தமிழகத்தில் ஜூன் 14 வரை சில தளர்வுகளுடன் ஊரடங்கு நீட்டிக்கப்பட்டுள்ளது. கொரோனா பாதிப்பு அதிகமுள்ள கோவை, திருப்பூர், சேலம், ஈரோடு உள்ளிட்ட 11 மாவட்டங்களில் மட்டும் கடும் கட்டுப்பாடுகளுடன் ஊரடங்கு நீட்டிக்கப்பட்டுள்ளது.
வெங்கையா நாயுடு கணக்கில் மாற்றம் செய்த டிவிட்டர்: துணை ஜனாதிபதி வெங்கையா நாயுடுவின் தனிப்பட்ட டிவிட்டர் பக்கத்தில் ப்ளூ டிக் நீக்கப்பட்டது. உறுதிபடுத்தப்பட்ட கணக்கு என்ற தகுதி நீக்கப்பட்டதால் எதிர்ப்பலைகள் கிளம்பியுள்ளது.
கல்லூரி ஆன்லைன் வகுப்புக்கு விரைவில் புதிய விதிகள்: தமிழகத்தில் கல்லூரி ஆன்லைன் வகுப்புகளுக்கு கட்டுப்பாடு கொண்டுவரப்படுகிறது. புதிய விதிமுறைகளை வகுக்க 7 பேர் கொண்ட குழு அமைக்கப்பட்டுள்ளது.
+2 தேர்வு நடைபெறுமா? ரத்து செய்யப்படுமா?: தமிழகத்தில் பிளஸ் டூ தேர்வுகளை நடத்துவதா? ரத்து செய்வதா? என்பது குறித்து முதலமைச்சர் மற்றும் சட்டமன்ற கட்சி பிரதிநிதிகளிடம் பள்ளிக் கல்வித் துறை அமைச்சர் இன்று ஆலோசிக்கிறார்.
ஓபிஎஸ்-உடன் ஈபிஎஸ் திடீர் சந்திப்பு: அதிமுக ஒருங்கிணைப்பாளர் ஓ.பன்னீர்செல்வத்துடன் இணை ஒருங்கிணைப்பாளர் எடப்பாடி பழனிசாமி ஆலோசனை நடத்தினார். கட்சியின் தலைமை அலுவலகத்தில் நடந்த கூட்டத்தில் ஓபிஎஸ் பங்கேற்காத நிலையில் இந்த திடீர் சந்திப்பு நடந்துள்ளது.
நிலம் கையகப்படுத்தியதில் ரூ.200 கோடி முறைகேடு: சென்னை - பெங்களூரு தேசிய நெடுஞ்சாலை விரிவாக்கத் திட்டத்திற்கு நிலம் கையகப்படுத்தியதில் 200 கோடி ரூபாய் முறைகேடு செய்யப்பட்டது புதிய தலைமுறையின் கள ஆய்வில் அம்பலமானது.
9 சிங்கங்களுக்கு கொரோனா பாதிப்பு: சென்னை வண்டலூர் உயிரியல் பூங்காவில் 9 ஆசிய சிங்கங்களுக்கு கொரோனா பாதிப்பு உறுதி செய்யப்பட்டுள்ளது. அதில் ஒரு பெண் சிங்கம் பரிதாபமாக உயிரிழந்தது.
தினசரி பாதிப்பு 1.20 லட்சமாக குறைவு: இந்தியாவில் தினசரி கொரோனா பாதிப்பு ஒரு லட்சத்து 20 ஆயிரமாக குறைந்தது. கடந்த 24 மணி நேரத்தில் ஒரு லட்சத்து 97 ஆயிரம் பேர் தொற்றில் இருந்து குணமடைந்தனர்.
2ஆவது அலையில் கிராமப்புறங்களில் அதிக பாதிப்பு: கொரோனா 2ஆவது அலையில் நகரங்களைவிட கிராமப்புற பகுதிகளைச் சேர்ந்தவர்களுக்கே பாதிப்பு அதிகம் என டெல்லியைச் சேர்ந்த தன்னார்வ அமைப்பு நடத்திய ஆய்வில் தெரியவந்துள்ளது.
17 மாவட்டங்களில் கொரோனா குறைந்துள்ளது: தமிழகத்தில் 17 மாவட்டங்களில் கொரோனா பாதிப்பு குறைந்துள்ளதாக மருத்துவத்துறை செயலாளர் ராதாகிருஷ்ணன் அளித்த பேட்டியில் தெரிவித்துள்ளார். பிற மாவட்டங்களில் தொற்று பரவல் விரைவில் கட்டுக்குள் வரும் என்றும் நம்பிக்கை அளித்துள்ளார்.
கோவை, திருச்சி - இன்று தடுப்பூசி முகாம் கிடையாது: கோவை, திருச்சி, நாகர்கோவிலில் இன்று தடுப்பூசி முகாம்கள் நடைபெறாது என்று அறிவிக்கப்பட்டுள்ளது. தடுப்பூசிகள் கையிருப்பு நிலையை கருத்தில்கொண்டு மாவட்ட ஆட்சியர்கள் இந்த நடவடிக்கையை மேற்கொண்டுள்ளனர்.
மயிலாடுதுறை - ஊருக்குள் வந்த முதலை: மயிலாடுதுறை அருகே முதலை ஊருக்குள் புகுந்ததால் அங்கு பரபரப்பு ஏற்பட்டது. முதலையை இளைஞர்கள் கயிறு போட்டு மடக்கிப் பிடித்தனர்.
தமிழகத்தில் பரவலாக கனமழை: தமிழகத்தின் பல்வேறு மாவட்டங்களில் பரவலாக கனமழை பெய்துவருகிறது. டெல்டா மாவட்டங்களில் இன்று மிக கனமழைக்கு வாய்ப்பு என வானிலை மையம் தெரிவித்துள்ளது.
மின்னல் தாக்கி மின் நிலையம் தீப்பற்றியது: திருச்சி அருகே மின்னல் தாக்கியதில் துணை மின் நிலையம் தீப்பற்றி எரிந்தது. இதனால் நள்ளிரவில் 50க்கும் மேற்பட்ட கிராமங்களுக்கு மின்விநியோகம் பாதிக்கப்பட்டது.
ட்ரம்ப்பின் ஃபேஸ்புக் கணக்கு 2 ஆண்டுக்கு முடக்கம்: அமெரிக்க முன்னாள் அதிபர் ட்ரம்ப்பின் ஃபேஸ்புக் கணக்கு 2 ஆண்டுகளுக்கு முடக்கப்பட்டது. பதிவுகள் வன்முறையை தூண்டுவதாக எழுந்த புகாரில் ஃபேஸ்புக் நிறுவனம் இந்த அதிரடி முடிவை எடுத்துள்ளது.
4ஆவது சுற்றில் செரினா, மெத்வதேவ்: பிரெஞ்ச் ஓபன் டென்னிஸில் செரினா வில்லியம்ஸ் 4ஆவது சுற்றுக்கு முன்னேற்றம் அடைந்துள்ளார். முன்னணி வீரர் டேனில் மெத்வதேவ் காலிறுதிக்கு முந்தைய சுற்றுக்கு தகுதி பெற்றுள்ளார்.
