பெரியார் அறிவுலகம் முதல் இஸ்ரோவின் ககன்யான் திட்டம் வரை! யார் இந்த டாக்டர் பொன்னி ஆஸ்கர்?

செய்தியாளர் - ஷாலினி மூர்த்தி

சென்னையைச் சேர்ந்த பொன்னி ஆஸ்கர் , கட்டடக் கலைத் துறையில் 30 ஆண்டுகளுக்கும் மேலான அனுபவம் கொண்டவர். திருச்சி தேசியத் தொழில்நுட்பக் கழகத்தில் கட்டடக் கலையில் பட்டம் பெற்ற இவர், அமெரிக்காவின் கார்னெல் பல்கலைக்கழகத்தில் முதுகலைப் பட்டமும், ஹார்வர்ட் பல்கலைக்கழகத்தில் மேம்பட்ட தொழில்முறைப் பயிற்சியும் பெற்றுள்ளார்.

இந்தியாவில் மாநிலத் தலைமைச் செயலகத்தை வடிவமைத்த முதல் பெண் கட்டடக் கலைஞர் என்ற பெருமையையும் இவர் பெற்றுள்ளார். ஹைதராபாத்தில் அமைந்துள்ள தெலங்கானா மாநிலத் தலைமைச் செயலகத்தின் வடிவமைப்பில் முக்கியப் பங்காற்றியுள்ளார். சுமார் 12 லட்சம் சதுர அடி பரப்பளவில் அமைந்துள்ள இந்தக் கட்டடம், நவீன வசதிகளையும் நிர்வாகத் தேவைகளையும் கருத்தில்கொண்டு வடிவமைக்கப்பட்டுள்ளது.

இதுமட்டுமின்றி, இந்திய விண்வெளி ஆராய்ச்சி நிறுவனமான இஸ்ரோவின் ககன்யான் திட்டத்துக்கான உள்கட்டமைப்பு வசதிகளை வடிவமைப்பதிலும் டாக்டர் பொன்னி ஆஸ்கர் பங்களித்துள்ளார். இந்திய விண்வெளி வீரர்களை விண்வெளிக்கு அனுப்பும் நோக்கில் செயல்படுத்தப்படும் ககன்யான் திட்டத்துடன் இவரது கட்டடக் கலைப் பங்களிப்பும் இணைந்துள்ளது.

இந்த வரிசையில், கோயம்புத்தூரில் அமைந்துள்ள பெரியார் அறிவுலகமும் இவரது குறிப்பிடத்தக்க வடிவமைப்புப் பணிகளில் ஒன்றாக இடம்பெற்றுள்ளது. தந்தை பெரியாரின் பகுத்தறிவு, சமத்துவம் உள்ளிட்ட கொள்கைகளையும் நவீன அறிவியல் சிந்தனைகளையும் முன்னிறுத்தும் வகையில் இந்த மையம் உருவாக்கப்பட்டுள்ளது.

கட்டடக் கலைத் துறையில் இவர் ஆற்றிய பங்களிப்பைப் பாராட்டி, 2026-ஆம் ஆண்டுக்கான புதிய தலைமுறையின் ‘புலமைக்கான சக்தி விருது’ வழங்கப்பட்டதாகத் தெரிவிக்கப்பட்டுள்ளது.

கல்வி, நிர்வாகம், விண்வெளி ஆராய்ச்சி மற்றும் அறிவியல் விழிப்புணர்வு எனப் பல்வேறு துறைகளுடன் தொடர்புடைய திட்டங்களில் பங்களித்துள்ள டாக்டர் பொன்னி ஆஸ்கர், இந்தியக் கட்டடக் கலைத் துறையில் கவனம் பெற்றுவரும் பெண் ஆளுமைகளில் ஒருவராகத் திகழ்கிறார்.