”இளையராஜா பெருநிறுவனங்களுக்கு எதிராக போராடி வருகிறார்” - வழக்கறிஞர் சரவணன்

தீபாவளிக்கு வெளியான ’Dude’ திரைப்படத்தில், தனது இசையமைப்பில் வெளியான ’புது நெல்லு புது நாத்து’ என்ற திரைப்படத்தில் இடம்பெற்றிருந்த, ’கருத்த மச்சான்’ மற்றும் ’பணக்காரன்’ படத்தில் இடம்பெற்றிருந்த ’100 வருஷம்’ ஆகிய பாடல்களை தனது அனுமதியின்றி, உருமாற்றி பயன்படுத்தியுள்ளதாகக் கூறி இசையமைப்பாளர் இளையராஜா சென்னை உயர்நீதிமன்றத்தில் வழக்கு தாக்கல் செய்திருந்தார்.

அந்த மனுவில், ’Dude’ படத்தில் தனது இரண்டு பாடல்களையும் பயன்படுத்த தடை விதிக்க வேண்டும். மேலும், பாடல்களை நீக்கவும் உத்தரவிட வேண்டும் என்று கோரிக்கை விடுத்திருந்தார். இவ்வழக்கு நீதிபதி என்.செந்தில்குமார் அமர்வு முன்பு விசாரணைக்கு வந்தது.

அப்போது, இளையராஜா தரப்பில், தனது அனுமதி இல்லாமல் பதிப்புரிமைச் சட்டத்தை மீறும் வகையில் இந்த பாடல்கள் படத்தில் பயன்படுத்தப்பட்டுள்ளன. எனவே, பாடல்களை பயன்படுத்த தடை விதிக்க வேண்டும் என்று வாதிடப்பட்டது.

’Dude’ திரைப்பட தயாரிப்பு நிறுவனமான மைத்திரி மூவி மேக்கர்ஸ் நிறுவனம் தரப்பில், பாடல்களின் உரிமையை எக்கோ நிறுவனத்திடமிருந்து சோனி நிறுவனம் பெற்றிருந்ததாகவும், சோனி நிறுவனத்திடம் இருந்து அனுமதியை பெற்று, இந்த பாடல்களை படத்தில் பயன்படுத்தப்பட்டுள்ளதாக தெரிவிக்கப்பட்டது.

இந்நிலையில், இருதரப்பு வாதங்களையும் கேட்ட நீதிபதி, இளையராஜாவின் பாடல்களை உருமாற்றி பயன்படுத்தியுள்ளதற்கு முகாந்திரம் உள்ளது. அவரது பாடல்களின் புனிதத்துக்கும், அவரது நற்பெயருக்கும் பாதிப்பு ஏற்படுத்தும் வகையில் அனுமதியின்றி பயன்படுத்தப்பட்டுள்ளது எனக் கூறி, ’dude’ படத்தில் இளையராஜாவின் பாடல்களை பயன்படுத்த இடைக்கால தடை விதித்து உத்தரவிட்டுள்ளார்.

மேலும், மனுவுக்கு பதிலளிக்கும்படி மைத்திரி மூவி மேக்கர்ஸ் நிறுவனத்துக்கு உத்தரவிட்டு, 2026 ஜனவரி 7ஆம் தேதிக்கு வழக்கைத் தள்ளிவைத்தார். அப்போது, இந்த உத்தரவை அமல்படுத்தும் வகையில், படத்தில் இடம்பெற்றுள்ள பாடல்களை நீக்க ஏதுவாக ஒருவார அவகாசம் வழங்க வேண்டும் என பட நிறுவனம் தரப்பு கோரிக்கையை நீதிபதி ஏற்க மறுத்து விட்டார்.

இந்த வழக்கு குறித்து இளையராஜா தரப்பு வழக்கறிஞர் சரவணன் செய்தியாளர்களிடம் விளக்கமளித்துப் பேசினார். அப்போது, ”Dude படத்தில் இசைஞானியின் அனுமதியின்றி பயன்படுத்தப்பட்ட பாடல்களை நீக்க உத்தரவிடப்பட்டுள்ளது. இது இசைஞானிக்கு கிடைத்த வெற்றி. இந்த வழக்கில், பாடலுக்கான முழு உரிமை இசையமைபாளருக்கே இருக்கிறது என்ற வாதத்தை வைத்தோம். ஆனால், எதிர்தரப்பிலிருந்து தயாரிப்பாளர்களுக்கும் எல்லா உரிமையும் இருக்கிறது என்ற வாதத்தை வைத்தார்கள். இந்நிலையில், நீதியரசர் செந்தில் குமார் எந்தவகையில் இந்தத் தடையை கொடுத்திருக்கிறார் என்றால், பதிப்புரிமை சட்டம் பிரிவு 57-ஐ மீறி, படைப்பாளர் ஒருவரின் படைப்பை அவரின் புகழுக்கு களங்கம் ஏற்படுத்தும் வகையில் உருமாற்றம் செய்து Dudu படத்தில் பயன்படுத்தியிருக்கிறார்கள் என நாங்கள் வைத்த வாதத்தை ஏற்று, நீதிபதி இந்த தீர்ப்பை அளித்துள்ளார். தொடர்ந்து, இளையராஜாவின் பெயர் மற்றும் புகைப்படத்தை வணிக நோக்கில் பயன்படுத்த தடை விதிக்கப்பட்டிருந்தது. அதை சிலர், பகடி செய்து கொண்டிருக்கிறார்கள். ஆனால், ரஜினிகாந்த், அமிதாப் பச்சன் போன்றோருக்கும், அவர்களின் பெயர் மற்றும் புகைப்படத்தை வணிக நோக்கில் பயன்படுத்தத் தடை வாங்கியிருக்கிறார்கள். பெருநிறுவனங்கள் இளையராஜாவை பயன்படுத்தி வணிகரீதியாக பணம் ஈட்டிக் கொண்டிருக்கிறார்கள். இளையராஜா அவரின் உரிமைக்காக பெருநிறுவனங்களுடன் போராடி வருகிறார்” எனத் தெரிவித்துள்ளார்.