Jaiswal & KL rahul AI generated image
விளையாட்டு

நியூசிலாந்தில் புதிய வரலாறு படைத்த ஜெய்ஸ்வால் - கே.எல்.ராகுல்

21 ஆண்டுகால சாதனையை உடைத்த ஜெய்ஸ்வால் - ராகுல் ஜோடி... நியூசிலாந்தில் புதிய வரலாறு!

PT WEB

செய்தியாளர் - M.மீரா

நியூசிலாந்துக்கு எதிரான முதல் டெஸ்ட் போட்டியில் இந்திய அணியின் தொடக்க வீரர்களான யஷஸ்வி ஜெய்ஸ்வால் மற்றும் கே.எல்.ராகுல் புதிய சாதனை படைத்துள்ளனர். 21ஆம் நூற்றாண்டில் நியூசிலாந்து மண்ணில் இந்திய தொடக்க வீரர்கள் முதல் முறையாக 100 ரன்களுக்கு மேல் பார்ட்னர்ஷிப் அமைத்து வரலாறு படைத்துள்ளனர்.

வெலிங்டனில் நடைபெற்று வரும் இந்த டெஸ்ட் போட்டியில் முதலில் பேட்டிங் செய்த நியூசிலாந்து அணி, ஹென்றி நிக்கோல்ஸ் (175*) மற்றும் கிளென் பிலிப்ஸ் (118) ஆகியோரின் அபார சதங்களால் முதல் இன்னிங்ஸில் 368 ரன்கள் குவித்தது. இந்திய அணியின் பந்துவீச்சில் ஜஸ்பிரித் பும்ரா 4 விக்கெட்டுகளையும், ஆகாஷ் தீப் 3 விக்கெட்டுகளையும் வீழ்த்தினர்.

Jadeja

இதையடுத்து முதல் இன்னிங்ஸைத் தொடங்கிய இந்திய அணிக்கு ஜெய்ஸ்வால் - கே.எல்.ராகுல் ஜோடி சிறப்பான தொடக்கம் கொடுத்தது. இருவரும் நியூசிலாந்து பந்துவீச்சைத் திறம்பட எதிர்கொண்டு ரன்களைக் குவித்தனர். குறிப்பாக ஜெய்ஸ்வால் அதிரடியாக விளையாடி 85 பந்துகளில் 16 பவுண்டரிகளுடன் 85 ரன்கள் எடுத்தார். மறுபுறம் நிதானமாக விளையாடிய கே.எல்.ராகுலும் அரைசதம் அடித்தார்.

இந்த ஜோடி முதல் விக்கெட்டுக்கு 130 ரன்கள் சேர்த்தது. இதன் மூலம் 21ஆம் நூற்றாண்டில் நியூசிலாந்து மண்ணில் இந்திய தொடக்க வீரர்கள் அமைத்த அதிகபட்ச பார்ட்னர்ஷிப் என்ற சாதனையைப் படைத்தனர்.

இதற்கு முன்பு 2009ஆம் ஆண்டு இதே வெலிங்டனில் வீரேந்திர சேவாக் - கௌதம் கம்பீர் ஜோடி 73 ரன்கள் சேர்த்ததே அதிகபட்சமாக இருந்தது. மேலும், நியூசிலாந்து மண்ணில் இந்திய தொடக்க வீரர்கள் 100 ரன்களுக்கு மேல் பார்ட்னர்ஷிப் அமைப்பது 1994ஆம் ஆண்டுக்குப் பிறகு இதுவே முதல்முறையாகும்.

Jaiswal

ஜெய்ஸ்வால் ஆட்டமிழந்த பிறகு கே.எல்.ராகுலுடன் தேவ்தத் படிக்கல் இணைந்து விளையாடினார். இரண்டாம் நாள் ஆட்டநேர முடிவில் இந்திய அணி ஒரு விக்கெட் இழப்புக்கு 159 ரன்கள் எடுத்துள்ளது. கே.எல்.ராகுல் 52 ரன்களுடனும், படிக்கல் 15 ரன்களுடனும் களத்தில் உள்ளனர்.

நியூசிலாந்தின் முதல் இன்னிங்ஸ் ஸ்கோரை எட்ட இந்திய அணி இன்னும் 209 ரன்கள் எடுக்க வேண்டியுள்ளது.