மதுரை எய்ம்ஸ் மருத்துவமனை எப்போது பயன்பாட்டுக்கு வரும்? மத்திய அரசு சொன்ன தகவல்!

மதுரை மாவட்டம் தோப்பூர் அருகே எய்ம்ஸ் மருத்துவமனை கட்டுவதற்காக கடந்த 2019-ம் ஆண்டு அடிக்கல் நாட்டப்பட்டது. ஆனால் அதற்கான கட்டுமான பணிகள் தொடங்கப்படாமல் கிடப்பில் போடப்பட்ட நிலையில், தொடர்ந்து பல்வேறு விமர்சனங்களும் வைக்கப்பட்டன.

இந்நிலையில் அடிக்கல் நாட்டப்பட்டு 5 ஆண்டுகள் ஆன நிலையிலும் இன்னும் பணிகள் முடிக்கப்படாமல் இருந்துவரும் நிலையில், மதுரையில் எய்ம்ஸ் மருத்துவமனை எப்போது கட்டிமுடிக்கப்படும் என்ற கேள்வி தகவல் அறியும் உரிமை சட்டத்தின் கீழ் கேட்கப்பட்டுள்ளது.

அதற்கு பதிலளித்திருக்கும் மத்திய அரசு 2027-ம் ஆண்டு பிப்ரவரி மாதம் பயன்பாட்டுக்கு வரும் என ஆர்டிஐ-ல் தெரிவித்துள்ளது.

தகவல் அறியும் உரிமை சட்டத்தின் கீழ் எழுப்பப்பட்ட கேள்விக்கு விளக்கமளித்திருக்கும் மத்திய அரசு, மதுரை எய்ம்ஸ் மருத்துவமனையானது 2027-ம் ஆண்டு பிப்ரவரி மாதம் பயன்பாட்டுக்கு வரும் என்றும், முதற்கட்டமாக ரூ.1,118.35 கோடிக்கு கட்டுமான பணிகள் தொடங்கப்பட்டிருக்கிறது என்றும், அடுத்த 33 மாதங்களில் பயன்பாட்டுக்கு வரும் என்றும் விளக்கமளித்துள்ளது.