அதிமுக பொதுச்செயலாளர் எடப்பாடி பழனிசாமி பேசுகையில், “எனக்கு முன் பேசியவர்கள் அடுத்தாண்டு நடைபெறும் சட்டமன்ற தேர்தல் குறித்து தெளிவாக பேசினார்கள்., திமுகவை தமிழ்நாட்டில் இருந்து அகற்ற வேண்டுமென்பதற்காகத்தான் எம் ஜி ஆர் அதிமுகவை தொடங்கினார்கள். அதன்பின் அம்மா பல்வேறு சோதனைகளைத் தாங்கி கழகத்தை கட்டிக்காத்தார்கள். பல்வேறு தரப்பட்ட மக்களுக்கும் நன்மை பயக்கும் திட்டங்களைக் கொண்டுவந்தார்கள் நமது இருபெரும் தலைவர்கள்.
ஆட்சியில் இருக்கும்போதும் ஊடகத்தினர் நம்மை விமர்சனம் செய்தார்கள். எதிர்க்கட்சியாக இருக்கும்போதும் நம்மைத்தான் விமர்சிக்கிறார்கள். அதிமுக இருப்பதால்தான் ஊடகங்கள் இயங்கிக்கொண்டிருக்கும் நிலை இருக்கிறது.
எம்ஜிஆருக்கும் ஜெயலலிதாவுக்கும் வாரிசு இல்லை. நம்மையும் நாட்டு மக்களையும்தான் வாரிசாகப் பார்த்தார்கள். எண்ணெற்ற திட்டங்களை அவர்கள் கொடுத்ததால்தான் இன்றும் அதிமுகவை யாராலும் தொட்டுப்பார்க்க முடியவில்லை.
சட்டமன்றத்தில் பெரும்பான்மை நிரூபிக்கும்போது, தீர்மானம் நிறைவேற்றப்படக் கூடாது என்பதற்காக நம்முடன் இருந்தவர்களே எதிரிகளோடு கைகோர்த்து சோதனையை உருவாக்கினார்கள். சட்டமன்றத்தில் பெரும்பான்மை நிரூபிக்கும் தீர்மானத்தை கொண்டுவந்தபோது தற்போதைய முதலமைச்சரும் அவரது சட்டமன்ற உறுப்பினர்களும் எப்படி நடந்துகொண்டார் என்பதை தொலைக்காட்சியில் தெரிந்திருக்கும். அதையெல்லாம் கடந்து நாம் வெற்றி பெற்றோம். அதை பொறுத்துகொள்ள முடியாமல் சட்டையை கிழித்துக்கொண்டு வெளியில் வந்தவர்தான் ஸ்டாலின். வரும் சட்டமன்ற தேர்தலில் அதிமுக வென்று ஆட்சி அமைக்கும்போது ஸ்டாலின் எந்த நிலையில் இருப்பார் என்று தெரியவில்லை.
பல்வேறு சதித்திட்டங்களைத் தாண்டி ஆட்சி அமைத்தோம். இன்றும் திமுக உள்ளிட்ட எதிர்க்கட்சிகள் நம் ஆட்சியை விமர்சிக்க முடியவில்லை. அத்தகைய ஆட்சியை கொடுத்தது அதிமுக. அதிமுக – பாஜக கூட்டணி என்றுதான் சொல்கிறார்கள். அதைத்தாண்டி எதாவது ஆட்சியில் குறை சொல்ல முடிந்ததா? பொற்கால ஆட்சியை கொடுத்தது அதிமுக அரசு. அதே ஆட்சி மீண்டும் தமிழ்நாட்டில் வர நீங்கள் எல்லோரும் ஒத்துழைப்பு கொடுக்க வேண்டும்" என்றார்.
முன்னாள் அமைச்சரும், அதிமுக எம்பியுமான சிவி சண்முகம் உரையாற்றுகையில், “பொதுக்குழு நடைபெறும் இந்த மண்டபம் அதிமுக வரலாற்றில் பல்வேறு நிகழ்வுகளை சந்தித்திருக்கிறது. அதிமுக இருக்காது, காணாமல் போய்விடும் என்று பல்வேறு கட்டுக்கதைகளை ஸ்டாலின் அரசு பரப்பி வருகிறது” எனத் தெரிவித்தார்.
அதிமுக தொடங்கப்பட்டதில் இருந்து எம் ஜி ஆரைப் பார்த்து நடிகர் நாடாள முடியுமா எனக் கேட்டார்கள் என்று தெரிவித்த சண்முகம் அவரது மறைவுக்குப் பிறகு ஜெயலலிதாவைப் பார்த்தும் ஆட்சி அமைக்க முடியுமா என்று கேட்டார்கள் எனத் தெரிவித்தார். மேலும் பேசிய அவர், “எடப்பாடிக்கு ஆளத் தெரியுமா? நிர்வாகம் தெரியுமா? எனக் கேட்டவர்களுக்கு மத்தியில் நான்கரை ஆண்டுகள் சிறப்பான ஆட்சியைக் கொடுத்தார் எடப்பாடி பழனிசாமி. அதிமுக ஆட்சியில் இருந்தாலும் இல்லையென்றாலும் நம்மைக் குறிவைத்து அதிமுகவை அழித்துவிட வேண்டுமென நினைக்கிறார்கள். எதிரி திமுக என்பது தெரியும். துரோகி யார் என்றும் தெரியும். நம்மோடி உறவாடி நம்மை கெடுப்பவர்களிடம்தான் நாம் ஜாக்கிரதையாக இருக்க வேண்டும். பல்வேறு சதித்திட்டங்களை முறியடித்து அதிமுகவை எதுவும் செய்ய முடியாது எனும் நிலைக்கு எடப்பாடி பழனிசாமி கொண்டு வந்திருக்கிறார்” எனத் தெரிவித்தார்
எடப்பாடி பழனிசாமி விழா மேடைக்கு சென்றடைந்த நிலையில் தாமதமாக வந்த பொதுக்குழு செயற்குழு உறுப்பினர்கள் உள்ளிட்ட அதிமுக நிர்வாகிகள் கூட்டத்திற்குள் அனுமதிக்கப்படாமல் தடுத்து நிறுத்தப்பட்டனர். நூற்றுக்கும் மேற்பட்டோர் நுழைவாயில் முன்பு உள்ளே அனுமதிக்க கோரி காவல்துறையினருடன் கடும் வாக்குவாதத்தில் ஈடுபட்டனர்.
காவல்துறை மண்டபத்தில் இரண்டு வாசலையும் மூடியதை அடுத்து அதிமுக நிர்வாகிகள் மற்றும் காவல்துறை இடையே தள்ளுமுள்ளு ஏற்பட்டது. சிலர் மதில் சுவர் ஏரி குதித்து சென்றதால் பரபரப்பு நிலவியது.. தடுப்புகளை உடைத்துக்கொண்டு உள்ளே செல்ல சிலர் முயன்ற நிலையில் பலரும் கீழே விழுந்தனர். ஒருவர் மீது ஒருவர் ஏறி மிதித்து சென்ற நிலையில் அங்கு பரபரப்பான சூழல் நிலவியது.
முன்னாள் அமைச்சரும் அதிமுக மகளிரணி செயலாளருமான வளர்மதி வரவேற்புரை ஆற்றினார். அவர் கூறுகையில், “அம்மாவின் ஆன்மா இதே மண்டபத்தில் எடப்பாடியாரின் உருவத்திலே நம்மைப் பார்த்துக்கொண்டிருக்கிறது. தஞ்சை பெரிய கோயில் ஆனாலும், தாஜ்மஹால் ஆனாலும் அதன் உறுதி அஸ்திவாரத்தில் இருக்கிறது. அதேபோல் அதிமுகவின் வலிமை அமைச்சர்களால் அல்ல, தலைமை கழக செயலாளர்களால் அல்ல. எதிரே உட்கார்ந்திருக்கும் நீங்கள்தான் அஸ்திவாரம். கொடியும் நீங்கள்தான்; கொடிமரமும் நீங்கள்தான். நீங்கள் இருக்கும் வரை எந்த கொம்பனும் இந்த கட்சியை அசைத்துவிட முடியாது. சத்துணவுத்திட்டம் இருக்கும் வரை எம்ஜிஆர் பெயர் இருக்கும் தாலிக்குத் தங்கம் என்று சொல்லும் வரை அம்மாவின் பெயர் இருக்கும்” எனத் தெரிவித்தார்.
எம்ஜிஆருக்கும் ஜெயலலிதாவுக்கும் எதிரிகள் இருந்தார்கள் ஆனால் துரோகிகள் இல்லை என தெரிவித்த வளர்மதி, எடப்பாடி பழனிசாமிக்கோ எதிரிகளும் இருக்கிறார்கள்.. துரோகிகளும் இருக்கிறார்கள் எனத் தெரிவித்தார். "இந்த துரோகிகள் சாக்ரடீசுக்கே விஷம் கொடுத்தவர்கள். ஏசுவை சிலுவையில் அறைந்தவர்கள். கும்பிட்ட கைகள் கூர்வாளை ஏந்தி வந்த புரூட்டஸ்கள். அருவியில் குளித்தாலும் அழுக்கு போகாத மனிதர்கள். வரலாற்றின் குப்பைத் தொட்டிகள். நிழல்தந்த மரத்தின் மீது எச்சமிட்டுப் போகிற தான் தோன்றிப் பறவைகள். எத்தனையோ பேர் இந்த இயக்கத்தைக் காட்டிக்கொடுத்துவிட்டுப்போனார்கள், ஆனாலும், இந்த இயக்கம் அழியவில்லை. போனவர்கள் எல்லாம் பத்தோடு பதினொன்று.. ஆனால், வரும் தேர்தலில் எடப்பாடி பழனிசாமி முதலமைச்சராவது உறுதி" எனத் தெரிவித்தார்.
தமிழக சட்டமன்றத் தேர்தல் நெருங்கும் நிலையில், சென்னையில் அதிமுக பொதுக்குழு இன்று கூடுகிறது. சென்னை வானகரத்தில் நடைபெறும் பொதுக்குழு, செயற்குழு கூட்டத்திற்கு அக்கட்சியின் பொதுச் செயலர் எடப்பாடி கே பழனிசாமி முன்னிலை வகிக்கிறார். இதில், சட்டமன்றத் தேர்தல் பணிகள், தேர்தல் கூட்டணி நிலைப்பாடு, திமுக அரசுக்கு எதிரான பரப்புரை முன்னெடுப்பு உள்ளிட்டவை தொடர்பாக ஆலோசித்து தீர்மானங்கள் நிறைவேற்றப்படும் என எதிர்பார்க்கப்படுகிறது. ஏற்கெனவே அதிமுக, பாஜக கூட்டணி உறுதிசெய்யப்பட்ட நிலையில், பாஜகவின் நீண்ட நாள் கோரிக்கையான கட்சி ஒருங்கிணைப்பு குறித்தும் கூட்டத்தில் முக்கிய முடிவுகள் எடுக்கப்படும் என தகவல்கள் வெளியாகியுள்ளன.
