முன்னாள் குடியரசுத் தலைவர் அப்துல் கலாமின் நினைவு மண்டபத்தை பிரதமர் மோடி திறந்துவைத்து பார்வையிட்டார்.
இதையடுத்து கலாமின் வாழ்க்கையை விவரிக்கும் கண்காட்சி பேருந்து பயணத்தையும் அவர் தொடங்கிவைத்தார். இதுதவிர ராமேஸ்வரம் - அயோத்தி இடையே புதிய ரயில் சேவையைத் தொடங்கி வைத்தார்.
மறைந்த முன்னாள் ஜனாதிபதி டாக்டர் அப்துல் கலாமின் 2 ஆம் ஆண்டு நினைவு தினத்தை முன்னிட்டு, அவரது உடல் அடக்கம் செய்யப்பட்டுள்ள இடத்தில், மத்திய பாதுகாப்பு ஆராய்ச்சி மற்றும் மேம்பாட்டு அமைப்பின் சார்பில், 'அப்துல் கலாம் தேசிய நினைவகம்' கட்டப்பட்டுள்ளது. கலாமின் 2 ஆம் நினைவு தினமான இன்று, பிரதமர் நரேந்திர மோடி திறந்துவைத்தார்.
கலாமின் 2 ஆம் ஆண்டு நினைவு தினத்தை முன்னிட்டு, அவரது வாழ்க்கையைச் சித்திரிக்கும் கண்காட்சி, கலாம் நினைவிடம் அருகே அமைக்கப்பட்டுள்ளது. நிலக்கரி ஓவியம், பென்சில் ஓவியம், காகித ஓவியம் எனப் பல தரப்பட்ட பொருள்களால் கலாமின் உருவம் சித்திரிக்கப்பட்டு, காட்சிக்கு வைக்கப்பட்டுள்ளன.
