மெல்போர்ன் மைதானத்தில் நடந்த 4வது டெஸ்ட் போட்டியில், இங்கிலாந்து வேகப்பந்துவீச்சாளர் ஜோஷ் டங் 5 விக்கெட்டுகளை வீழ்த்தி 21ஆம் நூற்றாண்டில் முதல் சாதனையை படைத்தார். ஆஸ்திரேலியா 152 ரன்களில் ஆல் அவுட் ஆனது. இங்கிலாந்து அணி வெற்றியை நோக்கி முன்னேறுகிறது.
ஆஸ்திரேலியாவிற்கு எதிரான 5 போட்டிகள் ஆஷஸ் தொடரில் முதல் 3 போட்டியில் தோற்று தொடரை இழந்தது இங்கிலாந்து அணி. தொடரை தான் இழந்தாச்சு, கடந்த 15 ஆண்டுகளாக ஆஸ்திரேலியா மண்ணில் ஒரு போட்டியில் கூட வென்றதில்லை என்பதையாவது முறியடிக்குமா இங்கிலாந்து என்ற எதிர்ப்பார்ப்பு இருந்துவருகிறது.
இந்நிலையில் இரண்டு அணிகளுக்கும் இடையேயான 4வது டெஸ்ட் போட்டி மெல்போர்ன் மைதானத்தில் பாக்ஸிங் டே டெஸ்ட் போட்டியாக நடந்துவருகிறது.
பரபரப்பாக தொடங்கிய பாக்ஸிங் டே டெஸ்ட் போட்டியில் டாஸ் வென்ற இங்கிலாந்து பந்துவீச்சை தேர்வுசெய்தது. அதன்படி முதலில் பேட்டிங் செய்த ஆஸ்திரேலியா அணி வெறும் 152 ரன்களில் அனைத்து விக்கெட்டுகளையும் இழந்து ஆல் அவுட்டானது. டிராவிஸ் ஹெட் 12 ரன், லபுசனே 6 ரன் மற்றும் ஸ்மித் 9 ரன்னுக்கும் அவுட்டாகி வெளியேறினர். அபாரமாக பந்துவீசிய இங்கிலாந்தின் வேகப்பந்துவீச்சாளர் ஜோஷ் டங் 5 விக்கெட்டுகளை வீழ்த்தி அசத்தினார்.
இதன்மூலம் 21ஆம் நூற்றாண்டில் மெல்போர்ன் கிரிக்கெட் ஸ்டேடியத்தில் 5 விக்கெட்டுகளை வீழ்த்தி முதல் இங்கிலாந்து பந்துவீச்சாளராக வரலாறு படைத்தார் ஜோஷ் டங். கடைசியாக டேரன் கோஃப் மற்றும் டீன் ஹெட்லி ஆகியோர் 1998-ல் 5 விக்கெட்டுகளை வீழ்த்தியிருந்தனர். மேலும் ஆஸ்திரேலியா அணி சொந்தமண்ணில் 50 ஓவர்கள் கூட பேட்டிங் செய்யாமல் ஆல் அவுட்டானது இது மூன்றாவது முறையாகும்.
4வது டெஸ்ட் போட்டியில் வெற்றிபெறும் என்ற நம்பிக்கையில் இங்கிலாந்து பேட்டிங் செய்துவருகிறது.