Heguru பயிற்சி சர்ச்சை| ’ரோபோ சங்கர் மகள்’ பரப்பிய தவறான தகவல்.. உண்மை இதுதான்! FACT Check!

நடிகர் ரோபோ சங்கரின் மகள் இந்திரஜா, விஜயின் பிகில் படத்தில் ‘பாண்டியம்மாள்’ கதாபாத்திரத்திலும், கார்த்தியின் விருமன் படத்திலும் நடித்ததன் மூலம் ரசிகர்களுக்கு பரீட்சையமானவர்.

கடந்தாண்டு கார்த்திக் என்பவருடன் திருமணம் செய்துகொண்ட இந்திரஜாவிற்கு 6 மாத ஆண் குழந்தை ஒன்று உள்ளது. திருமணத்திற்கு பிறகு திரைப்படங்களில் நடிப்பதை தவிர்த்த இந்திரஜா, குழந்தை பிறந்ததற்கு பிறகு குழந்தை வளர்ப்பு மற்றும் குழந்தைகளுக்கு தேவையான பொருட்களை பயன்படுத்துவது குறித்து யூடியூப்பிலும், இன்ஸ்டாகிராமிலும் வீடியோ பதிவுகளை போடுவதை வாடிக்கையாக கொண்டுள்ளார்.

இந்த சூழலில் சமீபத்தில் அவரின் 6 மாத கைக்குழந்தைக்கு ஹெகுரு (Heguru) என்ற பயிற்சி முறையை கற்பித்ததாகவும், அது குழந்தைக்கு அறிவுத்திறனை வளர்க்க உதவுவதாகவும் கூறி வீடியோ ஒன்றை பதிவிட்டதாக கூறப்படுகிறது. அந்த வீடியோவை எதிர்ப்பார்க்காத நெட்டிசன்கள் 6 மாத குழந்தைக்கு எதற்கு பயிற்சி, குழந்தையை அவர்களாகவே வளரவிடுங்கள் என்ற கருத்தையும், வீடியோ போட்டதற்காக விமர்சித்தும் கருத்து தெரிவித்துள்ளனர்.

இந்நிலையில் தாங்கள் எதிர்கொண்ட விமர்சனங்களுக்கும், நெட்டிசன்களால் எழுப்பப்பட்ட கேள்விகளுக்கும் விளக்கமளித்து ’உங்கள் பாண்டியம்மா’ என்ற யூடியூப் சேனலில் விளக்க வீடியோ ஒன்றை இந்திரஜாவும், அவருடைய கணவரும் சேர்ந்து வெளியிட்டுள்ளனர். அந்த வீடியோவில் இந்திய அரசு குழந்தை வளர்ப்பு குறித்து பல்வேறு விசயங்களை செய்துள்ளதாக தெரிவித்துள்ளனர்.

ஆனால் அவர்கள் பகிர்ந்துள்ள பெரும்பாலான தகவல்கள் தவறானது என்றும், அதை பின்பற்ற வேண்டாம் என்றும் தமிழ்நாடு அரசின் கீழ் இயங்கும் உண்மை சரிபார்ப்பு அமைப்பு FACT CHECK செய்து அறிக்கை வெளியிட்டுள்ளது.

தமிழ்நாடு அரசின் கீழ் இயங்கும் உண்மை சரிபார்ப்பு அமைப்பு வெளியிட்டிருக்கும் FACT CHECK அறிக்கையில், ”ஹெகுரு பயிற்சி குறித்து யூடியூபர் இந்தரஜா மற்றும் அவரது கணவர் யூடியூப் பக்கத்தில் வெளியிட்ட காணொளி சர்ச்சையான நிலையில், அதற்கு அவர்கள் விளக்கமளித்து வெளியிட்ட காணொளியில் பல தவறான தகவல்கள் உள்ளன.

தவறான தகவல் 1 : ஹெகுரு என்ற கல்விமுறை/பயிற்சியைப் பற்றி இந்திய அரசு நவ்சேத்னா என்ற வழிகாட்டும் நெறிமுறையை வெளியிட்டுள்ளது. அதை அடிப்படையாக வைத்து தான் இந்த பயிற்சி மையம் செயல்படுகிறது.

இது முற்றிலும் பொய்யான தகவல். மகளிர் மற்றும் குழந்தைகள் மேம்பாட்டுத் துறை வெளியிட்ட Navchetana - National framework for early childhood stimulation for children from birth to three years, 2024. இது குழந்தை நலன் மற்றும் பராமரிப்பு குறித்த கட்டமைப்பு தொடர்பான ஆவணம். இதில் ஹெகுரு குறித்தோ, Right-Brain activation குறித்தோ எந்த தகவலும் இல்லை. இதிலுள்ள “Early childhood stimulation” என்ற வார்த்தையை மட்டும் வைத்து, இந்த கட்டமைப்பு குறித்த செய்திகளைத் திரித்து கூறுகின்றனர்.

தவறான தகவல் 2 : தமிழ்நாட்டில் குழந்தைகளின் சிந்தனைத் திறன் குறைந்துள்ளது. 20 ஆண்டுகளுக்கு முன்பிருந்த சிந்தனைத் திறன் வெகுவாக குறைந்துள்ளதாக ஆய்வுகள் தெரிவிக்கின்றன.

தமிழ்நாட்டில் குழந்தைகளின் சிந்தனைத் திறனோ, மூளை வளர்ச்சியோ குறைந்ததாக எந்த தரவுகளும் இல்லை. இந்த தகவல் அவர்கள் குறிப்பிடும் நவ்சேத்னாவிலும் இல்லை.

தவறான தகவல் 3 : ஒன்றிய அரசு இந்த Right-Brain activation பயிற்சி முறையை செயல்படுத்த தனியாக பட்ஜெட் ஒதுக்கியுள்ளது.

அரசாங்கம் குழந்தைகள் நலன் சார்ந்த திட்டங்கள் பலவற்றை செயல்படுத்தி வருகிறது. ஆனால் இந்த Right-Brain activation அல்லது ஹெகுரு போன்ற பயிற்சிகளை ஊக்குவிக்கவோ, நடைமுறைப்படுத்தவோ அரசு எந்தத் தொகையும் பட்ஜெட்டில் ஒதுக்கவில்லை.

தவறான தகவல் 4: குழந்தை பிறந்தவுடன் கூட அங்கன்வாடியில் சேர்க்க அரசு திட்டம் வகுத்துள்ளது.

இது திரிக்கப்பபட்ட தகவல், நவ்சேத்னா குழந்தைகளை மூன்று வயது வரை வீட்டில் வளர்ப்பதையே ஊக்குவிக்கிறது. குழந்தையைப் பராமரிக்க வாய்ப்பில்லாத நிலையில் அங்கன்வாடியில் சேர்க்கலாம் என்று பரிந்துரைக்கிறது.

மேலும், ஹெகுரு ஒரு கல்விமுறை இல்லை, இது ஒரு Activity என்றும் கூறுகிறார். இதுவும் தவறான தகவல். சென்னையில் செயல்படும் ஹெகுரு பயிற்சி மையத்தின் சமூக வலைதளப் பக்கத்தில் இது ‘JAPAN CERTIFIED RIGHT BRAIN EDUCATION’ என்றுதான் குறிப்பிட்டுள்ளனர். அவர்களது இணையதளப் பக்கத்திலும் “RIGHT BRAIN EDUCATION” என்றுதான் குறிப்பிட்டுள்ளனர்.

தவறான தகவல்களைப் பரப்பாதீர்!” என விளக்கம் அளித்து பகிர்ந்துள்ளது.