முப்பெரும் விழாவில் பேசிய முதலமைச்சர் மு.க.ஸ்டாலின், “இது முப்பெரும் விழாவா, அல்லது நாம் சந்திக்கவுள்ள வெற்றி விழாவா? இது கரூர் இல்லை; திமுக-வின் ஊர் இது. அன்று கொட்டும் மழையில்தான் இதேநாளில் வடசென்னையில் திமுக-வை தொடங்கினார். அப்படிப்பட்ட இக்கழகம் 75 ஆண்டுகள் மட்டுமல்ல, நூற்றாண்டுகளையும் காணப்போகிறோம். உங்களிடம் பேசுவதைவிட, கொட்டும் மழையிலும் கூடியிருக்கும் உங்களின் எழுச்சியை பார்த்துக் கொண்டே இருக்கலாம் போல இருக்கிறது” எனத் தெரிவித்தார்.
மேலும் பேசிய அவர், "இந்தாண்டு முப்பெரும் விழாவை கரூரில் நடத்த வேண்டுமென்ற அனுமதி கேட்டு செந்தில்பாலாஜி என்னிடம் வந்தார். பொதுக்கூட்டம் என சொல்லிவிட்டு மாபெரும் எழுச்சி மாநாட்டையே ஏற்பாடு செய்திருக்கிறார் செயல்வீரர் செந்தில்பாலாஜி. நாங்கள் கோடு போட சொன்னால் ரோடு போடுவார் செந்தில்பாலாஜி. தற்போது ரோடு போட்டு அந்த ரோட்டின் மேல் வந்த வாகனத்தில்தான் நான் வந்தேன். மேற்கு மண்டலத்தில் எதிரிகளுக்கு சிம்ம சொப்பனமாக இருக்கக்கூடியவர் செந்தில்பாலாஜி. அவர் வெளியில் இருந்தால் தங்களால் நிம்மதியாக தூங்க முடியாது என அவரை முடக்கப்பார்த்தார்கள். அவரை முடக்க முடியுமா? எடுத்த பணியை வெற்றிகரமாக முடித்துக்காட்டுவார். நான் உறுதியாக சொல்கிறேன். கழக வரலாற்றில் இப்படியொரு பிரம்மாண்ட முப்பெரும் விழா நடந்திருக்காது" என்றார்.
“எனக்கு இருக்கும் ஒரே கனவு, தலைவர் கலைஞர் பெற்ற பெரியார் விருதை நான் பெறுவதுதான். இன்று அது நனவாகியுள்ளது. இதை நிறைவேற்றித் தந்திருக்கும் என் அண்ணன், திமுக தலைவர் முதல்வர் ஸ்டாலினுக்கு என் நன்றி. கொட்டும் மழையிலும் இங்கு நிற்கும் உடன்பிறப்புகளை பார்க்கும்போது, எந்தத் தேர்தலையும், எந்த பகைவரையும் வெல்ல இந்தப் படை போதுமென சூளுரைக்க தோன்றுகிறது. நம் பரம்பரை பகைவரோ, பாரம்பரிய பகைவோ, புதிய பகைவரோ அத்தனையையும் வென்று காட்டுவோம்” - கரூர் முப்பெரும் விழாவில் திமுக எம்.பி. கனிமொழி பேச்சு
நிகழ்வில் வரவேற்புரை ஆற்றிய சட்டமன்ற உறுப்பினர் செந்தில்பாலாஜி, “மேற்கு மண்டலத்தில் இருந்து சொல்கிறேன். 2026 திமுகவின் வெற்றிக்கணக்கை இங்கிருந்து தொடங்குவோம். எதிரிகள் யாராக இருந்தாலும், எந்த வடிவில் வந்தாலும், எத்தனை பேராக வந்தாலும், உறுதியாகச் சொல்கிறேன்; நாம் தான் ஜெயிக்கிறோம். நாம் மட்டும்தான் வெல்வோம்” எனத் தெரிவித்தார்.
கரூரில் திமுக முப்பெரும் விழா தற்போது தொடங்கி நடைபெற்று வருகிறது. திமுக சார்பில் ஒவ்வொரு ஆண்டும் செப்டம்பர் 17ஆம் தேதி அண்ணா பிறந்தநாள், பெரியார் பிறந்தநாள், திமுக தொடங்கப்பட்ட நாள் ஆகியவற்றை இணைத்து முப்பெரும் விழாவாக கொண்டாடப்பட்டு வருகிறது.
அந்தவகையில் இந்தாண்டு கரூர்-திருச்சி புறவழிச் சாலையில் கோடங்கிபட்டியில் திமுக முப்பெரும்விழா நடைபெற்று வருகிறது. இதில் திமுக தலைவரும், முதல்வருமான மு.க.ஸ்டாலின் கலந்துகொண்டு, கட்சிப்பணிகளில் சிறப்பாக செயல்பட்ட மூத்த முன்னோடிகள் 6 பேருக்கு விருதுகளை வழங்கி சிறப்புரையாற்றுகிறார். விழாவுக்கு கட்சியின் பொதுச் செயலர் துரைமுருகன் தலைமை தாங்குகிறார். இந்த விழாவில் சுமார் 2 லட்சம் பேர் வரை பங்கேற்கும் வகையில் ஏற்பாடுகள் செய்யப்பட்டுள்ளன. இது, சட்டமன்றத் தேர்தலுக்கு முந்தைய திமுக முப்பெரும் விழா என்பதால் முக்கியத்துவம் பெறுகிறது.
