வெளியான 44 பக்க ஆவணம்.. அமெரிக்காவுக்கு எதிராக ரஷ்யா – ஈரான் ரகசியத் திட்டம்!

செய்தியாளர் - M. மீரா

அமெரிக்கா–ஈரான் இடையேயான மோதல் தீவிரமடைந்து வரும் நிலையில், ரஷ்யா–ஈரான் இடையேயான நீண்டகால ஒத்துழைப்பு குறித்த புதிய தகவல்கள் வெளியாகியுள்ளன. ரஷ்ய அரசு தயாரித்ததாகக் கூறப்படும் 44 பக்க ஆவணம் ஒன்று தற்போது கவனம் பெற்றுள்ளது. இந்த ஆவணத்தின்படி, அமெரிக்கா–ஈரான் போர் தொடங்குவதற்கு ஓராண்டுக்கு முன்பே, ரஷ்யாவும் ஈரானும் பல்வேறு துறைகளில் ஒத்துழைப்பை அதிகரிக்க திட்டமிட்டிருந்ததாக கூறப்படுகிறது.

குறிப்பாக, பொருளாதாரம், எரிசக்தி, நிதி மற்றும் அணுசக்தி துறைகளில் இணைந்து செயல்பட திட்டமிடப்பட்டிருந்ததாக தெரிவிக்கப்பட்டுள்ளது. இந்த ஆவணம் 2024 செப்டம்பர் 2-ம் தேதி ரஷ்யாவால் அங்கீகரிக்கப்பட்டதாக கூறப்படுகிறது. மேலும், 2024 முதல் 2026 வரை இரு நாடுகளும் மேற்கொள்ள வேண்டிய ஒத்துழைப்பு நடவடிக்கைகளும் இதில் இடம்பெற்றிருந்ததாக தகவல்கள் தெரிவிக்கின்றன.

இதில், ரஷ்யாவின் அரசு அமைப்புகள், அமைச்சகங்கள் மற்றும் அரசு நிறுவனங்கள் செய்ய வேண்டிய பணிகளும் குறிப்பிடப்பட்டிருந்ததாக கூறப்படுகிறது. ஒவ்வொரு பணிக்கும் குறிப்பிட்ட காலக்கெடுவும் வழங்கப்பட்டிருந்ததாக தெரிவிக்கப்பட்டுள்ளது.

மேற்கத்திய நாடுகளின் பொருளாதாரத் தடைகளால் ரஷ்யாவும் ஈரானும் பாதிக்கப்பட்டுள்ளன. இதனால், அமெரிக்கா மற்றும் மேற்கத்திய நிதி அமைப்புகளைச் சார்ந்திருப்பதை குறைக்க இரு நாடுகளும் திட்டமிட்டுள்ளது. இதற்காக, தங்களுடைய தேசிய நாணயங்களைப் பயன்படுத்துவது, பணப்பரிவர்த்தனைக்கு மாற்று வழிகளை உருவாக்குவது போன்ற திட்டங்கள் வகுக்கப்பட்டிருந்ததாக தெரிவிக்கப்பட்டுள்ளது. ரஷ்யா–ஈரான் இடையேயான வர்த்தகத்தில் டாலர் உள்ளிட்ட சர்வதேச நாணயங்களின் பயன்பாட்டைக் குறைத்து, ரூபிள் உள்ளிட்ட இரு நாடுகளின் சொந்த நாணயங்களை அதிகம் பயன்படுத்தத் திட்டமிடப்பட்டிருக்கிறது.

மேலும், இரு நாடுகளுக்கு இடையேயான பணப் பரிவர்த்தனைகளை எளிதாக்க டிஜிட்டல் நாணயங்களைப் பயன்படுத்துவது குறித்தும் ஆய்வு செய்யப்பட்டதாக தெரிவிக்கப்பட்டுள்ளது. 2025 பிப்ரவரியில், ஈரானுடனான பெரும்பாலான பணப்பரிவர்த்தனைகள் சர்வதேச நாணயங்களைத் தவிர்த்து நடைபெறுவதாக ரஷ்ய அதிகாரிகள் தெரிவித்துள்ளனர்.

அதாவது, SWIFT போன்ற மேற்கத்திய நிதி அமைப்புகளைச் சார்ந்திருக்காமல் இரு நாடுகளும் தங்களுக்கான மாற்று பணப்பரிவர்த்தனை முறைகளை பயன்படுத்தத் தொடங்கியதாக தகவல்கள் தெரிவிக்கின்றன. மேலும், ஈரானின் Shetab பணப்பரிவர்த்தனை அமைப்பையும், ரஷ்யாவின் MIR அமைப்பையும் இணைக்கும் பணிகளும் நடைபெற்றதாக கூறப்படுகிறது. இந்த ஒத்துழைப்பு நிதித் துறையுடன் மட்டும் நின்றுவிடவில்லை. ஈரானில் உள்ள புஷெர் (Bushehr) அணுமின் நிலையத்திலும் ரஷ்யா முக்கியப் பங்கு வகிக்க திட்டமிட்டிருந்ததாக கூறப்படுகிறது. ரஷ்யாவின் அரசு அணுசக்தி நிறுவனமான ரோசாட்டம் (Rosatom), அணுமின் நிலையத்தின் பணிகளை மேற்கொள்ள திட்டமிட்டிருந்ததாக தெரிகிறது.

முதல் அணு உலைக்கான எரிபொருள் மற்றும் பராமரிப்பு பணிகள் மட்டுமின்றி, 2 மற்றும் 3-வது அணு உலைகளுக்கான பணிகளும் இதில் இடம்பெற்றிருந்ததாக கூறப்படுகிறது.

அதேபோல், ஈரானின் எண்ணெய் மற்றும் எரிவாயு துறையிலும் ரஷ்ய நிறுவனங்களின் பங்களிப்பை அதிகரிக்க திட்டமிடப்பட்டிருந்ததாக தகவல்கள் தெரிவிக்கின்றன. இதில் ஷாதிகான் கிஷ் (Shadegan Kish) மற்றும் நார்த் பார்ஸ் (North Pars) உள்ளிட்ட பகுதிகளும் அடங்கும். இந்நிலையில், அமெரிக்க அதிபர் டொனால்டு ட்ரம்ப் ஈரானுக்கு எதிரான தனது கடுமையான நிலைப்பாட்டை வெளிப்படுத்தியுள்ளார்.

ஃபாக்ஸ் நியூஸ் நேர்காணலில், ஈரான் ஒப்பந்தத்தை ஏற்க வேண்டும் அல்லது பொருளாதாரத் தடைகளின் அழுத்தத்தை எதிர்கொள்ள வேண்டும், இல்லையெனில் அமெரிக்காவின் கடுமையான ராணுவ நடவடிக்கையை சந்திக்க நேரிடலாம் என்ற வகையில் அவர் பேசியதாக அந்த ஆவணம் குறிப்பிடுகிறது.

அதே நேரத்தில், ஈரான் அதிபர் மசூத் பெசெஷ்கியான் ஐ.நா. பொதுச்சபை கூட்டத்தில் பங்கேற்க நியூயார்க் செல்ல உள்ளதாகவும், அமெரிக்க அதிபருடன் சந்திப்புக்கான வாய்ப்பு இருப்பதாகவும் தெரிவிக்கப்பட்டுள்ளது. ஈரான் தரப்போ, அமெரிக்கா முதலில் ராணுவ நடவடிக்கைகளை நிறுத்த வேண்டும், கடற்படை முற்றுகையை நீக்க வேண்டும், முடக்கப்பட்ட ஈரானிய சொத்துகளை விடுவிக்க வேண்டும் உள்ளிட்ட கோரிக்கைகளை முன்வைத்துள்ளதாக கூறப்படுகிறது.