தேர்தல் திருவிழா: 5 மாநில தேர்தல் தேதி அறிவிப்பு... முழு விவரம்!

5 மாநிலங்களுக்கான தேர்தல் அட்டவணையை தலைமை தேர்தல் ஆணையர் சுனில் அரோரா வெளியிட்டார்.

டெல்லியில் இன்று செய்தியாளர்களைச் சந்தித்த இந்திய தலைமை தேர்தல் ஆணையர் சுனில் அரோரா 5 மாநிலங்களுக்கான தேர்தல் அட்டவணையை வெளியிட்டார். இது குறித்து அவர் கூறும்போது, “ கொரோனா காலம் கருதி முன்னெச்சரிக்கை நடவடிக்கையுடன் தேர்தல் நடத்துகிறோம். தேர்தல் நன்னடத்தை விதிகள் அமலுக்கு வந்துள்ளன.

தேர்தலை நடத்துவதில் மருத்துவர்கள், ஊழியர்கள் , செவிலியர்கள் உள்ளிட்டோருக்கு பெரும் பங்கு இருக்கிறது. தேர்தலுக்காக தமிழகத்தில் 88,936 வாக்குப்பதிவு மையங்கள் அமைக்கப்பட இருக்கின்றன. அனைத்து வாக்குப்பதிவு மையங்களும் தரைத்தளத்தில் இருப்பதை உறுதிப்படுத்த உத்தரவிடப்பட்டுள்ளது.

5 மாநிலங்களில் மொத்தம் 824 தொகுதிகளில் 18.68 கோடி வாக்காளர்கள் வாக்களிக்க தகுதி பெற்றுள்ளனர். மொத்தம் 2.7 லட்சம் வாக்குச்சாவடிகளில் வாக்குப்பதிவு நடைபெற உள்ளது. அனைத்து வாக்குப்பதிவு மையங்களும் தரைத்தளத்தில் இருப்பதை உறுதிப்படுத்த உத்தரவிடப்பட்டுள்ளது. 80 வயதுக்கு மேற்பட்டோர் விருப்பப்பட்டால் தபால் மூலம் வாக்களிக்கலாம். தேர்தல் பணியில் ஈடுபடும் அனைத்து பணியாளர்களுக்கும் கொரோனாத் தடுப்பூசி போடப்படும். வாக்குப்பதிவு நேரம் 5 மாநிலங்களிலும் ஒரு மணி நேரம் அதிகரிக்கப்பட்டுள்ளது. புதுச்சேரியில் வேட்பாளர்கள் ஒரு தொகுதிக்கு ரூ.22 லட்சமும், மற்ற 4 மாநிலங்களில் ரூ 30.8 லட்சம் செலவு செய்ய அனுமதிக்கப்பட்டுள்ளது.” என்றார்.