"நல்லா இருங்கோ"| கள்ளக்குறிச்சி இளைஞரின் மனு.. தமிழில் பேசி விசாரணை நடத்திய உச்ச நீதிமன்ற நீதிபதி!

கள்ளக்குறிச்சியைச் சேர்ந்த நவீன், பட்டியலினப் பெண் ஒருவரை காதலித்து, அவருடன் நெருங்கிப் பழகியிருக்கிறார். இதன் காரணமாக அந்தப் பெண் கர்ப்பமடைந்தார். அவரைத் திருமணம் செய்துகொள்ளும்படி அந்தப் பெண் வற்புறுத்தியபோது, நவீன் மறுத்துள்ளார். இதனையடுத்து, பாதிக்கப்பட்ட பெண் அளித்த புகாரின் பேரில் நவீன் கைது செய்யப்பட்டு கடலூர் சிறையில் அடைக்கப்பட்டார்.

இந்நிலையில் இளைஞர் நவீன் குற்றஞ்சாட்டப்பட்ட வழக்கில் ஜாமீன் கேட்டு கீழமை நீதிமன்றம் மற்றும் சென்னை உயர் நீதிமன்றத்தில் தாக்கல் செய்த மனுக்கள் தள்ளுபடி செய்யப்பட்டன.

இதைத் தொடர்ந்து, ஜாமீன் கேட்டு உச்ச நீதிமன்றத்தில் நவீன் மனு தாக்கல் செய்தார்.

உச்ச நீதிமன்றத்தில் இந்த வழக்கு விசாரணைக்கு வந்த நிலையில், நீதிபதிகள் நாகரத்னா மற்றும் சதீஷ் சந்திர சர்மா அடங்கிய அமர்வு இந்த வழக்கை விசாரித்தது. அப்போது, நவீனை காணொலிக் காட்சி மூலம் ஆஜராக உத்தரவிட்டது.

விசாரணையின்போது, நீதிபதி நாகரத்னா நவீனிடம் நேரடியாகத் தமிழில் பேசினார், "எப்போது திருமணம் செய்வீங்க?" என்று கேட்டார். அதற்கு நவீன், "நான் சிறையிலிருந்து வெளியே வந்ததும் திருமணம் செய்துகொள்கிறேன்" என்று உறுதியளித்தார். பின்னர், பாதிக்கப்பட்ட பெண்ணிடமும் "அவரை திருமணம் செய்துகொள்ள சம்மதமா?" என்று கேட்டார். இதனையடுத்து, நவீனுக்கு இடைக்கால ஜாமீன் வழங்கிய நீதிபதி, சில முக்கிய நிபந்தனைகளை விதித்தார். 

அதன்படி, நவீன் உடனடியாக அந்தப் பெண்ணைத் திருமணம் செய்துகொள்ள வேண்டும். திருமணத்தின் புகைப்படங்கள் மற்றும் ஆதாரங்களை நீதிமன்றத்தில் தாக்கல் செய்ய வேண்டும். திருமணத்திற்குப் பிறகு அந்தப் பெண்ணை கண்ணீரில்லாமல் பாதுகாப்பாகப் பார்த்துக் கொள்ள வேண்டும். இந்த நிபந்தனைகளை மீறினால், ஜாமீன் ரத்து செய்யப்படும். நவீனின் பெற்றோரிடமும் பேசிய நீதிபதி, மகனின் ஜாமீன் ரத்து செய்யப்படாமல் இருக்க, மருமகளைப் பத்திரமாகப் பார்த்துக்கொள்ள வேண்டும் என அறிவுறுத்தினார்.

பொதுவாக, உச்ச நீதிமன்றத்தில் ஆங்கிலத்தில் மட்டுமே வழக்கு விசாரணை நடக்கும். இந்த வழக்கின்போது, நீதிபதி நாகரத்னா தமிழில் பேசியது அனைவரையும் ஆச்சரியத்தில் ஆழ்த்தியது. தான் பெங்களூரில் வசித்தபோது, பக்கத்து வீட்டில் இருந்த தமிழ் குடும்பத்தின் மூலம் தமிழ் கற்றுக்கொண்டதாகவும், மராத்தி மற்றும் கொங்கணி மொழிகளும் தனக்குத் தெரியும் என்றும் அவர் தெரிவித்தார். விசாரணையின் இறுதியில், அந்தப் பெண்ணை நோக்கி "நல்லா இருங்கோ" என தமிழில் வாழ்த்தி வழக்கை ஆறு வாரங்களுக்கு ஒத்திவைத்தார். இந்த சம்பவம், நீதித்துறையில் மொழியின் முக்கியத்துவத்தையும், சமூகப் பொறுப்புணர்வையும் எடுத்துக்காட்டியது.