’CBI விசாரணைக்கு பயந்து..’ விஜய்க்கு இயக்குநர் அமீர் எச்சரிக்கை!

தமிழக அரசியலில் புதுமுகமாக களமிறங்கிய விஜய் தலைமையிலான தமிழக வெற்றிக் கழகம், முதல்முறையாக 2026 சட்டப்பேரவை தேர்தலில் களம்காணவிருக்கிறது. தொடக்கத்தில் அரசியல் எதிரி திமுக, கொள்கை எதிரி பாஜக என பிரகடனம் செய்த தவெக தலைவர் விஜய், இரண்டு கட்சிகளையும் கடுமையாக விமரித்தார். ஆனால் போகப்போக திமுகவை பகிரங்கமாக விமர்சித்த விஜய், பாஜகவை விமர்சிப்பதில்லை என்ற குற்றச்சாட்டு எழுந்தது.

இந்தசூழலில் 2026 சட்டப்பேரவை தேர்தல் நெருங்கிவரும் நிலையில், தமிழக வெற்றிக் கழகத்துடன் எந்தக்கட்சியும் கூட்டணிக்கு வரவில்லை. தேர்தலில் தனித்து போட்டியிடும் எண்ணத்தில் இருக்கும் தவெக, மகளிர் தினவிழாவில் பெண்களுக்கான தேர்தல் வாக்குறுதிகளையும் அறிவித்தது.

இந்நிலையில் தற்போது தவெக தேசிய ஜனநாயக கூட்டணியில் இணையவிருப்பதாக தகவல் வெளியாகியுள்ளது.

சமீபத்தில் வெளியாகியிருக்கும் தகவலின் படி, என்.டி.ஏ கூட்டணியில் விஜயை இணைப்பதற்கு பாஜக சார்பில் முயற்சிகள் மேற்கொள்ளப்பட்டு வருவதாகவும், அதற்காக, ஆந்திர துணைமுதல்வரும் நடிகருமான பவன் கல்யாண் வழியாக விஜயிடம் பேச்சுவார்த்தையில் ஈடுபட்டு வருவதாகவும் தகவல் வெளியாகவிருக்கிறது.

மேலும், சிபிஐ, ஜனநாயகன் படத் தணிக்கைக் குழு வழியாக விஜயை பணிய வைக்க மத்திய அரசு முயல்வதாகவும் கூறப்படுகிறது. இதன் ஒருபகுதியாக, இன்று மறுத்தணிக்கைக் குழு பார்வையிடுவதாக இருந்த ஜனநாயகன் திரைப்படத்தின் தணிக்கை ,அதிகாரி ஒருவரின் உடல்நலம் சரியில்லாத காரணத்தினால் தள்ளிப்போய் இருப்பதாக தெரிவிக்கப்பட்டுள்ளது.

இந்தசூழலில் விஜய் என்.டி.ஏ கூட்டணியில் இணையவிருப்பதாக வெளியான தகவல் குறித்து கருத்து தெரிவித்திருக்கும் இயக்குநர் அமீர், “CBI விசாரணைக்கு பயந்து NDA கூட்டணிக்கு போயிராதீங்க, அதோட உங்க அரசியல் முடிஞ்சிடும்” என பதிவிட்டுள்ளார். இதற்கு முன் விஜயின் விவாகரத்து பிரச்னை குறித்தும் அமீர் கருத்து தெரிவித்திருந்தார்.