பொதுமக்கள் கூடும் நிகழ்வுகள்.. நிலையான வழிகாட்டு நெறிமுறைகள் வெளியீடு!

பொதுமக்கள் கூடும் நிகழ்வுகளுக்கான நிலையான வழிகாட்டு நெறிமுறைகள் அறிவிக்கப்பட்டுள்ளது. அதன் முக்கிய அம்சங்களைப் பார்க்கலாம்...

• பொதுக் கூட்டங்களுக்கு அனுமதி வழங்குதல், கூட்டம் நடத்தும் இடம், நேரம், வழித்தடம், மேடை உள்ளிட்டகட்டுமானங்களின் உறுதித்தன்மை முதலியவற்றை முறைப்படுத்த வேண்டும் என தமிழக அரசு தெரிவித்துள்ளது.

• ஆண்களுக்கும் பெண்களுக்கும் தனித்தனியே 500 பேருக்கு ஒரு கழிவறை, 500 மீட்டர் தொலைவில் 6 முதல் 8 கழிவறைகள் ஏற்பாடு செய்ய வேண்டும் எனத் தெரிவிக்கப்பட்டுள்ளது.

• அதிக ஆபத்து உள்ளதாக சந்தேகம் எழும் பகுதிகளில் 50 பேருக்கு ஒரு காவலர் என்ற வகையில் பணியில் இருக்க வேண்டும் எனத் தெரிவிக்கப்பட்டுள்ளது.

• 100 பேருக்கு ஒருவர் என கட்சியினர், தன்னார்வலர்களை ஈடுபடுத்த வேண்டும் எனக் கேட்டுக் கொள்ளப்பட்டுள்ளது.

• அரசியல் கட்சியினர் ரோடு ஷோ நடத்தினால், நிர்ணயிக்கப்பட்ட இடத்தில் மட்டுமே உரை நிகழ்த்த வேண்டும் எனத் தெரிவிக்கப்பட்டுள்ளது. வழியில் எங்கும் உரை நிகழ்த்தக் கூடாது எனக் குறிப்பிடப்பட்டுள்ளது.

• சிறப்பு அழைப்பாளரின் வாகனத்தை மக்கள் பின்தொடர்ந்து செல்வதை தடுக்க, தன்னார்வலர்களை நியமித்து ஒழுங்குபடுத்த வேண்டும் எனத் தெரிவிக்கப்பட்டுள்ளது.

• கூட்டத்தில் நின்று கொண்டிருப்போருக்கும் அமர்ந்திருப்போருக்கும் தனித்தனியே தடுப்பு பகுதிகள் அமைத்திட வேண்டும்.

• ஐந்தாயிரம் பேருக்கு மேல் கூடும் பொதுக்கூட்டங்கள், மதம் சார்ந்தவை என, எந்தவொரு நிகழ்ச்சிக்கும் இது பொருந்தும் எனத் தெரிவிக்கப்பட்டுள்ளது.

• குறைந்த ஆபத்து என்றால் 200 பேருக்கு ஒரு காவலர். மிதமான ஆபத்து என்றால் நூறு பேருக்கு ஒரு காவலர், அதிக ஆபத்து என்றால் 50 பேருக்கு ஒரு காவலர் என நிர்ணயிக்கப்பட்டுள்ளது.

• கூட்ட எண்ணிக்கைக்கு ஏற்ப திருப்பித் தரக்கூடிய காப்புத் தொகை வசூலிக்க பரிந்துரைக்கப்பட்டுள்ளது.

• ஐந்தாயிரம் முதல் பத்தாயிரம் பேர் பங்கேற்பதாக இருந்தால் 1 லட்சம் ரூபாய் டெபாசிட், 10ஆயிரம் முதல் 20 ஆயிரம் என்றால் 3லட்சம் ரூபாய் பெடாசிட், 20 ஆயிரம் முதல் 50 ஆயிரம் வரையிலான மக்கள் பங்கேற்பதாக இருந்தால் 8 லட்சம் ரூபாய் வரை டெபாசிட், 50 ஆயிரம் பேருக்கு மேல் 20 லட்சம் ரூபாய் டெபாசிட் செய்ய வேண்டும் என விதிமுறைகள் வகுக்கப்பட்டுள்ளன.

• வீதிமீறலுக்கு ஏற்பகாப்புத் தொகையை முழுமையாகவோ, பகுதியாகவோ பிடித்தம் செய்ய பரிந்துரைக்கப்பட்டுள்ளது.

• காயம் அல்லது பொதுச் சொத்துகளுக்கு சேதம் ஏற்பட்டால் பாதிக்கப்பட்டோருக்கு இழப்பீடு வழங்க ஏதுவாக காப்புத்தொகையை அந்த வழக்கில் இணைக்க வேண்டும் எனத் தெரிவிக்கப்பட்டுள்ளது.

• மேலும், அங்கீகரிக்கப்பட்ட இடத்தில் நடத்தப்படும் நிகழ்ச்சிக்கு 10 நாட்கள் முன்பாகவும் 15 நாட்களுக்கு மிகாமலும் மனு கொடுக்க வேண்டும்.

• அங்கீகரிக்கப்படாத மற்ற இடத்திற்கு 21 நாட்கள் முன்பாகவும் 30 நாட்களுக்கு மிகாமலும் மனு கொடுக்க வேண்டும்.

• கூட்டம் நடத்துவதற்கு குறைந்தபட்சம் 5 நாட்களுக்கு முன்னர் அனுமதி வழங்கப்படும் எனத் தெரிவிக்கப்பட்டுள்ளது. மனு நிராகரிக்கப்பட்டால் குறைபாடுகளை நீக்கி புதிய மனு கொடுக்கலாம் எனத் தெரிவிக்கப்பட்டுள்ளது.

• அரசின் புதிய வழிகாட்டு நெறிமுறைகளின்படி, நிகழ்ச்சிக்கு 2 மணி நேரத்துக்கு மேலாக காத்திருப்பதை மக்கள் தவிர்க்க வேண்டும் எனக் கேட்டுக் கொள்ளப்பட்டுள்ளது.

• பொதுக் கூட்டங்கள் மற்றும் ரோடு ஷோக்களை 3 மணி நேரத்துக்குள் நடத்தி முடிக்கவேண்டும் எனத் தெரிவிக்கப்பட்டுள்ளது.

• கூட்டத்தின் கொள்ளளவைவிட அதிகளவில் கூட்டம் கூடினால் நிகழ்ச்சி அமைப்பாளர்கள், தடுப்புகள் கயிறுகள் மூலம் தனியிடத்தில் அவர்களை ஒழுங்குபடுத்திட வேண்டும் என

  அறிவுறுத்தப்பட்டுள்ளது.

• விதிமீறல்கள், புகார்கள் உள்ளிட்டவை குறித்து நிகழ்ச்சிக்கு பின் அறிக்கை தயார் செய்ய வேண்டும் எனக் கேட்டுக்கொள்ளப்பட்டுள்ளது.