ஆஸ்திரேலியாவில் நடந்த முதல் ஒருநாள் போட்டியில், இந்திய மகளிர் அணி 214 ரன்கள் மட்டுமே அடித்து தோல்வியடைந்தது. ஆஸ்திரேலிய அணி 38.4 ஓவரில் இலக்கை எட்டி 6 விக்கெட்டுகள் வித்தியாசத்தில் வெற்றி பெற்றது. பெத் மூனி 76 ரன்கள் அடித்து ஆட்டநாயகி விருதை பெற்றார். தொடரில் ஆஸ்திரேலியா 1-0 என முன்னிலை பெற்றுள்ளது.
ஆஸ்திரேலியாவிற்கு சுற்றுப்பயணம் செய்துள்ள ஹர்மன்ப்ரீத் தலைமையிலான இந்திய அணி 3 டி20 போட்டிகள், 3 ஒருநாள் போட்டிகள் மற்றும் ஒரு டெஸ்ட் போட்டி கொண்ட தொடரில் விளையாடுகிறது.
நடந்துமுடிந்த டி20 தொடரில் 2-1 என வெற்றிபெற்ற இந்திய அணி ஆஸ்திரேலியாவை அவர்களின் சொந்த மண்ணில் வீழ்த்தி சாதனை படைத்தது.
இந்தசூழலில் இரண்டு அணிகளுக்கும் இடையிலான முதல் ஒருநாள் போட்டி இன்று நடைபெற்றது.
பிரிஸ்பேன் மைதானத்தில் பரபரப்பாக தொடங்கிய போட்டியில் முதலில் பேட்டிங் செய்த இந்திய அணி, 48.3 ஓவரில் அனைத்து விக்கெட்டுகளையும் இழந்து வெறும் 214 ரன்கள் மட்டுமே அடித்தது. ஸ்மிருதி மந்தனா, ஹர்மன்ப்ரீத் இருவரும் அரைசதமடித்த போதும் இந்தியாவால் பெரிய டோட்டலுக்கு செல்ல முடியவில்லை.
215 ரன்கள் என்ற வெற்றி இலக்குடன் விளையாடிய ஆஸ்திரேலியா மகளிர் அணி 38.4 ஓவரிலேயே இலக்கை எட்டி 6 விக்கெட்டுகள் வித்தியாசத்தில் அசத்தலான வெற்றியை பதிவுசெய்தது. 76 ரன்கள் அடித்த பெத் மூனி ஆட்டநாயகி விருதை வென்றார்.
3 போட்டிகள் கொண்ட தொடரில் ஆஸ்திரேலியா 1-0 என முன்னிலை பெற்றுள்ளது. போட்டி நடந்த பிரிஸ்பேன் மைதானத்தில் இதுவரை 21 முறை ஒருநாள் போட்டிகளில் விளையாடியிருக்கும் ஆஸ்திரேலியா மகளிர் அணி ஒருமுறை கூட தோற்காமல் 21-0 என திகழ்ந்துவருகிறது.