விக்னேஷ் சிவன் இயக்கிய ‘LIK’ படம், இணையத்தில் வந்த கடுமையான எதிர்மறை விமர்சனங்களால் திரையரங்கில் எதிர்பார்த்த வரவேற்பு பெறவில்லை என்று அவர் வேதனையுடன் பதிவிட்டுள்ளார். ஆரம்ப வார வசூல் நம்பிக்கையளித்தும் பின்னர் திடீரென குறைந்தது வருத்தமளிப்பதாக கூறி, விமர்சனங்கள் பல நேர்மையான படங்களின் கனவுகளை நசுக்குகின்றன என அவர் குற்றம்சாட்டியுள்ளார்.
பிரதீப் ரங்கநாதன், க்ரித்தி ஷெட்டி, எஸ் ஜே சூர்யா நடிப்பில் விக்னேஷ் சிவன் இயக்கி ஏப்ரல் 10ம் தேதி வெளியான படம் `LIK'. இப்படத்துக்கு திரையரங்கில் பெரிய வரவேற்பு கிடைக்காதது குறித்து இயக்குநர் விக்னேஷ் சிவன் இன்ஸ்ட்டா பதிவு ஒன்றை எழுதியுள்ளார்.
அந்தப் பதிவில் "இணையத்தில் தாங்கள் கண்ட கடுமையான எதிர்மறை விமர்சனங்கள் காரணமாக, திரையரங்குகளில் படத்தைப் பார்க்கத் தவறிவிட்டதாகப் பலர் எனக்குச் செய்தி அனுப்பியுள்ளனர். சில திரைப்படங்கள் எதிர்மறை விமர்சனங்களைத் தாங்கி நிற்கின்றன; மற்றவை அவ்வாறு செய்வதில்லை. தங்களின் சூழல், சக திரைப்படத் துறை அல்லது செல்வாக்கு மிக்கவர்களின் ஆதரவு இல்லாத திரைப்படங்களுக்கு, பொதுமக்களின் பார்வை அவற்றின் தலைவிதியை முற்றிலுமாக மாற்றிவிடக்கூடும். தங்களின் அறிவுத்திறனையோ அல்லது மேன்மையையோ வெளிக்காட்டும் நோக்கில் எழுதப்படும் விமர்சனங்கள், ஒரு திரைப்படத்தை விமர்சிப்பதையும் தாண்டி, பார்வையாளர்களை அதற்கு ஒரு வாய்ப்பு கொடுப்பதிலிருந்து ஊக்கமிழக்கச் செய்து, லட்சியமிக்க திரைப்பட இயக்குநர்களின் கனவுகளை நசுக்கிவிடுகின்றன.
LIK படத்தின் வசூல் முடிவை என்னால் இன்னும் முழுமையாக ஏற்றுக்கொள்ள முடியவில்லை. நம்பிக்கையூட்டும் தொடக்க வார வசூலுக்குப் பிறகு, களம் இவ்வளவு விரைவாக மாறியதுதான் மிகவும் வருத்தமளிக்கிறது. வித்தியாசமாகவும், முழுமையாகவும், தனித்துவமாகவும் இருக்க முயன்ற ஒரு நேர்மையான தமிழ்த் திரைப்படம், அதன் பார்வையாளர்களிடமிருந்து இன்னும் கொஞ்சம் தாராள மனப்பான்மையைப் பெற்றிருக்க வேண்டும் என்று நான் உண்மையாகவே உணர்கிறேன். இது போன்ற ஒரு திரைப்படத்தை உயிர்ப்பிப்பதில் உள்ள போராட்டத்தை பலர் பார்ப்பதில்லை. அதை உருவாக்குவது கடினமாக இருந்தது, வெளியிடுவது அதைவிடக் கடினமாக இருந்தது, அந்தச் சவால்களைக் கடந்து வந்த பிறகு, அது இப்படி முடிவதைப் பார்ப்பது வேதனையாக இருக்கிறது. இருப்பினும், முதன்முதலில் வெளிவந்தபோது ஏற்றுக்கொள்ளப்படாத சிறந்த திரைப்படங்கள் பல சினிமாவில் நிறைந்துள்ளது, அந்த எண்ணம் ஒருவித ஆறுதலை அளிக்கிறது. நேற்று, ஒரு புத்திசாலியானா புகழ்பெற்ற இயக்குநர் சொன்ன விஷயம் எனக்குள் நிரந்தரமாக தங்கிவிட்டது "ஒரு படத்தோட வெற்றி, அதுக்குள்ள இருக்குறத விட, வெளிய தான் அதிகமா இருக்கு." எனக் குறிப்பிட்டுள்ளார்.