பாப் இசை உலகின் மன்னன் மைக்கேல் ஜாக்சனின் நெவர்லேண்ட் பண்ணை விற்கப்பட்டுள்ளதாக தெரிவிக்கப்பட்டுள்ளது. கலிபோர்னியாவில் அமைந்துள்ள இந்த பண்ணை மைக்கேல் ஜாக்சன் மறைந்து 11 ஆண்டுகள் கடந்த நிலையில் விற்பனை ஆகியுள்ளது. கடந்த 2005 ஆம் ஆண்டிற்கு பிறகு ஜாக்சன் இந்த பண்ணைக்கு வரவில்லை எனவும் சொல்லப்படுகிறது.
சுமார் 2700 ஏக்கர் பரப்பளவில் விரிந்துள்ள இந்த பண்ணையை ஜாக்சன் கடந்த 1988இல் வாங்கியிருந்தார். பங்களா, தீம் பார்க், ரயில் என இந்த பண்ணையில் இடம் பெற்றிருந்த ஒவ்வொன்றும் தனி ரகம். கடந்த 2005 இல் ஜாக்சன் மீது எழுந்த பாலியல் புகாரை அடுத்து இந்த இடத்திற்கு வருவதையே அவர் நிறுத்திக் கொண்டார். இருப்பினும் 1988 முதல் 2005 வரை ஜாக்சனின் வசிப்பிடமாக இருந்தது இந்த பண்ணை தான்.
இந்நிலையில் ஜாக்சனின் குடும்ப நண்பரான ரோன் புர்க்லே இந்த பண்ணையை 22 மில்லியன் அமெரிக்க டாலர்களுக்கு வாங்கியுள்ளதாக சொல்லப்படுகிறது. இவர் ரியல் எஸ்டேட் முதலீட்டாளர் என்பதும் குறிப்பிடத்தக்கது.
