்சரிக்கையாக தமிழகத்தில் 4 மாவட்டங்களில் ரெட் அலெர்ட்டும், 14 மாவட்டங்களில் ஆரஞ்சு அலெர்ட்டும் விடுக்கப்பட்டுள்ளது..
இந்நிலையில் சென்னை மற்றும் மதுரை விமான நிலையங்களில் இன்றைய 66 விமான சேவைகள் ரத்துசெய்யப்பட்டதாக அறிவிப்பு வெளியாகியுள்ளது..
மொத்தம் 66 விமான சேவைகள் ரத்து..
மதுரை - டிட்வா புயலால் ஏற்பட்டுள்ள மோசமான வானிலை காரணமாக மதுரைக்கு இயக்கப்படும் 12 விமானங்கள் ரத்துசெய்யப்பட்டுள்ளதாக தெரிவிக்கப்பட்டுள்ளது..
சென்னை, பெங்களூரு, மும்பையில் இருந்து மதுரைக்கு இயக்கப்படும் 11 சிறிய விமானங்களும், ஹைதராபாத்திலிருந்து மதுரைக்கு இயக்கப்படும் 1 பெரிய விமானமும் ரத்துசெய்யப்பட்டுள்ளது.
சென்னை - டிட்வா புயல் மற்றும் அதிகனமழை காரணமாக நவம்பர் 29ஆம் தேதியான இன்று சென்னையிலிருந்து இயக்கப்படும் மற்றூம் வருகை தரும் 54 விமானங்கள் ரத்துசெய்யப்பட்டுள்ளதாக தெரிவிக்கப்பட்டுள்ளது
