வழக்கமான 60 சதவீத வாக்குப்பதிவு, 10 சதவீதம் வரை குறையக்கூடும் என்றும் சில குழுக்கள் எச்சரித்துள்ளன. மத்திய கிழக்கில் ஏற்பட்டிருக்கும் போரால், ஆயிரத்திற்கும் மேற்பட்ட விமானங்கள் பாதிக்கப்பட்டுள்ளதாகக் கூறப்படுகிறது.
நாடு முழுவதும் 5 மாநிலங்களுக்கான தேர்தல் களம் சூடுபிடித்துள்ளது. அந்த வகையில், 140 சட்டசபை இடங்களைக் கொண்டிருக்கும் கேரளாவில் ஏப்ரல் 9ஆம் தேதி ஒரேகட்டமாகத் தேர்தல் நடைபெற இருக்கிறது. இதையடுத்து அம்மாநிலத்தில் காங்கிரஸ், பாஜக, மார்க்சிஸ்ட் ஆகிய கட்சிகளிடையே கடுமையான போட்டி நிலவுகிறது. இந்த நிலையில், கேரள தேர்தலில் வளைகுடா நாடுகளில் வசிக்கும் வெளிநாடு வாழ் இந்தியர்களின் வாக்குப்பதிவுச் சதவிகிதம், பெருமளவில் சரிவைச் சந்திக்க இருப்பதாக தகவல்கள் தெரிவிக்கின்றன. மாநிலத்தில் பதிவு செய்யப்பட்ட 2.25 லட்சம் வெளிநாட்டு வாக்காளர்களில், பெரும்பான்மையானோர் இந்த முறை தாயகம் திரும்ப மாட்டார்கள் என்று மதிப்பீடுகள் தெரிவிக்கின்றன. மேலும், வழக்கமான 60 சதவீத வாக்குப்பதிவு, 10 சதவீதம் வரை குறையக்கூடும் என்றும் சில குழுக்கள் எச்சரித்துள்ளன.
மத்திய கிழக்கில் ஏற்பட்டிருக்கும் போரால், ஆயிரத்திற்கும் மேற்பட்ட விமானங்கள் பாதிக்கப்பட்டுள்ளதாகக் கூறப்படுகிறது. குறிப்பாக, வளைகுடா- கேரளா வழித்தடங்களில் விமானக் கட்டணங்கள் சுமார் ரூ.8,000-ரூ.13,000-லிருந்து ரூ.60,000-க்கும் மேலாக, நான்கு மடங்குவரை உயர்ந்துள்ளன. கட்டணங்கள் பொதுவாக ரூ. 8,695 முதல் ரூ. 13,881 (350–550 ரியால்) வரை இருந்தன. உச்ச பருவ காலங்களில்கூட, அதிகபட்ச வரம்பு சுமார் ரூ. 21,500 முதல் ரூ. 30,500 (850–1,200 ரியால்) வரை இருந்தது. இப்போது, தேர்தல் காலத்தில், ரூ. 61,907 (2,500 ரியால்) ஐத் தாண்டி உயர்ந்துள்ளது. இதற்கு, எரிபொருள் விலை உயர்ந்திருப்பதும் ஒரு காரணமாகப் பார்க்கப்படுகிறது.
இதன் காரணமாக, பெருமளவிலான வாக்காளர்கள் இந்த தேர்தலுக்கு வாக்களிக்க வரவில்லை என்று கூறப்படுகிறது. குறிப்பாக, வட கேரளாவின் அரசியல் முக்கியத்துவம் வாய்ந்த பகுதியில் இதன் தாக்கம் அதிகமாகக் காணப்படுகிறது. அங்கு வாக்கு வித்தியாசம் பெரும்பாலும் மிகக் குறைவாக இருப்பதுடன், வெளிநாட்டு வாக்காளர்களின் வாக்குகளே தேர்தல் முடிவுகளைத் தீர்மானிக்கின்றன.
இதுகுறித்து இந்தியா டுடே வெளியிட்டுள்ள கட்டுரை ஒன்றில், 2021 சட்டமன்றத் தேர்தலில், குட்டியாடி போன்ற தொகுதிகளில் மட்டும் 16,000-க்கும் மேற்பட்ட பதிவு செய்யப்பட்ட வெளிநாட்டு வாக்காளர்கள் இருப்பதால், வாக்களிப்பு விகிதத்தில் ஏற்படும் ஒரு சிறிய சரிவுகூட தேர்தல் கணக்கீடுகளை கணிசமாக மாற்றக்கூடும். கண்ணூர் முதல் பாலக்காடு வரை பரந்துள்ள சுமார் 50 சட்டமன்றத் தொகுதிகளில் வெளிநாடு வாழ் கேரள (NRK) வாக்காளர்கள் நீண்ட காலமாக ஒரு தீர்க்கமான பங்கை ஆற்றி வருகின்றனர்.
எனவே, வெளிநாட்டு வாக்காளர்களின் எண்ணிக்கையில் ஏற்படக்கூடிய சரிவு, அரசியல் கட்சிகளிடையே பெரும் கவலைகளை ஏற்படுத்தியுள்ளதாக அது தெரிவித்துள்ளது. குறிப்பாக, கடும் போட்டி நிலவும் மலபார் பகுதியில், ஒவ்வொரு வாக்கும் வெற்றி தோல்வியை நிர்ணயிக்கும் ஆற்றல் கொண்டதாக இருக்கிறது எனத் தெரிவித்துள்ளது. முன்னதாக, கடந்த 2024 மக்களவைத் தேர்தலின்போது கிட்டத்தட்ட 10,000 வெளிநாட்டவர்கள் வாக்களிக்கத் திரும்பி வந்ததாக தெரிவித்துள்ள அந்த ஊடகம், இந்த முறை அது சாத்தியமில்லை எனக் குறிப்பிடுகிறது. அதற்கு முக்கியக் காரணம் அங்கு நிலவும் போர்ப் பதற்றம்தான். மேலும் அவ்வப்போது முஸ்லிம் லீக்குடன் இணைந்த கேரள முஸ்லிம் கலாச்சார மையம் இரண்டு விமானங்களையும் ஏற்பாடு செய்திருந்தது. இந்த சவால்கள் இருந்தபோதிலும், வெளிநாடு வாக்காளர்கள் வாக்களிக்கக் கட்டாயம் கேரளாவுக்கு வருவார்கள் என அரசியல் வட்டாரங்கள் நம்பிக்கை தெரிவிக்கின்றன.