தமிழ் சினிமாவில் பிரபல குணச்சித்திர நடிகர் முத்துக்குமார். ஆரம்ப காலகட்டங்களில் வேட்டையாடு விளையாடு போன்ற சில படங்களில் சின்ன சின்ன வேடங்களில் நடித்தவருக்கு ரஜினிகாந்த் நடிப்பில் கார்த்திக் சுப்பாராஜ் இயக்கிய `பேட்ட' படம் மூலம் நல்ல கவனம் கிடைத்தது. தொடர்ந்து `சார்பட்டா பரம்பரை', `மகான்', `தங்கலான்' பிற படங்களில் முக்கிய வேடங்களில் நடித்து பிரபலமானார்.
சமீபத்தில் இவர் ராதிகாவின் `தாய் கிழவி' படத்தில் ஜவகர்லால் நேரு என்ற பாத்திரத்தில் நடித்தார். அவரது பாத்திரத்திற்கு மிகப்பெரிய வரவேற்பு கிடைத்தது. கூத்து பட்டறையில் நடிப்பு பயின்ற இவரும், விஜய் சேதுபதியும் நண்பர்கள். சமீபத்தில் விஜய் சேதுபதி நடித்த `காட்டான்' வெப் சீரிஸிலும் முத்துக்குமார் முக்கிய பாத்திரத்தில் நடித்திருந்தார்.
இந்நிலையில், நேற்று முத்துக்குமாருக்கு பிறந்தநாள் என்பதால் பலரும் வாழ்த்து தெரிவித்தனர். சர்ப்ரைஸாக நடிகர் விஜய் சேதுபதி நேரடியாக வீட்டு சென்று முத்துக்குமாரை வாழ்த்தி இருக்கிறார். இது பற்றி பதிவிட்ட முத்துக்குமார் "நண்பன் *நடிகர் விஜய் சேதுபதி* - யுடனான எனது நட்பு கூத்துப் பட்டரையிலிருந்து தொடர்கிறது. நேற்று (24/04/2026 ) எவ்வித முன்னறிவிப்புமின்றி எனது இல்லத்திற்கே வந்து, எனக்கு *பிறந்தநாள் வாழ்த்துக் கூறி*, என்னையும் எனது குடும்பத்தினரையும் பெருமகிழ்ச்சிக்கு உள்ளாக்கிய நண்பன் விஜய்சேதுபதிக்கு எனது நெஞ்சார்ந்த நன்றிகள்! உனது பேரன்புக்கு பெருநன்றி நண்பா!" எனக் குறிப்பிட்டிருந்தார்.