காலையில் காரில் ஏறுகிறீர்கள். நேற்று வரை இல்லாத புதிய வசதி இன்று திரையில் தெரிகிறது. வழித்தடக் கணிப்பு இன்னும் துல்லியமாகியுள்ளது. பேட்டரி பயன்பாடு சீராகியுள்ளது. பாதுகாப்பு அமைப்பில் இருந்த குறை சரிசெய்யப்பட்டுள்ளது. ஆனால், காரை நீங்கள் சர்வீஸ் சென்டருக்கே கொண்டு செல்லவில்லை! இது மாயமல்ல. உங்கள் கைப்பேசி இரவில் தானாகப் புதுப்பிக்கப்பட்டதைப் போல, காரின் மென்பொருளும் இணையத்தின் மூலம் புதுப்பிக்கப்பட்டிருக்கிறது. நாம் பழகிய கார் இரும்பு, எஞ்சின், சக்கரம் ஆகியவற்றால் அடையாளம் காணப்பட்டது. நாளைய கார்? அதன் மதிப்பை எஞ்சின் திறன் மட்டும் தீர்மானிக்காது; அதன் சாப்ட்வேர் அறிவும் தீர்மானிக்கும். அந்த மாற்றத்தின் பெயர்தான் 'Software-Defined Vehicle', சுருக்கமாக 'SDV'.
ஒரு நகரப் பேருந்துப் பணிமனையில், கட்டுப்பாட்டு அறை திரையில் ஒரு பேருந்தின் பேட்டரி வெப்பநிலை வழக்கத்தைவிட உயர்வதாக எச்சரிக்கை வருகிறது. பேருந்து செயலிழப்பதற்கு முன்பே பராமரிப்புக் குழு நடவடிக்கை எடுக்கிறது. ஓட்டுநர் அறியும்முன்பே வாகனம் தனது உடல்நிலையைச் சொல்லிவிட்டது—இதுவும் SDV உருவாக்கும் புதிய வாய்ப்புதான்.
ஒரு பாரம்பரிய வாகனத்தில் பிரேக், எஞ்சின், விளக்குகள், ஏர் கண்டிஷனர், பொழுதுபோக்கு அம்சங்கள் போன்ற ஒவ்வொரு செயலுக்கும் தனித்தனி எலெக்ட்ரானிக் கண்ட்ரோல் யூனிட் (ECU) இருக்கும். சில நவீன வாகனங்களில் நூற்றுக்கும் மேற்பட்ட ECU-க்கள் இருக்கலாம். அவற்றை இணைக்க ஏராளமான கம்பிகளும் தனித்தனி தொடர்பு அமைப்புகளும் தேவைப்படும். SDV கட்டமைப்பில் இந்த செயல்பாடுகளில் பெரும்பகுதி சில சக்திவாய்ந்த மையக் கணினிகள் மற்றும் மண்டலக் கட்டுப்பாட்டாளர்களின் (Zonal Controller) கீழ் ஒருங்கிணைக்கப்படுகிறது.
வாகனத்தின் பல அம்சங்களை மென்பொருளால் உருவாக்கவும், மாற்றவும், மேம்படுத்தவும் முடியும். எளிமையாகச் சொன்னால், பாரம்பரிய காரில் ஹார்ட்வேர் என்ன செய்ய முடியும் என்பதைக் சாப்ட்வேர் கட்டுப்படுத்தியது. SDV-யில், வாகனம் என்ன செய்ய வேண்டும் என்பதையே சாப்ட்வேர் அதிகமாகத் தீர்மானிக்கிறது. ஆனால் மூன்று விஷயங்களை ஒன்றாகக் குழப்பக்கூடாது. எல்லா மின்சார வாகனங்களும் முழுமையான SDV அல்ல. எல்லா இணைய இணைப்புள்ள கார்களும் SDV அல்ல. அதேபோல், SDV என்றாலே தானியங்கி ஓட்டுநர் இல்லாத கார் என்றும் பொருளல்ல. மின்சாரம் என்பது வாகனத்தின் ஆற்றல்; தானியக்கம் அதன் ஓட்டும் திறன்; SDV என்பது அதன் டிஜிட்டல் கட்டமைப்பும் தொடர்ந்து மேம்படும் திறனும்.
SDV-யின் முக்கிய பலம் ஓவர் தி ஏர் அப்டேட் (OTA-Over-the-Air). இதன் மூலம் வரைபடம், பொழுதுபோக்கு அமைப்பு, பேட்டரி மேலாண்மை, சார்ஜிங் கட்டுப்பாடு, ஓட்டுநர் உதவி மற்றும் சில பாதுகாப்பு அம்சங்களைப் புதுப்பிக்க முடியும்.
Firmware Over-the-Air Update (FOTA) என்பது வாகனத்தின் Firmware புதுப்பிப்பைக் குறிக்கும். Software Over-the-Air Update (SOTA) என்பது பயன்பாடுகள் மற்றும் பிற Software புதுப்பிப்புகளைக் குறிக்கும். இவை இரண்டும் OTA (Over-the-Air) புதுப்பிப்பு முறையின் கீழ் வருகின்றன.
தவறான அப்டேட் வாகனத்தின் முக்கியச் செயல்பாடுகளைப் பாதிக்கக்கூடும். எனவே அப்டேட்டை அனுப்புவது மட்டும் போதாது; அது வாகனத்துடன் பொருந்துகிறதா, அங்கீகரிக்கப்பட்ட உற்பத்தியாளரிடமிருந்துதான் வந்ததா, நிறுவிய பிறகு சரியாக இயங்குகிறதா, தோல்வியடைந்தால் முந்தைய பாதுகாப்பான பதிப்புக்குத் திரும்ப முடியுமா என்பதையும் உறுதிப்படுத்த வேண்டும்.
அதனால்தான் ஐக்கிய நாடுகள் சபையின் UNECE UN Regulation No.155, வாகன இணையப் பாதுகாப்பு மேலாண்மையை வலியுறுத்துகிறது. UN Regulation No.156, வாகன சாப்ட்வேர் புதுப்பிப்புகள் மற்றும் அவற்றின் மேலாண்மை அமைப்புக்கான தேவைகளை வகுக்கிறது. அமெரிக்காவின் NHTSA வழிகாட்டுதலும் OTA சேவையகம், தகவல் பரிமாற்றம் மற்றும் அப்டேட்டின் ஒருமைப்பாடு பாதுகாக்கப்பட வேண்டும் எனக் கூறுகிறது.
ஒரு வாகனத்தின் எஞ்சின், பேட்டரி மற்றும் உடற்கட்டமைப்பு நல்ல நிலையில் இருந்தாலும், அதன் சாப்ட்வேர் ஆதரவு நிறுத்தப்பட்டால் என்ன ஆகும்? புதிய பாதுகாப்புக் குறைகளுக்குத் திருத்தம் கிடைக்காமல் போகலாம். வரைபடம், மொபைல் செயலி, தொலைநிலைக் கட்டுப்பாடு மற்றும் சில டிஜிட்டல் வசதிகள் செயலிழக்கலாம். கைப்பேசியைப் போல இரண்டு அல்லது மூன்று ஆண்டுகளுக்கு ஒருமுறை காரை மாற்ற முடியாது; பொதுவாக வாகனம் பல ஆண்டுகள் பயன்படுத்தப்படுகிறது. எனவே, வாகன உற்பத்தியாளர் எத்தனை ஆண்டுகள் சாப்ட்வேர் அப்டேட் மற்றும் சைபர் செக்யூரிட்டி ஆதரவு வழங்குவார் என்பது உத்தரவாதத்திற்கு இணையான முக்கியத் தகவலாக மாற வேண்டும்.
நாளை ஒரு காரின் வயதை அதன் பதிவு ஆண்டு மட்டும் அல்ல; கடைசியாக அது பாதுகாப்பாகப் புதுப்பிக்கப்பட்ட நாளும் தீர்மானிக்கலாம்.
SDV மூலம் வாகன உற்பத்தியாளர்கள் ஒரே அடிப்படை ஹார்ட்வேரைப் பயன்படுத்தி, சாப்ட்வேர் மூலம் வெவ்வேறு மாடல்கள் மற்றும் வசதிகளை வழங்க முடியும். கோளாறுகளைத் தொலைவிலிருந்தே கண்டறிதல், முன்கணிப்புப் பராமரிப்பு (Predictive Maintenance), விரைவான பாதுகாப்புத் திருத்தம், குறைந்த வயரிங், மேம்பட்ட ஆற்றல் மேலாண்மை போன்ற பலன்களும் கிடைக்கலாம். ஆனால், மற்றொரு கதவும் திறக்கிறது — சந்தா பொருளாதாரம். ஏற்கெனவே வாகனத்தில் பொருத்தப்பட்டிருக்கும் ஒரு வசதியைப் பயன்படுத்த மாதாந்திரக் கட்டணம் செலுத்த வேண்டுமா? வாகனத்தின் உரிமையாளர் யார்? அதன் தரவின் உரிமையாளர் யார்? ஒருகாலத்தில் கார் வாங்கினோம். நாளை, காரை வாங்கிவிட்டு அதன் சில திறன்களை மட்டும் “வாடகைக்கு” எடுக்கும் நிலையும் வரலாம். வசதி என்ற பெயரில் உரிமை மெதுவாகக் குறையக்கூடாது.
கைப்பேசியில் புதிய செயலியைப் பதிவிறக்கம் செய்ததும் அதன் திறன் மாறிவிடுகிறது. SDV-யிலும் எதிர்காலத்தில் வழிகாட்டுதல், பொழுதுபோக்கு, சார்ஜிங், பயணத் திட்டமிடல் மற்றும் வாகன மேலாண்மை போன்ற வசதிகளை மென்பொருள் மூலம் சேர்க்கும் வாய்ப்பு உருவாகலாம்.
ஆனால் கார், கைப்பேசி அல்ல. ஒரு செயலி செயலிழந்தால் கைப்பேசி நின்றுவிடலாம்; வாகனத்தில் தவறான மென்பொருள் பிரேக், ஸ்டியரிங் அல்லது ஓட்டுநர் உதவி அமைப்பை பாதிக்கக்கூடும். எனவே எந்தச் செயலியையும் விருப்பம்போல் நிறுவும் சுதந்திரம் வாகனத்தில் சாத்தியமில்லை.
ஒவ்வொரு செயலியும் வாகனத்துடன் பொருந்துகிறதா, எந்தத் தரவைப் பயன்படுத்துகிறது, பாதுகாப்பு அமைப்புகளிலிருந்து தனிமைப்படுத்தப்பட்டுள்ளதா என்பதைக் கடுமையாகச் சோதிக்க வேண்டும். மூன்றாம் தரப்பு நிறுவனங்களுக்கும் வாய்ப்பு வழங்கும்போது, பாதுகாப்பு மற்றும் தரவு தனியுரிமைக்குத் தெளிவான விதிகள் அவசியம்.
காருக்குள் செயலிகள் வரலாம்; ஆனால் அவற்றுடன் அபாயங்கள் பயணம் செய்யக்கூடாது!
SDV ஒரு வாகனம் மட்டுமல்ல; அதன் உள்ளக அமைப்புகளும் இணைக்கப்பட்ட கிளவுட் சேவைகளும் பயணத் தகவல்கள், வழக்கமான பாதைகள், சார்ஜிங் விவரங்கள், ஓட்டும் முறை மற்றும் சில நேரங்களில் இருப்பிடத் தகவல்களையும் சேகரித்துச் சேமிக்கலாம். அந்தக் காரை மறுவிற்பனை செய்யும்போது பழைய உரிமையாளரின் கணக்கு, மொபைல் இணைப்பு மற்றும் தனிப்பட்ட தரவுகள் முழுமையாக நீக்கப்பட வேண்டும். புதிய உரிமையாளருக்கு முன்பு வாங்கிய சாப்ட்வேர் அம்சங்கள் தொடர்ந்து கிடைக்குமா? சந்தா மீண்டும் வாங்க வேண்டுமா? உற்பத்தியாளர் தனது கிளவுட் சேவையை நிறுத்தினால் வாகனத்தின் சில வசதிகள் செயல்படுமா? இத்தகைய கேள்விகள் மறுவிற்பனை மதிப்பையே மாற்றக்கூடும். இனி பயன்படுத்திய காரை வாங்கும்போது சர்வீஸ் வரலாறு மட்டுமல்ல; சாப்ட்வேர் வரலாறு மற்றும் மீதமுள்ள பயன்பாட்டு ஆதரவுக் காலத்தையும் சரிபார்க்க வேண்டிய காலம் வருகிறது.
பல தலைமுறைகளாக வாகனப் பராமரிப்பில் முக்கியப் பங்கு வகித்தவர்கள் உள்ளூர் மெக்கானிக்குகள். ஆனால் SDV-யில் ஒரு கோளாறைச் சரிசெய்ய ஸ்பேனர் மட்டும் போதாது; டையாக்னாஸ்டிக் சாப்ட்வேர் , சைபர் செக்யூரிட்டி அணுகல், அளவுத்திருத்தக் கருவி (Calibration Tool) மற்றும் உற்பத்தியாளரின் தொழில்நுட்பத் தகவல்களும் தேவைப்படலாம். அவை அங்கீகரிக்கப்பட்ட சர்வீஸ் மையங்களுக்கு மட்டுமே கிடைத்தால், வாகன உரிமையாளரின் தேர்வு குறைந்து பராமரிப்புச் செலவு உயரலாம். அதனால் பாதுகாப்பைச் சமரசம் செய்யாமல், அங்கீகரிக்கப்பட்ட சுயாதீனப் பணிமனைகளுக்கும் தேவையான பழுதுபார்ப்பு தகவல்கள் கிடைக்கும் அமைப்பு அவசியம். “Right to Repair” என்பது தொழில்நுட்ப விவாதம் மட்டும் அல்ல; அது நுகர்வோரின் செலவு, போட்டி, வேலைவாய்ப்பு மற்றும் வாகனத்தின் பயன்பாட்டு ஆயுள் தொடர்பான கேள்வி.
SDV-யில் சைபர் பாதுகாப்பு என்பது வெறும் தகவல் பாதுகாப்பல்ல; அது சாலைப் பாதுகாப்பின் ஓர் அங்கம். ஹேக்கர் ஒருவர் இசை அமைப்பைத் தாக்குவது ஒரு தொந்தரவு. ஆனால் பிரேக், ஸ்டியரிங், பேட்டரி அல்லது ஓட்டுநர் உதவி அமைப்பைத் தாக்குவது உயிர் பாதுகாப்புடன் தொடர்புடையது. எனவே “வடிவமைப்பு நிலையிலேயே சைபர் செக்யூரிட்டி” அவசியம். பாதுகாப்பான குறியீடு, மறையாக்கப்பட்ட தொடர்பு, டிஜிட்டல் கையொப்பம், அணுகல் கட்டுப்பாடு, தொடர்ச்சியான கண்காணிப்பு, பாதுகாப்பான OTA மற்றும் தோல்வியுற்றால் முந்தைய பதிப்புக்குத் திரும்பும் வசதி ஆகியவை வாகனத்தின் முழு ஆயுட்காலத்துக்கும் தேவை. இந்தியாவில் ICAT வெளியிட்டுள்ள AIS-189, வாகன இணையப் பாதுகாப்பு மற்றும் செக்யூரிட்டி மேலாண்மை அமைப்பு தொடர்பான ஒப்புதல் தேவைகளை எடுத்துரைக்கிறது.
இந்தியா வாகன உற்பத்தியில் மட்டுமல்ல; மென்பொருள், செயற்கை நுண்ணறிவு, கிளவுட் கம்ப்யூட்டிங் மற்றும் பொறியியல் சேவைகளிலும் வலுவான நாடு. இந்தத் திறன்களின் சந்திப்பாக SDV உருவெடுக்கலாம். வாகன மென்பொருள், இணையப் பாதுகாப்பு, தரவுப் பகுப்பாய்வு மற்றும் டிஜிட்டல் வாகன மேலாண்மை ஆகிய துறைகளில் புதிய வேலைவாய்ப்புகளையும் அது உருவாக்கக்கூடும்.
ஆனால் உதிரிபாக நிறுவனங்கள் வன்பொருள் வழங்குவதோடு நின்றுவிட முடியாது. மென்பொருள் ஒருங்கிணைப்பு, சென்சார் தொழில்நுட்பம் மற்றும் இணையப் பாதுகாப்பிலும் முதலீடு செய்ய வேண்டும். கல்லூரிகளும் மெக்கானிக்கல் இன்ஜினீயரிங்குடன் எலெக்ட்ரானிக்ஸ், மென்பொருள் மற்றும் தரவு அறிவியலை இணைக்க வேண்டும்.
நாளைய வாகன நிபுணர் கியர்பாக்ஸை மட்டும் புரிந்துகொண்டால் போதாது; கோடிங்கையும் புரிந்துகொள்ள வேண்டும்!
SDV பயன்பாடு அதிகரிக்கும்போது மென்பொருள் ஆதரவு, தரவு உரிமை, சந்தா, மறுவிற்பனை மற்றும் பழுதுபார்க்கும் உரிமைக்குத் தெளிவான விதிகள் தேவை. பாதுகாப்பையோ செயல்திறனையோ மாற்றும் புதுப்பிப்புகளை யார் பரிசோதித்து அனுமதிப்பது என்பதும் வரையறுக்கப்பட வேண்டும்.
புதுமையின் வேகத்துக்குத் தடை வேண்டாம்; விதிகளற்ற வேகத்துக்கும் இடம் வேண்டாம்!
SDV சொகுசுக் கார்களுக்கான தொழில்நுட்பம் மட்டுமல்ல. பேருந்துகளில் இயந்திரம், பிரேக், பேட்டரி, கதவுகள் மற்றும் டயர்களின் நிலையை மையக் கட்டுப்பாட்டு அறையிலிருந்து தொடர்ந்து கண்காணிக்கலாம். ஒரே மென்பொருள் புதுப்பிப்பை நூற்றுக்கணக்கான பேருந்துகளுக்கும் வழங்கலாம். ஆனால் உற்பத்தியாளரின் மென்பொருளை முழுமையாகச் சார்ந்திருப்பது அபாயம். எனவே திறந்த தரநிலைகள், தரவு உரிமை, நீண்டகால மென்பொருள் ஆதரவு மற்றும் கையால் இயக்கக்கூடிய மாற்று முறை ஆகியவை கொள்முதல் ஒப்பந்தத்திலேயே உறுதி செய்யப்பட வேண்டும்.
ஆற்றல் மேலாண்மை, குறைந்த வயரிங் மற்றும் முன்கணிப்புப் பராமரிப்பால் SDV-யின் செயல்திறன் உயரலாம். ஆனால் கிளவுட் சேவைகள், தரவுப் பரிமாற்றம், கணினிச் சாதனங்கள் மற்றும் மின்னணுக் கழிவின் சுற்றுச்சூழல் சுமையையும் கணக்கிட வேண்டும்.
“டிஜிட்டல்” என்ற வார்த்தைக்கு இயல்பாகவே பச்சை நிறம் பூசிவிட முடியாது!
SDV-யின் அடுத்த பரிணாமமாகச் சில தொழில்நுட்ப நிறுவனங்கள் AI-Defined Vehicle (AIDV) என்ற கருத்தை முன்வைக்கின்றன. SDV மென்பொருளால் மேம்படுகிறது; AIDV செயற்கை நுண்ணறிவின் உதவியுடன் ஓட்டுநரின் பழக்கம், போக்குவரத்து நிலை மற்றும் வாகனத்தின் செயல்பாட்டைப் புரிந்துகொண்டு சேவைகளைத் தகவமைத்துக்கொள்ள முயலும்.
ஆனால் AIDV என்றாலே ஓட்டுநர் இல்லாத கார் என்று பொருளல்ல. மனிதக் கண்காணிப்பு, பாதுகாப்புச் சோதனை மற்றும் தரவுத் தனியுரிமை அவசியம்.
SDV காரைப் புதுப்பிக்கிறது; AIDV அதைச் சூழலுக்கேற்ப தகவமைக்க முயல்கிறது!
• SDV கார் மட்டுமல்ல; பேருந்து, லாரி மற்றும் சிறப்புப் பயன்பாட்டு வாகனங்களிலும் இடம்பெறலாம்.
• விற்பனைக்குப் பிறகும் சில வசதிகளை மென்பொருளால் சேர்க்கவோ மேம்படுத்தவோ முடியும்.
• பயன்படுத்தப்பட்ட SDV-யை வாங்கும்போது அதன் மென்பொருள் புதுப்பிப்பு வரலாற்றையும் சரிபார்க்க வேண்டும்.
“SDV பாதுகாப்பு என்பது கூட்டுப் பொறுப்பு. உற்பத்தியாளர் முதல் ஒழுங்குமுறை அமைப்பு வரை, வாகனத்தின் ஆயுள் முழுவதும் ஒவ்வொருவரின் பொறுப்பும் தெளிவாக இருக்க வேண்டும்.”
• மென்பொருளால் தொடர்ந்து மேம்படும் வாகனமே SDV.
• மின்சார வாகனமும் SDV-யும் ஒன்றல்ல.
• FOTA, SOTA ஆகியவை OTA முறையில் வழங்கப்படும் புதுப்பிப்புகள்.
• இணையத் தாக்குதல் SDV-யில் சாலை அபாயமாகவும் மாறலாம்.
• பேருந்துகளில் SDV, கோளாறுகளை முன்கூட்டியே கண்டறிய உதவும்.
• மென்பொருள் ஆதரவுக் காலத்தை வாங்கும்முன் கேளுங்கள்.
• OTA புதுப்பிப்பின் அதிகாரபூர்வத் தன்மையை உறுதிப்படுத்துங்கள்.
• பாதுகாப்பான இணைய இணைப்பை மட்டும் பயன்படுத்துங்கள்.
• வாகனத்தின் தரவு மற்றும் தனியுரிமை அமைப்புகளை அறிந்துகொள்ளுங்கள்.
• சந்தா, உத்தரவாதம் மற்றும் மறுவிற்பனை நிபந்தனைகளைப் படியுங்கள்.
கார் இனி தொழிற்சாலையில் முழுமை பெறும் பொருள் மட்டுமல்ல; பயன்பாட்டுக் காலம் முழுவதும் புதிய திறன்களைப் பெறும் டிஜிட்டல் தளம். ஆனால் அதன் புத்திசாலித்தனத்தைவிட, நம்பகத்தன்மையும் பொறுப்பான செயல்பாடுமே உண்மையான மதிப்பைத் தீர்மானிக்கும்.
நாளைய வாகனத்தை அதன் வேகம் மட்டும் அடையாளப்படுத்தாது; அதன் டிஜிட்டல் நம்பகத்தன்மையும் அடையாளப்படுத்தும்!
SDV வாங்கும்போது வசதிகளை மட்டும் பார்க்காதீர்கள். மென்பொருள் ஆதரவு, தரவு உரிமை மற்றும் பழுதுபார்க்கும் உரிமையையும் கவனியுங்கள். வாகன உரிமையுடன் டிஜிட்டல் உரிமையும் உறுதிசெய்யப்பட வேண்டும்.
தொழில்நுட்பம் காருக்கு அறிவைக் கொடுக்கலாம்; இறுதி அதிகாரம் மனிதரிடமே இருக்க வேண்டும். கார் மனிதனைப் புரிந்துகொள்வது புதுமை; மனிதனை மீறாமல் இயங்குவது பொறுப்பு!
— முனைவர் . வளவன் . அமுதன்
பொதுப் போக்குவரத்து | ஆட்டோமொபைல் | மொபிலிட்டி | மின்சார வாகனங்கள் | சாலைப் பாதுகாப்பு நிபுணர்
1. UNECE — ஐக்கிய நாடுகள் ஐரோப்பிய பொருளாதார ஆணையத்தின் விதி எண் 155: வாகன இணையப் பாதுகாப்பு; விதி எண் 156: மென்பொருள் புதுப்பிப்பு மேலாண்மை.
2. NHTSA — நவீன வாகனங்களின் பாதுகாப்புக்கான இணையப் பாதுகாப்புச் சிறந்த நடைமுறைகள், 2022.
3. ICAT — AIS-189: வாகன இணையப் பாதுகாப்பு மற்றும் இணையப் பாதுகாப்பு மேலாண்மை அமைப்பு (CSMS).
4. ISO/SAE 21434:2021 — சாலை வாகனங்களுக்கான இணையப் பாதுகாப்புப் பொறியியல்.
5. ISO 24089:2023 — சாலை வாகனங்களுக்கான மென்பொருள் புதுப்பிப்புப் பொறியியல்.
6. AUTOSAR — கிளாசிக் (Classic) மற்றும் அடாப்டிவ் (Adaptive) தளங்களுக்கான அதிகாரபூர்வ ஆவணங்கள்.
இணையத்தில் இணையும் கார்… வசதியா, கண்காணிப்பா? “Connected Vehicle” தொழில்நுட்பத்தின் வாய்ப்புகள், சாலைப் பாதுகாப்புப் பயன்கள், தரவுத் தனியுரிமை மற்றும் இணையத் தாக்குதல் அபாயங்களை அடுத்த வாரம் ஆராய்வோம்.
(சக்கரங்கள் சுழலும்..)