தங்கம் விலை இன்னும் குறையுமா? நிபுணர்கள் சொல்வது என்ன?

செய்தியாளர் - கார்த்திகேயன்

சென்னையில் செப்டம்பர் 28-ஆம் தேதி காலை நிலவரப்படி, 22 கேரட் ஆபரணத் தங்கத்தின் விலை கிராமுக்கு ரூ.235 குறைந்து, ஒரு கிராம் ரூ.13,765-க்கு விற்பனை செய்யப்பட்டது. இதன்படி, சவரனுக்கு ரூ.1,880 குறைந்து, ரூ.1,10,120-க்கு விற்பனையானது.இதற்கிடையே, மாலை மீண்டும் தங்கத்தின் விலை குறைந்தது. சவரனுக்கு மேலும் ரூ.800 குறைந்து, ஒரு சவரன் ரூ.1,09,320-க்கு விற்பனை செய்யப்படுகிறது. ஒரே நாளில் இரண்டு முறை தங்கத்தின் விலை குறைந்திருப்பது, தங்கம் வாங்கக் காத்திருக்கும் பொதுமக்களின் கவனத்தை ஈர்த்துள்ளது.

இந்நிலையில், வரும் நாட்களில் தங்கத்தின் விலை மேலும் குறையுமா என்ற எதிர்பார்ப்பு எழுந்துள்ளது. சர்வதேச சந்தையில் கச்சா எண்ணெயின் விலை உயர்ந்துள்ளதால், அமெரிக்காவில் பணவீக்கம் மீண்டும் அதிகரிக்கலாம் என்ற அச்சம் ஏற்பட்டுள்ளது. பணவீக்கம் அதிகரித்தால், அமெரிக்க Federal Reserve வட்டி விகிதத்தை மேலும் உயர்த்தக்கூடும் என்ற எதிர்பார்ப்பு உருவாகிறது. இதனால் அமெரிக்க Treasury Bond-களின் வருமானம் அதிகரிக்கலாம். வட்டி வருமானம் கிடைக்காத தங்கத்தைவிட, அதிக வருமானம் தரும் அமெரிக்க பத்திரங்களில் முதலீடு செய்வதில் முதலீட்டாளர்கள் ஆர்வம் காட்டும் சூழல் உருவாகலாம்.

இதன் காரணமாக தங்கத்தில் விற்பனை அழுத்தம் அதிகரித்து, சர்வதேச அளவில் தங்கத்தின் விலை மேலும் குறைய வாய்ப்பு உள்ளது. இந்த சரிவு தொடர்ந்து வலுவடைந்தால், சென்னையில் தற்போது ரூ.1,09,320-க்கு விற்பனையாகும் ஒரு சவரன் 22 கேரட் தங்கம், முதற்கட்டமாக ரூ.1,06,000-க்கு அருகில் குறைய வாய்ப்பு உள்ளது. சரிவு மேலும் வலுவாக இருந்தால் ரூ.1,04,000 வரையிலும், அதற்கும் மேலான சரிவு ஏற்பட்டால் ரூ.1,02,000 வரையிலும் குறையும் சூழல் உருவாகலாம். எனினும், தற்போதைய தகவல்களின் அடிப்படையில் ஒரு சவரன் ரூ.1 லட்சமாக குறையும் என்று உறுதியாகக் கூற முடியாது. அதற்கு சர்வதேச தங்கச் சந்தையில் மேலும் பெரிய அளவிலான சரிவு ஏற்பட வேண்டும்.