தமிழ்நாட்டில் பல்வேறு ரயில்வே திட்டங்களுக்காக ஒதுக்கப்பட்ட நிதி திருப்பி அனுப்பப்பட்டதா? உண்மை என்ன?
தமிழ்நாட்டில் பல்வேறு ரயில்வே திட்டங்களுக்காக ஒதுக்கப்பட்ட நிதி, திருப்பி அனுப்பப்பட்டதாக வெளியான செய்தி தவறானது என விளக்கம் அளிக்கப்பட்டுள்ளது.
தமிழ்நாட்டின் 12 ரயில்வே திட்டங்களுக்காக ஒதுக்கப்பட்ட நிதியை மத்திய ரயில்வே வாரியத்திடமே, தெற்கு ரயில்வே சரண்டர் செய்ததாக செய்திகள் வெளியாகின. இது, மக்கள் மத்தியில் பெரும் அதிர்ச்சியை ஏற்படுத்தியுள்ளது. மத்திய பட்ஜெட்டில் தமிழகத்தில் ரயில்வே திட்டங்களுக்கு ரூ.6,626 கோடி ஒதுக்கப்பட்டுள்ளது.
இதன்படி, தெற்கு ரயில்வேயில் தமிழகம், கேரளத்தில் நடைபெறும் 12 திட்டங்களுக்கு ஒதுக்கப்பட்ட ரூ.727.79 கோடி நிதியை பல்வேறு காரணங்களை முன்வைத்து தெற்கு ரயில்வே திருப்பி அனுப்பியுள்ளது என்று செய்திகள் வெளியானது.
இந்நிலையில், இதுகுறித்து விளக்கம் அளித்துள்ள தெற்கு ரயில்வே, நிதியை அடுத்த காலாண்டுகளுக்கு மாற்றுவது தொடர்பான தகவல் தவறாக புரிந்துகொள்ளப்பட்டு உள்ளதாக தெரிவித்துள்ளது.
குறிப்பிட்ட காலாண்டிற்குள் முழுமையாக பயன்படுத்தப்படாத நிதி, கூடுதல் நிதி தேவைப்படும் பிற திட்டங்களுக்கு மாற்றப்படுகிறது என்றும், தெற்கு ரயில்வேயில் நிதிப் பற்றாக்குறை இல்லை தேவைக்கேற்ப திட்டங்களுக்கு அதிகபட்ச நிதியை பெறுவதாகவும் குறிப்பிட்டுள்ளது. மேலும், தமிழ்நாடு மற்றும் கேரளாவில் அனுமதிக்கப்பட்ட அனைத்து திட்டங்களை நிறைவேற்ற உறுதிபூண்டுள்ளதாகவும் தெற்கு ரயில்வே விளக்கம் அளித்துள்ளது.
