நெதன்யாகுவுக்கு நெருக்கடி! இஸ்ரேலில் அரசியல் குழப்பம்! யார் அடுத்த பிரதமர்?

இஸ்ரேல் அரசியலில் இப்போது மிகப்பெரிய குழப்பம் ஏற்பட்டிருக்கிறது. தேர்தலில் அதிக இடங்களைப் பிடித்தும் ஆட்சி அமைக்க முடியாமல் தவிக்கிறார் தற்போதைய பிரதமர் பெஞ்சமின் நெதன்யாகு. 'நான்தான் அடுத்த பிரதமர்... என்னுடன் இணைந்து ஆட்சி அமைக்க ஆதரவு தாருங்கள்' என மற்ற கட்சிகளுக்கு அழைப்பு விடுத்திருக்கிறார். என்ன நடக்கிறது இஸ்ரேலில்? தேர்தலில் வெற்றி பெற்றும் நெதன்யாகுவால் ஏன் ஆட்சி அமைக்க முடியவில்லை? என்பதை விரிவாக பார்க்கலாம்.

இஸ்ரேல் நாடாளுமன்றத்தின் பெயர் நெசட் (Knesset). இங்கு மொத்தம் 120 உறுப்பினர்கள் இருக்கிறார்கள். இந்த 120 இடங்களில் குறைந்தது 61 இடங்களின் ஆதரவு இருந்தால்தான் ஒரு கட்சியோ அல்லது கூட்டணியோ ஆட்சி அமைக்க முடியும். கடந்த அக்டோபர் 27ஆம் தேதி இஸ்ரேலில் நாடாளுமன்றத் தேர்தல் நடைபெற்றது. இந்தத் தேர்தலில் தற்போதைய பிரதமர் பெஞ்சமின் நெதன்யாகுவின் லிகுட் கட்சி கூட்டணிக்கு 53 இடங்கள் கிடைத்திருக்கிறது.

அதாவது ஆட்சி அமைக்கத் தேவையான 61 இடங்களை விட 8 இடங்கள் குறைவு. அதேபோல, முன்னாள் ராணுவத் தளபதி காடி ஐசன்கோட் தலைமையிலான எதிர்க்கட்சி அணிக்கு 48 இடங்கள் கிடைத்திருக்கின்றன. மீதமுள்ள 19 இடங்களை அரபு கட்சிகள் கைப்பற்றியிருக்கின்றன.

குறிப்பாக, அரபு கட்சிகள் 19 இடங்களைப் பெற்றிருப்பது இஸ்ரேல் தேர்தல் வரலாற்றிலேயே ஒரு முக்கியமான சாதனையாகப் பார்க்கப்படுகிறது. ஆக, இப்போது எந்த அணிக்கும் தனிப்பெரும்பான்மை இல்லை. இதுதான் இஸ்ரேலில் ஆட்சியமைப்பதில் இழுபறி ஏற்படுவதற்கு முக்கியமான காரணம்.

சரி.. இந்த 19 இடங்களைப் பெற்ற அரபு கட்சிகள் யாருக்கு ஆதரவு கொடுத்தாலும் ஆட்சி அமைத்துவிடலாமே? இதில்தான் அடுத்த சிக்கல் இருக்கிறது. அரபு கட்சிகளின் கூட்டணியில் முக்கியமாக ராம் (Ra'am), ஜாயிண்ட் லிஸ்ட் (Joint List) ஆகிய கட்சிகள் இருக்கின்றன. நெதன்யாகு தலைமையிலான கூட்டணி இந்தக் கட்சிகளின் ஆதரவைச் சார்ந்து ஆட்சி அமைக்க விரும்பவில்லை என்று தெரிவித்திருக்கிறது.

அதேபோல, எதிர்க்கட்சித் தலைவர் காடி ஐசன்கோட் அணிக்கும் அரபு கட்சிகளின் ஆதரவைப் பெறுவதில் அரசியல் சிக்கல்கள் இருக்கின்றன. ஏனென்றால், அந்த ஆதரவைப் பெற்றால் தங்களுடைய கூட்டணிக்குள்ளேயே கருத்து வேறுபாடுகள் உருவாகலாம். மேலும், வாக்காளர்களிடமும் அதிருப்தி ஏற்படலாம் என்ற நிலை இருக்கிறது. இதனால் 19 இடங்களை வைத்திருக்கும் அரபு கட்சிகள், ஆட்சியமைப்பதில் முக்கியப் பங்கு வகிக்கக்கூடிய நிலையில் இருந்தாலும், அவர்களுடைய ஆதரவைப் பெறுவது அவ்வளவு எளிதாக இல்லை.

இந்தச் சூழலில்தான் நெதன்யாகு புதிய அழைப்பை விடுத்திருக்கிறார். தனது எக்ஸ் பக்கத்தில் அவர் வெளியிட்ட பதிவில், இஸ்ரேலில் ஒரு பரந்த தேசிய அரசாங்கத்தை அமைக்கத் தயாராக இருப்பதாகத் தெரிவித்திருக்கிறார். மேலும், ராம் மற்றும் ஜாயிண்ட் லிஸ்ட் போன்ற கட்சிகளைச் சார்ந்து இயங்கும் அரசாங்கத்தை இஸ்ரேல் மக்கள் விரும்பவில்லை என்றும் குறிப்பிட்டிருக்கிறார். இந்தக் கட்சிகள் பயங்கரவாதத்தை ஆதரிப்பதாகவும், யூத நாட்டின் இருப்பை ஏற்க மறுப்பதாகவும் அவர் குற்றம்சாட்டியிருக்கிறார்.

அதுமட்டுமல்லாமல், யூத மக்களில் பெரும்பான்மையானவர்கள் தன்னையும், தன்னுடைய லிகுட் கட்சியையும்தான் தேர்ந்தெடுத்திருப்பதாகவும், அடுத்த அரசாங்கத்தைத் தானே வழிநடத்த வேண்டும் என்றும் அந்தப் பதிவில் அவர் வலியுறுத்தியிருக்கிறார்.

தன்னுடன் இணைந்து ஆட்சி அமைக்க விரும்பும் கட்சிகளுடன் பேச்சுவார்த்தை நடத்தத் தயாராக இருப்பதாகவும் அழைப்பு விடுத்திருக்கிறார். இதற்கிடையில், புதிய அரசாங்கம் பதவியேற்கும் வரை நெதன்யாகுவே பிரதமராகத் தொடர்ந்து செயல்படுவார். நவம்பர் 4ஆம் தேதி இறுதி அதிகாரப்பூர்வ முடிவுகள் வெளியிடப்பட உள்ளன. தேர்தல் முடிவுகள் அதிகாரப்பூர்வமாகச் சான்றளிக்கப்பட்ட பிறகு, இஸ்ரேல் அதிபர் ஐசக் ஹெர்சாக் அரசியல் கட்சிகளுடன் ஆலோசனை நடத்தி, யாருக்கு ஆட்சி அமைக்க வாய்ப்பு வழங்குவது என்பதை முடிவு செய்வார்.