அதிக சிக்சர்கள்| தோனியை பின்னுக்கு தள்ளிய ஜடேஜா!

இந்தியாவிற்கு சுற்றுப்பயணம் செய்திருக்கும் வெஸ்ட் இண்டீஸ் அணி 2 டெஸ்ட் போட்டிகள் கொண்ட தொடரில் விளையாடுகிறது.

முதல் டெஸ்ட் போட்டி அகமதாபாத்தில் உள்ள நரேந்திர மோடி ஸ்டேடியத்தில் தொடங்கி நடைபெற்றுவரும் நிலையில், இந்திய அணி 448 ரன்கள் சேர்த்துள்ளது. இந்திய வீரர்கள் கேஎல் ராகுல், துருவ் ஜூரெல், ரவீந்திர ஜடேஜா 3 பேரும் சதம் விளாசி அசத்தினர்.

பரபரப்பாக தொடங்கப்பட்ட முதல் போட்டியில் டாஸ் வென்ற வெஸ்ட் இண்டீஸ் அணி முதலில் பேட்டிங் செய்தது. அபாரமான பந்துவீச்சை வெளிப்படுத்திய முகமது சிராஜ் 4 விக்கெட்டுகளும், பும்ரா 3 விக்கெட்டுகளும் வீழ்த்த 162 ரன்களுக்கே அனைத்து விக்கெட்டுகளையும் இழந்து சுருண்டது வெஸ்ட் இண்டீஸ்.

விண்டீஸை தொடர்ந்து முதல் இன்னிங்ஸில் விளையாடிவரும் இந்திய அணி இரண்டாவது நாள் ஆட்ட முடிவில் 286 ரன்கள் முன்னிலையுடன் 448/5 ரன்கள் அடித்துள்ளது. அபாரமாக பேட்டிங் செய்த கேஎல் ராகுல், துருவ் ஜூரெல், ரவீந்திர ஜடேஜா 3 பேரும் சதமடித்து அசத்தினர்.

இந்நிலையில் இன்றைய போட்டியில் 5 சிக்சர்களை விளாசிய ஜடேஜா, டெஸ்ட் கிரிக்கெட்டில் அதிக சிக்சர்கள் அடித்த இந்திய வீரர்கள் பட்டியலில் தோனியை பின்னுக்கு தள்ளி அசத்தியுள்ளார்.

டெஸ்ட் கிரிக்கெட்டில் அதிக சிக்சர்கள் அடித்தவர்கள்:

1. சேவாக் - 90 சிக்சர்கள்

2. ரிஷப் பண்ட் - 90 சிக்சர்கள்*

3. ரோகித் சர்மா - 88 சிக்சர்கள்

4. ரவீந்திர ஜடேஜா - 80 சிக்சர்கள்

5. மகேந்திர சிங் தோனி - 78 சிக்சர்கள்