தேனி | விநாயகர் சிலையை கரைத்து ஊர் திரும்பியபோது ஏற்பட்ட விபத்து! 3 சிறுவர்கள் பரிதாப மரணம்

போடி அருகே விநாயகர் சிலையை கரைத்து ஊர் திரும்பிய போது டிராக்டர் கவிழ்ந்து 3 சிறுவர்கள் உயிரிழந்தனர்.

தேனி மாவட்டம், தேவாரம் சுற்றுவட்டார பகுதிகளில் விநாயகர் சிலைகளை கரைக்க அருகில் உள்ள டிராக்டர்கள், லோடு ஆட்டோக்கள் மூலம் ஊர்வலமாக சென்றனர். அதன்படி, மறவபட்டி கிராமத்தைச் சேர்ந்த 3 சிறுவர்கள் உட்பட 5 பேர் மார்க்கையன்கோட்டையில் உள்ள ஆற்றில் விநாயகர் சிலையை கரைத்து விட்டு டிராக்டரில் திரும்பியுள்ளனர்.

அப்போது, லட்சுமிநாயக்கன்பட்டி பகுதியில் டிராக்டர் திடீரென ஓட்டுநர் கட்டுப்பாட்டை இழந்து கவிழ்ந்தது. இந்த விபத்தில் நிஷாந்த், கிஷோர், நிவாஸ் ஆகிய 3 சிறுவர்கள் நிகழ்விடத்திலேயே உயிரிழந்தனர்.

மற்ற இருவரும் காயமடைந்த நிலையில், அருகில் உள்ள மருத்துவமனையில் சிகிச்சை பெற்று வருகின்றனர். இந்த விபத்து குறித்து தேவாரம் காவல்துறையினர் வழக்குப் பதிவு செய்து விசாரணை நடத்தி வருகின்றனர்.