தூத்துக்குடி மாவட்டம் கோவில்பட்டியில் உள்ள சென்னை சில்க்ஸ் ஜவுளிக் கடையில் பயங்கர தீ விபத்து ஏற்பட்டது. பல கோடி ரூபாய் மதிப்பிலான துணிகள் எரிந்து சேதமாயின.
கோவில்பட்டி சென்னை சில்க்ஸ் 3 தளங்களில் இயங்கி வருகிறது. இந்தக் கடையில் அதிகாலை திடீரென பிடித்தத் தீ, கொழழுந்து விட்டு எரிந்தது. இதுகுறித்து தகவல் அறிந்து கோவில்பட்டி, விளாத்திக்குளம், கழுகுமலை ஆகிய பகுதிகளிலிருந்து தீயணைப்பு வாகனங்களில் தீயணைப்பு வீரர்கள் விரைந்து வந்து, தீயை அணைக்கும் பணியில் ஈடுபட்டு வருகின்றனர். அதிகாலையில் கடை பூட்டியிருந்த போது தீ விபத்து ஏற்பட்டதால், உயிர் சேதம் தவிர்க்கப்பட்டது.
இருப்பினும், பல கோடி ரூபாய் மதிப்பிலான துணிகள் தீயில் கருகி சேதமாயின. தீயணைப்பு பணி தொடர்ந்து நடைபெற்று வரும் நிலையில், சேதம் மேலும் அதிகரிக்கக் கூடும் என அஞ்சப்படுகிறது. இதுகுறித்து வழக்குப்பதிவு செய்துள்ள காவல்துறையினர், தீ விபத்துக்கான காரணம் குறித்து விசாரணை நடத்தி வருகின்றனர். ஏற்கெனவே கடந்த 2017 ஆம் ஆண்டு சென்னை தியாகராயா நகரில் உள்ள சென்னை சில்க்ஸ் ஜவுளிக் கடையிலும், தீ விபத்து ஏற்பட்டது.
