'Bad Girl'-க்கு எதிராக ராஷ்ட்ரிய சனாதன சேவா சங்கம் மனு - சென்சார் போர்டு நீதிமன்றத்தில் சொன்ன பதில்
செய்தியாளர்: V.M.சுப்பையா
இயக்குனர் வெற்றிமாறன், அனுராஜ் ஹாசியப் தயாரிப்பில் நடிகை அஞ்சலி, ரம்யா ஆகியோர் உருவாகியுள்ள Bad Girl திரைப்படத்தின் டீசர் கடந்த ஜனவரி 26ம் தேதி வெளியானது.
இந்நிலையில், Bad Girl திரைப்படத்திற்கு தணிக்கை சான்று வழங்க கூடாது என உத்தரவிடக் கோரி கோவையைச் சேர்ந்த ராஷ்ட்ரிய சனாதன சேவா சங்கத்தின் தலைவர் ராமநாத் சென்னை உயர் நீதிமன்றத்தில் மனுத்தாக்கல் செய்துள்ளார்.
அந்த மனுவில், “இந்த டீசரில் பிராமணப் பெண் நாகரீக கலாச்சாரத்துக்கு மாறும் வகையிலும், பிராமணப் பெண்களை கொச்சைப்படுத்தும் வகையில் Bad Girl திரைப்பட டீசரில் காட்சிகள் இடம்பெற்றுள்ளன.
இந்த டீசரை வைத்து சமூக வலைதளங்கள், தொலைக்காட்சிகளில் பிராமண இனத்தை தரம் தாழ்த்தி பேசப்பட்டு வருகிறது. பிரமாண மக்களின் மனதை புண்படுத்தும் வகையில் இடம்பெற்றுள்ள காட்சிகளை சென்சார் போர்டு நீக்க வேண்டும்” என்று குறிப்பிட்டுள்ளார்.
இந்த மனு நீதிபதி பரத சக்ரவர்த்தி முன் விசாரணைக்கு வந்தது, மனுதாரர் தரப்பில், குறிப்பிட்ட சமூகத்தையும், பெண்களையும் தவறாக சித்தரித்து காட்சிகள் அமைப்பது சட்டவிரோதமானது என்பதால் படத்திற்கு சென்சார் சான்று வழங்கக் கூடாது என தெரிவிக்கப்பட்டது.
இதற்கு மத்திய அரசு தரப்பில், Bad Girl என்ற பெயரில் சென்சார் சான்று வழங்க அனுமதி கோரி இது வரை தணிக்கை சான்று கேட்டு, எந்த விண்ணப்பமும் வரவில்லை. இருந்தாலும் மனுதாரரின் மனு சட்டப்படி பரிசீலிக்கபடும் என தணிக்கைக் குழு தரப்பில் தெரிவிக்கப்பட்டது. இதனை ஏற்றுக் கொண்ட நீதிபதி, இந்த வழக்கை முடித்து வைத்து உத்தரவிட்டார்.
