ஜி.எஸ்.டி., குறியீட்டு எண்ணான HSN CODE, பிளாஸ்டிக் மறுசுழற்சிக்கு என்று தனியாக இல்லாததால் கூடுதல் சுமைக்கு உள்ளாகி வருவதாக கூறுகின்றனர் கோவை பிளாஸ்டிக் மறுசுழற்சி மற்றும் விற்பனையாளர்கள் சங்கத்தினர். உலக அளவில் ஒவ்வொரு ஆண்டும் 400 முதல் 500 மில்லியன் டன் பிளாஸ்டிக் கழிவுகள் உற்பத்தியாகின்றன. ஆனால் மொத்த உற்பத்தியில் 10-15 சதவிகிதம் மட்டுமே மறுசுழற்சி செய்யப்படுகின்றன.
பிளாஸ்டிக் ஒழிப்பு என்பது தற்சமயம் சாத்தியமில்லாத நிலையில், சுற்றுச்சூழல் மாசை ஓரளவிற்கு குறைக்கும் பிளாஸ்டிக் மறுசுழற்சி நிறுவனங்கள் மூடுவது, பொருளாதார பாதிப்பு என்பதை கடந்து, சூழலியல் பாதிப்பு என்பதை உணர்ந்து மத்திய, மாநில அரசுகள் தேவையான நடவடிக்கைகள் எடுக்க வேண்டும் என்கிறார்கள் இத்துறையினர்.
