ஹாங்காங்: அடுக்குமாடி குடியிருப்பில் தீ விபத்து.. 44 பேர் பலி.. 279 பேர் மாயம்!
ஹாங்காங்கின் டாய் போ மாவட்டத்தில் உள்ள 32 அடுக்குமாடி குடியிருப்பில் ஏற்பட்ட தீ விபத்தில் உயிரிழப்பு 44 ஆக உயர்ந்துள்ளது. 279 பேர் மாயமாக உள்ளனர். மூங்கில் சாரத்தில் ஏற்பட்ட தீ பலத்த காற்றால் ஏழு கட்டிடங்களுக்கு பரவியது. 'லெவல் 5' அபாய எச்சரிக்கை அறிவிக்கப்பட்டு, மீட்புப் பணிகள் தீவிரமாக நடைபெறுகின்றன.
ஹாங்காங்கில் அடுக்குமாடி குடியிருப்பு வளாகத்தில் ஏற்பட்ட தீ விபத்தில், உயிரிழந்தவர்களின் எண்ணிக்கை 44ஆக உயர்ந்துள்ளது.
இரண்டாயிரம் குடியிருப்புகள் உள்ள 32 மாடிகளைக் கொண்ட அடுக்குமாடி கட்டிடத்தின் புதுப்பித்தல் பணிக்காக அதன் வெளிப்புறத்தில் மூங்கில் சாரம் அமைக்கப்பட்டிருந்தது. அந்த சாரத்தில் ஏற்பட்ட தீ பலத்த காற்று காரணமாக அசுர வேகத்தில் அங்கிருந்து ஏழு கட்டிடங்களுக்கு பரவியதாக சொல்லப்படுகிறது..
இதுவரை இல்லாத பயங்கர தீவிபத்து காரணமாக மிக உயர்ந்த அவசரகால அளவான 'லெவல் 5' அபாய எச்சரிக்கை அறிவிக்கப்பட்டு, மீட்புபணிகள் நடைபெற்றுவருகின்றன. விபத்து கடந்த புதன்கிழமை ஏற்பட்டது..
ஹாங்காங்கில் டாய் போ மாவட்டத்திலுள்ள வாங் ஃபுக் கோர்ட் குடியிருப்பு வளாகத்தில், பெரியஅளவிலான தீ விபத்து ஏற்பட்டது. இதில் சிக்கி இதுவரை 44 பேர் உயிரிழந்துள்ளனர். மேலும் 45 படுகாயமடைந்து, மருத்துவமனையில் கவலைக்குரிய நிலையில் சிகிச்சைக்காக அனுமதிக்கப்பட்டுள்ளனர்.
2 ஆயிரம் வீடுகளைக்கொண்ட குடியிருப்பில் வசித்தவர்களில், 279 பேரின் நிலை என்ன என்பதே தெரியாத நிலை உள்ளது. நேற்று உயிரிழப்பு எண்ணிக்கை 36ஆக இருந்த நிலையில், இன்று காலை 44ஆக உயர்ந்துள்ளது.. மேலும் உயிரிழப்பு எண்ணிக்கை அதிகரிக்கக்கூடும் எனஅஞ்சப்படுகிறது.
இதற்கிடையே, இந்த தீவிபத்திற்கு காரணமானவர்களாக சந்தேகிக்கப்படும் மூன்று நபர்களை காவல் துறையினர் கைது செய்து, விசாரணை மேற்கொண்டுவருகின்றனர்.
