கைத்தறி மற்றும் ஜவுளித்துறை ஆணையராக பீலா ராஜேஷ் நியமனம்

தமிழக கைத்தறி மற்றும் ஜவுளித்துறை ஆணையராக பீலா ராஜேஷ் இன்று நியமனம் செய்யப்பட்டிருக்கிறார். வணிகவரித்துறை செயலாளராக இருந்த பீலா ராஜேஷை இடமாற்றம் செய்து தமிழக அரசு இந்த உத்தரவை பிறப்பித்துள்ளது.

நேற்று ஒரே நாளில் 21 ஐ.ஏ.எஸ்.அதிகாரிகள் பணி இடமாற்றம் செய்யப்பட்டிருந்தனர். இவர்கள் மட்டுமன்றி, கூடுதலாக சிலரும் பணியிட மாற்றம் செய்யப்பட்டுள்ளனர். அதில் ஒருவராக பீலா ராஜேஷ் கைத்தறி மற்றும் ஜவுளித்துறைக்கு மாற்றப்பட்டிருக்கிறார்.

திமுக ஆட்சிப் பொறுப்பேற்றப் பிறகு, முதன்முறையாக முக்கிய துறைகளின் செயலாளர்கள் மாற்றப்பட்டுள்ளனர். இது மிகப் பெரிய அளவிலான மாற்றமாக பார்க்கப்படுகிறது.

இதுதொடர்பாக தமிழக அரசு இன்று வெளியிட்டிருக்கும் செய்திக்குறிப்பில் கூறப்பட்டிருக்கும் முக்கியமான சில தகவலகள்:

விக்ரம் கபூர், மங்கத் ராம் ஷர்மா, விபு நாயர், ஜெயஷ்ரீ ரகுநாதன், பீலா ராஜேஷ், சிகி தாமஸ் வைத்தியன் ஆகியோர் பணியிட மாற்றம் செய்யப்பட்டு, வேறு பணியில் அமர்த்தப்படுவர். அதன்படி,

• ஊரக வளர்ச்சி மற்றும் பஞ்சாயத்து ராஜ் துறைகளின் கூடுதல் தலைமைச் செயலாளர் ஹன்ஸ் ராஜ் வர்மா தமிழ்நாடு தொழில் முதலீட்டு கழகம் தலைவராக நியமிக்கப்படுகிறார்.
• வருவாய் மற்றும் பேரிடர் மேலாண்மை துறை கூடுதல் தலைமைச் செயலாளர் அதுல்யா மிஸ்ரா, மின் நிதி கழகத்தின் தலைவராக நியமிக்கப்படுகிறார்.
• மேலாண் இயக்குநர் பங்கஜ் குமார் பன்சால், தமிழகம் தொழில் வளர்ச்சி கழக தலைவராக நியமிக்கப்படுகிறார்.
• நிர்வாக சீர்திருத்த துறை முதன்மை செயலாளர் ஸ்வர்னா, தமிழக ஊரக கட்டமைப்பு நிதி பதவிக்கு நியமிக்கப்படுகிறார்.
• சுற்றுலா மற்றும் கலாச்சாரத்துறை கூடுதல் தலைமை செயலாளராக பதவி வகித்த விக்ரம் கபூர், திட்டம் மற்றும் மேம்பாட்டு துறைக்கான கூடுதல் தலைமைச் செயலாளராக நியமிக்கப்படுகிறார்.
• சிறு மற்றும் குறு துறையின் முதன்மை செயலாலர் மங்கத் ராம் சர்மா, நீர்பாசன விவசாயத்துறை மற்றும் மேலாண்மைக்கான முதன்மை செயலாளராக நியமிக்கப்படுகிறார்.
• வணிக வரி மற்றும் பதிவுத்துறை முதன்மை செயலாளர் பீலா ராஜேஷ், கைத்தறி மற்றும் நெசவு துறைக்கான முதன்மை செயலாளர் மற்றும் கமிஷனர் பதவிக்கு நியமிக்கப்படுகிறார்.
• தமிழ்நாடு தொழில் முதலீடுகள் கழகத்தின் மேலாண்மை இயக்குநராக பதவி வகிக்கும் சிகி தாமஸ் வைத்தியன், தொழில்துறை வணிகம் துறை இயக்குநராக நியமிக்கப்படுகிறார்.

பீலா ராஜேஷ், முன்னராக கொரோனா முதல் அலையின் தொடக்க நேரத்தில் சுகாதாரத்துறை செயலராக செயல்பட்டார் என்பது குறிப்பிடத்தக்கது.