உலகின் சக்திவாய்ந்த பாஸ்போர்ட் | முதலிடம் பிடித்த அந்த நாடு எது? இந்தியா எத்தனையாவது இடம்?

உலகப் பயணம் குறித்த விதிமுறைகள் மாறிக் கொண்டிருக்கும் இந்தச் சூழலில், உலகின் மிக சக்திவாய்ந்த பாஸ்போர்ட்டாகத் திகழும் நாடு எது? பல முக்கிய நாடுகள் விசா இல்லாமல் செல்லும் வசதியை இழந்த சூழலிலும், ஐக்கிய அரபு அமீரகம் ஏழாவது முறையாக முதலிடம் பிடித்து வரலாற்றுச் சாதனையைப் படைத்துள்ளது. இந்தியா, இலங்கை, பாகிஸ்தான் ஆகிய நாடுகளின் நிலை என்ன? பாஸ்போர்ட் வல்லரசுகளின் புதிய பட்டியலைப் பற்றித் தெரிந்துகொள்ளலாம்..

கனடாவைத் தளமாகக் கொண்ட உலகளாவிய குடியுரிமை ஆலோசனைக் குழுவான 'ஆர்ட்டன் கேப்பிடல்' (Arton Capital) நிறுவனம் வெளியிட்டுள்ள 2025 ஆம் ஆண்டுக்கான உலகின் சக்திவாய்ந்த பாஸ்போர்ட் குறியீட்டில், ஐக்கிய அரபு அமீரகம் (UAE) தொடர்ச்சியாக ஏழாவது ஆண்டாக முதலிடத்தைப் பிடித்து, உலகின் மிகவும் சக்திவாய்ந்த பாஸ்போர்ட் என்ற பெயரை மீண்டும் நிலைநாட்டியுள்ளது.

ஒரு நாட்டின் பாஸ்போர்ட்டைக் கொண்டு விசா இல்லாமல் எத்தனை நாடுகளுக்குப் பயணிக்க முடியும் என்பதன் அடிப்படையில் இந்தத் தரவரிசை தீர்மானிக்கப்படுகிறது.

இந்த ஆண்டு பல முக்கிய நாடுகள் விசா இல்லாத அணுகலை இழந்தபோதும், அமீரகம் அதன் உலகளாவிய இயக்கத்தை வலுப்படுத்தி தொடர்ந்து முன்னிலை வகிக்கிறது. எமிராட்டி பாஸ்போர்ட், 129 இடங்களுக்கு விசா இல்லாத அணுகல், 45 விசா-ஆன்-அரைவல் நாடுகள் மற்றும் 8 ETA (மின்னணு பயண அங்கீகாரம்) அணுகல் நாடுகள் ஆகியவற்றுடன், உலகின் மிக உயர்ந்த மொபிலிட்டி ஸ்கோரான 179 ஐப் பெற்றதன் மூலம் முதலிடத்தைத் தக்கவைத்துக் கொண்டது.

அமீரகத்தின் நீண்டகால மற்றும் நம்பகமான வெளிநாட்டு உறவுகள், டிஜிட்டல் மாற்றம், அத்துடன் 10 ஆண்டு கோல்டன் விசா போன்ற முதலீட்டாளர் மற்றும் தொழில் வல்லுநர்களை ஈர்க்கும் சாதகமான கொள்கைகள் ஆகியவை அதன் உயர் நிலைக்குக் காரணமாகக் கூறப்படுகிறது.

தரவரிசையில் சிங்கப்பூர் மற்றும் ஸ்பெயின் ஆகிய நாடுகள் இரண்டாவது இடத்தைப் பகிர்ந்து கொள்கின்றன.

ஆசிய பாஸ்போர்ட்டுகள் இந்த ஆண்டு குறிப்பிடத்தக்க முன்னேற்றத்தைக் கண்டுள்ளன. சிங்கப்பூர் 30வது இடத்திலிருந்து மிகப் பெரிய அளவில் 2வது இடத்திற்கு உயர்ந்துள்ளது. அதேபோல், மலேசியா 41வது இடத்திலிருந்து 17வது இடத்திற்கு உயர்ந்தது. ஆசியாவின் இந்த வளர்ச்சிக்கு வர்த்தகக் கூட்டாண்மைகளும் பொருளாதார உறுதியான தன்மையும் ஆகியவை ஆசியாவின் இந்த வளர்ச்சிக்கு முக்கிய உந்து சக்தியாக இருப்பதாக நிபுணர்கள் கூறுகின்றனர்.

இதற்கு மாறாக, பல மண்டலங்களில் நுழைவு விதிகள் கடுமையாக்கப்பட்டதால், மேற்கத்திய நாடுகள் சரிவைச் சந்தித்துள்ளன. 2024 உடன் ஒப்பிடும்போது கிட்டத்தட்ட அனைத்து ஐரோப்பிய பாஸ்போர்ட்டுகளும் சில இடங்களுக்கான விசா இல்லாத அணுகலை இழந்ததால், அவற்றின் மொபிலிட்டி ஸ்கோர் சுமார் 174 ஆகக் குறைந்துள்ளதாக அறிக்கை தெரிவிக்கிறது. அமெரிக்கா 41வது இடத்திற்குப் பின்தங்கியுள்ளது.

இங்கிலாந்து 32வது இடத்திலிருந்து 39வது இடத்திற்குச் சரிந்தது, கனடா ஐந்து புள்ளிகள் குறைந்து 40வது இடத்திற்குச் சென்றது. ஆஸ்திரேலியா மற்றும் நியூசிலாந்து ஆகிய நாடுகளும் தரவரிசையில் சரிந்துள்ளன.

இந்தத் தரவரிசையில் இந்தியா 67வது இடத்தில் நீடிக்கிறது. அண்டை நாடுகளான இலங்கை 84வது இடத்திலும், பாகிஸ்தான் 91வது இடத்திலும் உள்ளன.

சக்திவாய்ந்த பாஸ்போர்ட், விசா தாமதங்கள் இல்லாமல் எளிதான உலகளாவிய பயணம், கல்வி மற்றும் வணிகத்திற்கான சிறந்த அணுகல், அதிகரித்த தேசிய போட்டித்திறன் மற்றும் முதலீட்டாளர் நம்பிக்கை போன்ற முக்கிய நன்மைகளைத் தருவதாக ஆர்ட்டன் கேபிடல் (Arton Capital) கூறுகிறது. பல நாடுகளின் பாஸ்போர்ட்டுகள் நெகிழ்வுத்தன்மையை இழந்து வரும் நேரத்தில், அமீரகத்தின் தொடர்ச்சியான முன்னிலை, அதன் உலகளாவிய இணைப்பு மற்றும் நிலைத்தன்மையை உறுதி செய்கிறது.